網友買豬扒包有被騙感覺 怒斥：香港仲有無老實商家！

撰文：東方新地｜圖片：PLAY HARD玩硬Facebook

網友買豬扒包有被騙感覺

日前，有網友於社交網群組發文，指自己於銅鑼灣一間餅店買咗個豬扒包，但就質疑該店嘅豬扒包有偷工減料之嫌！從網友上載嘅照片所見，豬扒睇起來比外面塊麵包仲要厚。

但點知一咬落去，原來炸皮裏面只得一塊薄薄嘅豬扒！一啲厚度都冇，唔講都差啲認唔出呢塊係豬扒！

樓主留言指店舖「豬肉紙飽充豬扒包」，「雖然我讀得書少，你都唔好呃Ｘ我 ，其實E（依）家香港地仲有無老實商家」。

網民反應兩極

網民睇到相後隨即留言，但反應兩極，有人就笑指塊豬扒係「薄炸」、「薄切黑豚肉」，有人就話「$18蚊係咁上下㗎喇 !」，亦都有網民指重點係餅店將豬扒「裝假狗扮厚」！

同時，亦有唔少網友大讚廚師刀功了得，今次真係睇你點睇啦！但有樣嘢都可以幾肯定，就係食完應該會有食唔飽嘅感覺，唔知發文者當時有冇同感呢？

據了解，該餅店表示曾因有客人投訴豬扒唔夠熟，所以廚師先至會將豬扒盡量打薄，令豬扒落炸爐後更易熟。話雖如此，但唔知廚師會唔會覺得薄咗啲呢？