歐鎧淳唔急諗退役 讚運動員係筍工
歐鎧淳 靠朋友頂住
講到最初點解學游水？歐鎧淳表示：「因為爹哋話如果媽咪同我跌落水，佢唔會救我，所以我要學游水！細個同一班朋友仔一齊，覺得開心、好玩，到依家都係，因為有一班朋友，所以我先會繼續頂住。如果唔係好悶㗎、好容易會放棄！」
問歐鎧淳如果淨係游水，冇做娛樂圈工作，夠唔夠維生？佢坦言：「我唔知係大家對運動員嘅接受程度高咗好多，令到運動員可以變成全職嘅生活，我哋做運動員可以搵到食，我覺得係相輔相成，某程度我哋都要有商業嘅活動可以支撐，始終大家都知道運動員本身嘅收入唔多，又唔係好長久，所以係要兩邊一齊做，但要搵到個平衡。」
再唔開心都要游水
講到歐鎧淳曾去美國柏克萊大學升學同參加泳隊，聽聞個教練好惡，問佢當時有冇遇到挫折？佢憶述：「個教練係好惡，日日都鬧我哋，嗰時覺得好唔開心，但冇諗過放棄，一路堅持練水，就算咩都唔想做、連學都唔返，都知道要去練水，好彩運動員嘅精神紮咗根，再唔開心都知道要去游水，最後終於游到好成績。」
問佢依家一個禮拜練幾耐水？歐鎧淳透露：「體院規定全職運動員要練二十五個鐘頭，包括練水、做Gym，其實係一日四至五個鐘頭，分兩節，每節大概兩個鐘多啲，所以我成日話做運動員係筍工，哈哈哈！」講到方力申指做游泳運動員頭髮會斷、皮膚會差，歐鎧淳就話：「呢啲係會有，我哋身上面係冇乜毛，因為已經浸到冇晒，眉毛都冇晒、皮膚會乾、頭髮會差。所以就要有護膚品廣告，哈哈哈！」
唔太鍾意做幕前
對於退役後嘅安排，歐鎧淳笑言：「我都當我依家參與娛樂圈、演藝事業睇吓會唔會係一個後路，至少我試過，自己知道鍾唔鍾意做、鍾意做啲乜嘢，就算喺呢個圈裡面，都有好多唔同嘅範疇可以做得到，但我自己覺得我唔係太過鍾意做幕前，我鍾意做安排嘅嘢，我覺得做P.R.或者Production好玩、好開心。」
歐鎧淳直言有諗過退役後做教練：「都會想嘅，好得意，我做運動員，但完全冇教過水，因為教練話會畀人覺得運動員嘅形象唔專業，但我自己覺得教人可能更加了解自己游緊啲咩，有時都想因為咁試吓教，但我真係好忙，都要抽時間休息。」
歐鎧淳又指自己暫時仲未有認真諗過退役之後嘅打算：「要做嘅話都可以繼續試吓先，同埋依家社會嘅風氣變得咁快、對運動員嘅睇法又咁唔同，我未需要太焦急第時嘅去路，可以一步一步行出嚟。」
