姜皓文 談與曾志偉美麗的誤會

撰文：東方新地｜圖片：新傳媒圖片庫

姜皓文：志偉好錫我

講到去年金像獎同曾志偉嘅是非，姜皓文話：「其實志偉san係好錫我，根本嗰時喺亞視，係佢點名叫我做《開心主流派》，由嗰段時間佢就好關心我，仲有一段時間，佢有叫我去TVB㖭！佢搞經理人公司，又叫過我去佢公司，佢講嘢嘅語氣同性格，我哋熟嘅就知，如果唔熟佢，佢嗰件形態係會令到人有啲誤會嘅，有陣時佢口急，講快咗！」

姜皓文又為曾志偉解畫稱：「佢話『我一部撼你廿六部！』係一個切磋嘅對白，如果唔係，佢直頭唔使提我㖭啦，佢有心幫我、佢都戥我肉緊，係美麗嘅誤會！」

杜SIR好惡？ 姜皓文：係霸氣

講到杜琪峰導演，黑仔拍過杜SIR執導嘅《奪命金》、《毒戰》、《盲探》等多部電影，問佢杜SIR係咪真係好惡？佢話：「杜生係有種霸氣，有種大師級嘅風範，佢唔係貿貿然去惡，唔好話杜生，每一個導演都係！太專心想做好一樣嘢就會緊張咗。」

姜皓文憶述：「我記得有次拍《毒戰》，唔醒起兩部機一齊拍，我角色中槍死咗，聽到嗌cut，我起身，杜生大嗌：『邊個郁？』真係驚到尿都想標出嚟！後尾我自首，同佢講：『導演，唔好意思！』佢淨係『唏』嘆咗聲氣，然後叫我哋去食飯。」

恨拍文藝片

問到姜皓文仲有咩角色想做？佢答：「想拍文藝愛情片，唔係動作愛情片，哈！男女主角完全唔襯，但好轟烈嘅愛情片，因為我啱啱拍完《翠絲》，鍾意咗文藝嘅節奏，唔想拍嚟拍去打、開槍，好攰呀！想演繹好輕柔嘅姜皓文畀大家睇。」

最好有兩個獎

講到今次兩部戲提名金像獎，姜皓文直言超級緊張：「如果畀我兩個獎就好嘞，我又想《拆彈專家》有份，又想《大樂師．為愛配樂》有份，我開心㗎，倉田保昭係我嘅超級偶像，我能夠同佢個名一齊角逐，我已經贏咗啦！希望票數唔會拉薄啦！」