增加患冠心病風險！十大高反式脂肪食物要留心
撰文：林斌(原文刊於：Sunday Kiss)｜相片：新傳媒｜資料來源：食物安全中心
反式脂肪源於高溫油炸及起酥油
反式脂肪屬脂肪一種，約有15% 的反式脂肪是天然的，常見於在奶類及肉類中；而另外85% 就屬人工的，不飽和脂肪如植物油，經工業氫化後製造出半固體及固體狀脂肪，它又被稱為「氫化植物油」或「起酥油」，而是次事件主角的「人工反式脂肪」，就是源出於此。另外，以極高溫把油加熱及煎炸食物亦會產生出反式脂肪。
反式脂肪有壞冇好
上述提及的「氫化植物油」本是較健康的不飽和脂肪（植物油），但卻因氫化時產生出高含量的反式脂肪，所以令它對身體的壞影響比飽和脂肪（如動物油）更加大，因為反式脂肪會增加體內「壞膽固醇」量，兼會減少「好膽固醇」量，大大增加患冠心病的風險。
十大高反式脂肪食物
第一位（並列）
咖喱 /吞拿魚酥皮卷
平均反式脂肪含量：0.70克（每100克計）
第一位（並列）
牛角酥
平均反式脂肪含量：0.70克（每100克計）
第三位
淨牛油蛋糕
平均反式脂肪含量：0.50克（每100克計）
第四位
芝士蛋糕
平均反式脂肪含量：0.44克（每100克計）
第五位
曲奇
平均反式脂肪含量：0.33克（每100克計）
第六位
椰絲奶油包
平均反式脂肪含量：0.31克（每100克計）
第七位
雞批
平均反式脂肪含量：0.30克（每100克計）
第八位
瑞士卷
平均反式脂肪含量：0.29克（每100克計）
第九位
酥皮忌廉湯
平均反式脂肪含量：0.28克（每100克計）
第十位
蛋撻
平均反式脂肪含量：0.22克（每100克計）
相關文章：
日本最新研究：雞蛋高膽固醇係誤解！｜日日食可減肥、護肝、防老人痴呆
由好細個開始，都不停被告知一日只可以食一隻蛋，因為雞蛋好高膽固醇，令鍾愛食蛋嘅小編只好做定老來中風嘅覺悟繼續食！但係，到今時今日，先至有研究指出，原來食蛋高膽固醇只係一個誤解！雞蛋仲要營養值超級豐富，簡直一次過滿足你3個願望！
原文：新假期｜撰文：Carmen｜圖片來源：《林修の今でしょ！講座》
1｜雞蛋迷思：食得多會高膽固醇？
日本醫生表示，其實膽固醇係分有好、壞功能，但世間偏向放大壞功能方面嘅影響，而經常避免吸收膽固醇。事實上，吸收過多膽固醇的確會因為停留喺血管壁，而導致動脈硬化，但同時，膽固醇亦都係製造體內約60兆個細胞嘅細胞膜所必要嘅材料，適量攝取膽固醇係有需要架！
醫生亦指出，血液膽固醇嘅來源30％來自食物，70％來自肝臟分泌，而且肝臟嘅分泌量會自行調整。換句話說，從食物而來嘅血液膽固醇較多嘅情況下，肝臟就會分泌較少血液膽固醇，反之亦然。所以體內嘅血液膽固醇數值，相比起一餐食咩，更多數係取決於肝臟嘅運動。
之前曾有個醫學調查，搵來1星期都冇1日會食蛋、1星期1~2日會食、1星期食3~4日、同幾乎每日都食蛋嘅人進行血清總膽固醇濃度比較，發現數值相差只有極少數！咁點解會有食得多雞蛋會高膽固醇嘅說法呢？
一切都係兔仔嘅錯?!
追溯番100年前俄羅斯學者所做嘅動物實驗，將膽固醇餵畀兔仔食之後，出現咗動脈硬化症狀，並因而斷定膽固醇會對人體有害。然而，呢個就係所有誤解嘅開端⋯⋯
兔仔係草食性動物，本來就不具備分解膽固醇嘅身體功能，就因為無法分解，先至會引致動脈硬化症狀，對人體其實冇咩影響。
醫生話，因為已經過咗100年咁耐，一個說法一旦被固定化，要推翻就好難，日本厚生勞動省成功推翻說法係2015年嘅事。雞蛋，就咁被一隻100年前嘅兔仔冠上咗「唔健康」嘅罪名⋯⋯
咁⋯一日可以食幾多隻蛋呢？醫生指從飲食中攝取膽固醇嘅限制目標數值，其實係冇上限架！由飲食導致血液膽固醇量提高嘅呢個說法，原來係冇科學根據！即使食雞蛋，血液膽固醇值都係唔會有變化。不過考慮到飲食平衡，醫生建議一日食三隻雞蛋係最適量。
2｜雞蛋可活化腦部？
眾所周知嘅腦退化症，係由於一種稱為乙酰膽鹼嘅物質含量減少而引致嘅，蛋黃中就含有稱為膽鹼嘅物質，可有效減低腦退化症嘅發病機率。
除雞蛋以外，都有唔同食物係含有膽鹼成分嘅，但雞蛋中嘅含有量最為豐富，2隻雞蛋已經好比1塊330g嘅牛扒！
而且日本好多雞農會喺雞糧當中加入「魚粉」，用沙甸魚製成DHA含量豐富嘅魚粉，再餵給雞隻，DHA嘅營養值就會轉移到雞蛋裡。DHA可有效提升認知能力、專注力、計劃同解決問題技巧，對腦部幫助非常大！
3｜蛋白蛋白質可燃燒脂肪?!
據最新研究指，蛋白蛋白質係具有減肥效果！唔單止可有助燃燒脂肪，更可有效抑制脂肪於肝臟形成，最新嘅動物實驗亦指出蛋白蛋白質有助對抗代謝症候群，幫助形成肌肉。
專家表示雖然配合運動一齊做可提升肌肉形成嘅效果，但單單只係攝取蛋白蛋白質便可促進肌肉形成。
有數據指出，持續每日攝取20g蛋白質，3個月後去除脂肪部分唔計，包括肌肉計算嘅結果中，觀察對象嘅老人家體重增長咗1kg。但由於高齡者較難增生肌肉，所以專家推薦高齡人士每日攝取30g或以上蛋白質較好。
話就話叫蛋白蛋白質，但蛋黃都係好緊要架！調查發現，相比只食蛋白，食全蛋營養更豐富，肌肉嘅合成反應比只食蛋白高出30％！明明係同等份量嘅蛋白質，因咩差咁遠呢？係因為蛋黃有豐富嘅維他命D，食全蛋有效防止肌肉老化。
食雞蛋嘅時機
專家指出，運動前唔應該食嘢，因為會令血液無法送到內臟，容易引起消化不良嘅症狀。食雞蛋嘅最佳方法係：1）同米、麵等糖質一齊攝取(糖尿病患者需徵求醫生指示)、2）運動後先食。
4｜大眾對雞蛋的各種迷思
生雞蛋拌飯嘅食法
日本人好鍾意食生雞蛋拌飯，相信唔少人去到日本，都有興趣試一試日本雞蛋有幾新鮮美味，原來佢嘅食法都好講究架！頭先講咗咁耐雞蛋嘅營養價值，原來正確食用可防止皮膚同頭髮老化！
重點1：不要拌勻
蛋黃中含有嘅生物素對皮膚同髮質好，但蛋白中含有嘅抗生物素蛋白會妨礙生物素嘅吸收，將雞蛋打勻會令營養流失！
重點2：飯量充足且夠熱
蛋白中含有嘅抗生物素蛋白可經由熱力破壞，而飯量夠多嘅話就可以產生足夠嘅熱力，更容易破壞抗生物素蛋白，保留蛋黃嘅營養值。
而營養師就推薦用紫菜做生雞蛋拌飯嘅topping。因為雞蛋冇食物纖維同維他命C，而紫菜就剛好補充咗呢啲營養。
雞蛋中白白地色嘅係咩嚟？
雞蛋中白色嘅紐狀物其實係卵黃系帶，含有良性蛋白質之餘，仲有抗癌藥中會出現嘅唾液酸成分，醫生推薦食埋佢！下次食雞蛋唔好挑走佢啦！
烚蛋層薄膜食唔食得？
你有冇試過烚完水煮蛋，剝殼時仲有層薄膜黏住，好難撕又唔好咬口？原來嗰層膜叫蛋殼膜，根據最新研究，呢層膜可有助抑制炎症，同有效改善肝機能，建議大家食埋佢！
雞蛋有冇腐壞？應該點保存？
醫生教你唔使打隻蛋出嚟，就可以知道隻蛋仲新唔新鮮嘅方法：將雞蛋放入鹽水。如果隻雞蛋放得太耐，已經唔新鮮嘅話，佢會因為蛋內有空氣而浮於鹽水上，而新鮮嘅蛋會向下沉。
雞蛋底部較圓嘅部分稱為氣室，係雞蛋進行呼吸嘅部位，要保持雞蛋鮮度嘅話要將較尖嘅部分朝下擺放。如果將雞蛋上下翻轉，較尖嘅部分朝上擺放嘅話，蛋黃下沉會阻礙呼吸，令雞蛋加速劣化。以後買蛋記得要留意啦！
