年廿八洗邋遢 廚廁天然清潔劑 必備四寶

原文：Sunday Kiss

天然清潔劑

1. 油漬殺手梳打粉

價錢大約：＄8/支

梳打粉平時頂多自製麵包先用，原來清潔時都好好用！其實坊間一直流傳梳打粉有去油漬的功效，也有人會用五金舖買到的工業用梳打粉（粉粒較粗）來洗地，而其實食用梳打粉都一樣可以去油。在千年油漬上灑上適量梳打粉，然後在梳打粉上倒上適量白醋，此時就會出現輕微的白泡，等十至廿分鐘後，用百潔布輕易一抹就甩！此方法最啱用在抽油煙機拆件及煎Pan等油漬重災區身上！另外，梳打粉同時亦有除味及除霉菌的功效，絕對不單指整包咁簡單！

2. 檸檬擦擦去水漬

價錢：＄5/個

廚房及浴廁等長年用水位置，水漬斑斑，灰白處處可見，單係用水及「牛力」在捽根本冇用。呢個時候只需要切兩塊檸檬，在水漬位置來回擦幾下，再用清水濕布抹乾後，水喉或鏡面就好似新買的一樣「立立令」！

3.無痕去印墨魚骨

價錢：＄5/塊（約手掌大少）

墨魚骨？墨魚都有骨？對，其實墨魚有一塊手掌大小的骨，本來作中醫藥用，另一最廣為人知的用途就是磨粉餵雀仔。此外，佢仲係一個去印不留痕的神奇天然擦！筆者用它來擦乳膠漆牆身上的黑色痕跡，輕手一擦即甩；擦雪櫃的貼紙餘膠漬，來回擦兩擦就冇晒。兩者均不留痕，表面只留下骨鈣的粉末，絕對好過沙膠或報紙！但留意，對附霉菌漬及水鏽等頑固污漬就無用武之地。

4.白醋去味兼去霉

價錢：＄10/支

白醋除了上文所述加梳打粉同用外，其本身亦具有去漬功能，如牆磚之間的黑色霉菌及水漬等都可以去除，只要在漬上鋪上紙後，再倒上白醋「醃」大概十至廿分鐘，再用牙刷擦就可以去漬！另外，白醋亦是去除異味的高手，廚房內「百味紛陳」的微波爐就最啱，倒入白醋叮一叮後，異味全消！