「豆中之王」就是它！4個天然防脫髮、防白髮的方法

其實每個人都希望擁有一頭健康濃密嘅秀髮，但生活喺高壓城市忙碌嘅上班族，特別容易受脫髮白髮等問題纏繞。Echo 早在3年前曾經因工作壓力問題而成為脫髮受害者，當年花費上萬元睇過無數中西醫，都冇辦法根治我頭皮敏感同脫髮嘅問題。雖然話成年人每日會掉大約50至100條頭髮，但每日望住自己洗頭後嘅脫髮數量都令我好慌，真係唔相信我生頭髮嘅速度會趕得上甩嘅速度。由於食藥治標唔治本，在絕路關頭開始靠自己睇書搵咗好多簡單 防脫髮 白髮 嘅食物，從生活開始改善起居飲食，最後我所有頭髮問題終於得以改善，最後總括幾個覺得好有效嘅食物，今日就同大家分享下我嘅心得啦！

編輯：東方新地｜原文：more｜撰文：Echo Wong｜圖片：新傳媒圖片

4個天然方法 防脫髮 白髮

1. 奇異果 防脫髮

之前已經有新聞講過奇異果幫一位80幾歲嘅婆婆重回黑髮，其實我已經每日食兩個奇異果，奇異果本身含有好多頭髮需要嘅維生素和ALA酸，可以幫皮膚抗氧化之外，仲可以防止頭髮水份流失，更可以防脫髮。之前有位空姐客人搵我化新娘妝，由於佢成日周圍飛作息唔定時，加埋籌備婚禮好大壓力，搞到甩頭髮甩到見到頭皮，最後佢跟住我每日食兩個奇異果，估唔到兩個月嘅時間頭髮即刻變番之前咁健康。

2. 黑豆 改善白髮

夜貓一族特別容易出現白髮，因為身體會喺晚上睡眠時間進行排毒，如果體內毒素積聚過多都係出現白髮一個因素。我早餐會飲黑豆漿，黑豆有活血清熱、補虛烏髮、清熱解毒、祛風的功效，比其他豆類製品更加有益！但提提大家，如果容易腹脹嘅朋友就唔好長期飲用。

3. 菠菜 健康頭皮

菠菜含有大量維他命A和C、鐵、β-紅蘿蔔素和葉酸等養份，鐵質更加可以平衡頭皮酸鹼值，頭皮健康才能生出健康嘅秀髪，頭皮容易泛紅或生頭瘡者一定要多吃。

4. 食鹽加水洗頭 頭皮控油

西醫角度話我係油脂性皮炎，所以毛囊會大量出油導致發炎脫髪，所以我選擇每星期二次用食鹽溝水來洗頭/浸頭，鹽水可以消炎殺菌同時保持番頭皮嘅水份，好適合我哋油性頭皮使用。

以上四個係我最簡單有效嘅護髮方法，當然大家都要作息定時才能事半功倍。