與李靄璣拍拖結婚11年 林奕匡：太太為我犧牲好多
林奕匡：我哋唔係一見鍾情
唔講唔知，原來林奕匡同太太李靄璣 (Rikko) 認識嘅地點，並唔係香港：「十四年前、第一年大學放暑假，諗住搵啲嘢學，報咗加拿大中文電台DJ訓練班，第一輪我就畀人淘汰咗，老婆過五關斬六將仲做埋DJ，當時我覺得呢個女仔好勁，講嘢清楚有信心，全部係我做唔到嘅嘢，但唔係一見鍾情，佢都鍾意唱歌，我哋交換咗msn，做咗朋友，得閒唱吓K。」
呢行都好多誘惑，問佢哋係咪一直咁pure、無風無浪？林奕匡直言：「梗係唔係啦，啱啱入行嘅時候，佢身邊人都同佢講：『佢入呢行，成功你又驚，唔成功你更加驚，唔好同佢一齊啦！』再到之後五、六年，我都冇乜收入，女仔都要為自己著想，身邊好多人追佢，但佢一直都好好，每次都好清晰同人講：『唔好意思，我已經有男朋友。』有時人哋問到男朋友做咩㗎，佢答歌手，人哋再問叫咩名、唱過咩歌？『叫林奕匡。』『邊個嚟㗎？』嗰下我相信佢都幾hurt。」
歌詞抒發情感
咁樣係點捱過？林奕匡回憶：『有次，佢話需要啲空間做決定，諗清楚一啲嘢，叫我畀幾日時間佢，佢離家出走一個人去咗韓國，我當時都知大事不妙，嗰時我無收入、無新歌、無任何工作，我係佢我都一早走咗啦！嗰時我寫咗個電郵畀佢，祝福佢、希望佢開心，已經無太介懷佢係咪離開，覺得要畀佢行、畀佢飛。電郵入面寫咗幾句歌詞抒發我當時心情，首歌叫〈Don’t you remember〉，歌詞係講：『畀空間你，畀你去搵唔見咗嘅嘢，跟住帶你返番嚟我身邊。』佢之後講，佢當時睇到已經喊晒，想即刻返嚟，但都畀多兩日時間去諗。」
「到佢返到嚟，好清晰同我講：『呢一行唔成功、搵唔到食等等，但退一步望，我哋啲屋企人依然存在，亦都好錫我哋，我可以返加拿大，我讀書都叻嘅，再讀多個學位都係兩年，唔做歌手，可以做理財、會計，乜都得，其實唔係世界末日，而我覺得我哋真係彼此之間soulmate，興趣、鍾意嘅嘢、講嘅嘢，世上無人好似我哋咁啱key，如果真係唔成功，我同你返加拿大去捱囉！』佢咁講，幫咗我好多，因為我好多壓力都係嚟自佢，男仔時間好多，但唔可以要個女仔等你一世。佢講完，我心頭大石無咗，更加放心去做我想做嘅嘢。」
呢個年紀結婚，對男仔嚟講比較早？林奕匡就話：「喺香港可能係，喺外國其實好正常，我有朋友十九歲就結婚。我哋都喺埋一齊十年，我已經長大咗好多，都知道世上搵唔到另一個好似佢咁，亦都等咗十年啦，仲想要等幾耐先？我有呢個諗法一段時間，但到開埋第一個個人演唱會，我先求婚，我覺得起碼要咁。」
想湊個「好」字
最後問佢計劃生幾多個、幾時生？林奕匡笑言：「最好生兩個啦！湊個『好』字，梗係正啦！仔、女都咁開心，都唔想等太耐，但係畀多年零時間啦，其實太太為我犧牲咗好多，佢之前喺電視台做嘢，佢都好多收入，但當佢話願意同我返溫哥華，畢竟如果真係返去做寫字樓，佢無可能同人講過往工作經驗係藝人。所以佢放棄幕前轉做寫字樓工作，呢兩年我嘅收入穩定咗，我同佢講：『你可以做咩都得，想做幕前又得、唔做又得！』最近佢開始投入番幕前工作，都開始忙，我都戥佢好開心，因為我知道佢一直放唔低，我希望畀多少少時間佢，我哋先再計劃生BB嘅事。」
與太太李靄璣 (Rikko) 患難與共，修成正果，訪問中提起太太林奕匡便瞇眼甜笑，更深情告白指：「知道世上搵唔到另一個佢！」
拍拖十年、結婚快將一周年，太太post性感泳衣照大派福利，不知情的Phil知道後，笑言：「搞錯呀！」更稱一向跟太太約法三章禁po性感相，足見恩愛。
最近太太復出幕前，兩人更曾上無綫節目《1+1的深情》，分享戀愛史。
「1+1的深情」Thank you @tinyuilee for the interview 💙 #大家密切留意
Phil Lam 林奕匡（@saxyphil）分享的貼文 於 張貼
