26歲曾樂彤新歌挑戰高難度《熟女強人》黑仔芬發放正能量

Oct 7 2020

入行三年的曾樂彤，由KOL女神變成英皇娛樂旗下藝人，歌視雙線發展，無時無刻都願意接受新挑戰，最近她努力宣傳新歌〈天空之門〉，有份參演的ViuTV新劇《熟女強人》又熱播，曾樂彤人氣急升食正天時、地利與人和，曾樂彤希望在疫情下為大家帶來正能量，期望各方面都有好成績。

撰文、圖片：東方新地｜Outfit：Charlotte Ng Studio｜Venue：銅鑼灣迷你酒店

曾樂彤新歌有日本動漫感覺

曾樂彤的活潑樂天形象深入民心，新歌〈天空之門〉跟音樂人Cousin Fung第三次合作，她表示對方提高了要求，以奇特的方法指導她，曾樂彤說：「Cousin喺唱腔、細節位都好嚴格，所以錄音過程好漫長，可以話係我出道以嚟最難唱嘅一首歌。因為喺聲線上係一個好大嘅挑戰，第一年出道嘅我把聲比較薄，我唔係一出嚟把聲就好厚好歌手嗰種，我搵咗好多種方法去唱，Cousin喺技術上幫咗我好多，同我做咗好多練習同訓練，錄歌時佢畀咗張相我睇，叫我望住張相憑感覺去唱，係實驗性嘅嘢，好新鮮同有意想不到嘅效果，起碼把聲聽起上嚟同以前好唔同。」曾樂彤表示聽住〈天空之門〉的時候，就好似一路跑步、通山跑的感覺，成功營造出日本動漫的感覺，所以MV亦用了動畫形式拍攝，她說睇埋MV整體效果會更好。

曾樂彤表示新歌〈天空之門〉錄了四日才完成，破了她的紀錄，今次與監製Cousin Fung溝通多了，出來的效果意想不到的好。

新歌內容圍繞人的好奇心，曾樂彤覺得好奇心就好似小時候一樣好重要的東西，失去了才發現其重要性，現在想重拾回來。

新歌寄喻想做就去做

曾樂彤認為近來受疫情影響，大家大部分時間都留在家中，原本的生活亦被徹底改變，她說：「所有嘢都好似歸零，大家都要重整以往嘅生活，諗吓以前做緊嘅嘢係咪你想做？依家係一個好好享受時間嘅大好機會，聽我首新歌，唔係再聽啲咩大道理，〈天空之門〉係講好奇心，唔係好想用腦，反而係一種推動力，帶嚟正能量，有機會就去做，唔好再諗。」

對於疫情下出新歌，曾樂彤說：「困難都有㗎！不過好彩我有拍劇，呢首歌等咗三個月先可以拍MV，嗰段時間我就去咗拍劇，拍Vlog，時間好快過，我唔會畀自己一蹶不振嘅！」

曾樂彤為人率真爽朗，訪問中提及疫情下的影響，她都正面樂觀去回應，希望把自己的正能量傳揚開去，感染大家。

近年機會不斷的曾樂彤不時與同門師兄師姐一起出席公開的電影活動，除了唱歌，她還參與拍劇及微電影。

講到最近在ViuTV新劇《熟女強人》中飾演吳家麗的秘書Fanny，曾樂彤表示拍劇過程超級開心，「今次係我第二次拍劇，個角色係好有趣，家麗姐係一個好nice嘅前輩，我哋傾咗好多關於電影同佢以前嘅經歷，因為講成班好姊妹嘅故事，有好多群戲，所以我好快就放低緊張，大家玩住拍，好似朋友開party咁好開心，我覺得學到好多嘢。」26歲的曾彤樂對演藝工作認真又進取，仲有大把機會，前途無可限量。