被網民一句話否定 洪卓立：呢句話難聽過粗口！
同樣是樂壇新人王，廿歲未夠已經唱了三場紅館的有G.E.M.；一出道就憑一首紅到發燒的〈如果我是陳奕迅〉開紅館騷的，還有樂隊Mr.。所以說人比人比死人，06年英皇新秀亞軍、07年出道橫掃各大新人獎、08年繼續係威係勢唱到可遇不可求的〈彌敦道〉，自己卻要走到第十二年才苦苦等到第一個賣票演唱會？洪卓立說，一場大病，讓他學會該計較的不是為甚麼最紅的那些年開騷的不是自己，而是該著眼目前：「我要唱好這場騷，我要說好我自己的故事。」
撰文：東方新地｜圖片：新傳媒圖片、洪卓立FB、YouTube
洪卓立 說故事的人
推出不到一個月，新歌〈獻醜〉已經點擊逼近50萬，剛過去的暑假，推出新歌、宣布開騷，洪卓立回來了。
「首新歌原定計劃係去年尾出，不過要同阿嬌 (鍾欣潼)、賀軍翔 拍埋套劇《動物系戀人啊！》所以推遲咗。」
說起來也是緣份，《動物系戀人啊！》台前幕後都是台灣班底，導演和製作團隊更是09年台灣華視《王子看見二公主》的同一班人。是咁的，09年港台兩邊走，一邊趕拍電視劇，一邊回港錄歌出騷，連續五天拍通頂，早機回港唱歌，晚機返台入攝影棚，那一年洪卓立就係咁出事，發高燒肺積水入院、大年初一動手術、21歲仔失驚無神來回地獄又折返。
「原來真係有陰影，我臨飛之前，真係會驚：『唔係咁邪啩！』上次《王子看見二公主》我個角色係突然消失，所有細軟都仲喺台灣要人執起幫我寄番嚟，始終有個心結，有一件事未完成咁。今次同呢班人，終於可以好頭好尾一次，有一種喺嗰度跌低，又喺嗰度起番身嘅感覺。」
對於下個月的音樂會，洪卓立一講就興奮：「Deep (吳浩康) 呢個人我係未入行已經鍾意佢，未入行聽佢首〈 擇日失戀 〉，已經覺得呢個人勁到黐線。竟然畀我等到有一日可以同佢一齊做一場騷，你明唔明有幾興奮。」
講起Deep，洪卓立說入行頭幾年就問過他一個問題，答案讓他記足這些年：「我問佢，如果朝早十點就要上台，唱一首好難唱嘅歌，點開聲好？佢話好簡單：『六點起身囉！』⋯⋯你話呢個人係唔係黐線？」
十點用聲、六點開聲呢件事，洪卓立這些年一樣做得到，不過對初入行的他來說，的確係黐線。
故事改寫的一天
「19歲仔唱新秀，唔知點解就贏咗亞軍，無啦啦簽咗咁大間唱片公司、跟咗個金牌經理人，一出道就攞獎，去到邊出function，人哋啲fans都話最驚我喺度，因為我啲fans最多人最大聲喎。第二年人人話最難，又畀我遇到首〈彌敦道〉喎⋯⋯仲有件事我係威係勢，咁多年講到依家，英皇新人我係最後一個出碟有得出埠拍MV影CD cover！頭幾年一切嚟得太易，唔識諗亦都冇諗過係點解，真係好hea。十點上台，我真係夠膽九點半至起身，走音咪走囉⋯⋯走音咪隊個咪畀fans嗌囉，唱完就冇咗件事。入錄音室，係我自己唔做功課冇練歌，但係就覺得係個監製玩我，頭一日錄足成日基本都係畀我練唱，唔會收貨。其實係一首歌，無論熟悉度、感情同感覺都係要煲出嚟，我唔做功課呃到自己但係呃唔到人，你估監製聽唔出咩？」
所以說一場大病，除了突然叫停事業、口袋空空回流樂壇早已變了一番景象，洪卓立卻賺到了一個會共患難的女朋友，還有別人可能一輩子也遇不到的機會，改寫故事的機會。
「瞓喺病床時，唔敢諗仲有冇得唱番歌，連覺都唔敢瞓，怕呢一覺瞓著 咗之後起唔番身。一直都冇諗過仲會唔會唱、有冇機會唱番，直到出院留喺屋企冇嘢做⋯⋯以前我從來唔會聽自己啲歌，係嗰次黐起條筋播嚟聽，第一次我發現，歌聲背後原來有鼓、有琴、有結他，有好多人嘅心血，第一次發現，我本來擁有嘅，係幾多人成就我、有幾咁幸運。」
當笑話不再好笑
一樣是大病一場，搞到洪卓立由一線新人王，變頭號被玩對象。由入院做手術到打後幾年，一直被網友惡搞死訊，是為網絡界的「洪卓立」之亂。死過翻生的洪卓立本來還能苦笑，安慰自己要學會適應網友的幽默感，最近，卻因為一句話，再也笑不出來。
「網友攞呢啲嘢嚟講笑，我一早都慣咗，唔會太認真。不過早排我上YouTube睇自 己歌，有個台灣網民留言：『唱這首歌的是誰？很好聽！』畀我見到個講廣東話嘅網民咁答佢：『呢個人死咗喇！冇人會聽死人唱歌㗎！』⋯⋯呢一句說話，冇粗口，但係好難聽。一啲都唔好笑，我寧願你鬧我，好過你一句說話，就否認咗首歌背後成個團隊所有人嘅努力同心血。就係你呢啲人，令到香港娛樂圈變成咁⋯⋯」
所以下個月的演唱會，洪卓立說是一個機會，讓入場的人，除了聽好歌以外，走的時候還能像他這些年一樣，袋啲嘢走：「再出番嚟唱歌，我一直都做緊一樣嘢，希望畀所有人知，我唔係偶像派、唔係得個樣，我有想法，視歌為一個途徑，話畀人知每一個階段，對我最重要係乜嘢。好多人話，呢場病搞到我事業亂晒陣腳、十年至開第一次賣飛演唱會比好多人遲太多⋯⋯我覺得條數唔係咁計，做人唔係計點解邊一年跑出嗰個、 唱入紅館嗰個係人哋唔係自己，而係應該見到眼前，你做到喇、可以開一場夢寐以求嘅演唱會。你畀我揀，係只得五首hit歌，去開場要唱30首歌嘅音樂會，其他25首歌觀眾估甚至要唱人哋啲歌，咁我寧願再等吓⋯⋯等到30首都係我嘅，等到我對得住啲買飛入場嘅人，至會走入去紅館呢個對我嚟講好神聖嘅地方。」
一入行就是新人王、簽約在大唱片公司和金牌經理人Mani旗下，洪卓立說：「冇諗過點解，細細個得到太多又冇機會沉澱自己，個人梗係飄！」
新歌〈獻醜〉上線不到一個月點擊已經逼近50萬，說的是愛情名存實亡，留住女朋友的人卻留不住心的故事。
下月11日將與吳浩康在旺角麥花臣舉行演唱會《他說他的故事》，是入行十二年以來洪卓立第一個賣飛演唱會。
