22歲原島大地宣佈結婚！估吓佢拍過幾次拖？
撰文：東方新地｜圖片：新傳媒圖片庫、原島大地微博
原島大地22歲日本女友曝光
身在東京的大地，未因疫情影響好心情，在5月24日微博上公布和22歲女友結婚：「我結婚啦👩❤️👨老婆是22歲的日本女孩HaRuNa（晴奈）謝謝大家一路以來的関心🙇🏻♂️愿大家平安健康！ 」，並公佈女友肖像。有香港網友則指女友樣貌似香港女星林穎彤。
原島大地 戲如人生：再次戀愛
昔日《忘不了》童星原島大地15年後重返香港影壇，在電影《某日某月》第一次擔大旗、第一次有感情線、第一次在大銀幕裡和湯怡談一場遙距戀愛，說到愛情，原島大地面紅紅，說做人希望低調一點，不過還是不小心透露了透露廿歲仔之前只拍過一次拖：「唔係香港女仔，都唔係澳洲鬼妹，係日本人，puppy love，簡簡單單好pure，不過已經分咗手囉！」
靚仔又會打籃球，煲日劇煲得多，以為原島大地返學日常一定係打波有女高中生打氣團、平日不停收告白信、情人節打開locker肯定係被表白朱古力塞爆⋯⋯其實不然。
「咁多年，收過一次朱古力咁大把，仲要係全班男仔人人有份嗰隻⋯⋯告白信都收過一次，不過諗過考慮過，大家性格唔啱，都係拒絕咗佢。好多人睇日劇同漫畫睇得多，以為球場邊有好多愛情故事、球員成日同球隊manager係一對，我喺學校籃球隊、個manager都真係女仔，不過佢好專業喎。同埋練波次次放學都係匿埋喺體育館，根本就冇女學生做觀眾⋯⋯哈哈！」
原島大地續說：「所以我話我鍾意拍戲，今次拍《某日某月》真係好次拍咗第二次拖，不過呢次唔係好似上次咁單純，知道兩個人鍾意都未必可以喺埋一齊，原來現實會將兩個人拉遠、原來身邊會有人反對、原來就算再鍾意但係又不得不離開個感覺係咁，個心真係可以好痛！細個拍戲我根本唔知咩係演戲，去到片場就係玩、對白都係媽咪幫我背、教我唸，今次係我第一次喺戲中有感情線，第一次自己學識投入角色，去理解如果同鍾意嘅人分開感覺係點，感覺唔似係拍咗場戲，而係過咗一段人生、多咗一次心痛經歷。」
最愛日本運動女孩
港女、鬼妹定日本妹，在澳洲、香港、廣州還有日本都生活過的原島大地則說，因為同聲同氣，還是最喜歡日本女孩：「我唔使佢好靚，最好係似我一樣好平凡、又好平淡，頭髮唔好太長又唔好太短、性格唔好太外向又唔好太內向，仲有一樣好緊要，做運動一定會加分。」
雖然成家立室言之尚早，不過聽原島說偶像是家庭事業都成功的劉德華、還有錫兩個女錫到燶的NBA球星Stephen Curry，就知道有朝一日，暖男原島一定也是個好老公、好爸爸！
