直播家暴求救 馬拉女模有時間直播 冇時間報警？
廣告
依家有啲人真係呃like大於一切，遇到危險，竟然唔係報警而係開live求救？話說馬來西亞模特兒兼知名DJ林雲(Leng Yein) 同細8歲嘅律師男友Peter交往2年間，不斷受男友恐嚇同家暴。有日佢突然開直播求救，不斷嗌「男友要打我！」。雖然最後獲救，但令人疑惑嘅係，點解佢會選擇開直播而唔係即刻報警呢？
林雲之前經常喺社交網站晒恩愛，外界仲以為佢愛情好美滿，點都諗唔到背後會咁恐怖！
話說佢之前突然喺Facebook直播求救，話男友要打佢，期間仲不斷聽到撞門聲。最恐怖係男友行到窗後望住佢嘅一舉一動，好似睇緊恐怖片咁⋯⋯
其實直播一開始，林雲望住鏡頭正準備講野時，鏡頭就黑咗，兩分鐘後佢對著鏡頭話：「我今天跟你們講一件事，剛剛下飛機回家就和男友分手了，他一直打我手機，還要進來（房間），我把自己鎖住…我被他打到頭破血流很多次，2年以內我已經忍夠了，他現在不離開我的家，每天都在恐嚇我…我等下還要飛檳城，現在被人恐嚇出不去。」
而直播期間，男友突然係外面大叫，瘋狂咁撞門，林雲即刻擋住！又不斷做口型求救，神情相當痛苦。
但直播突然中斷，過咗一陣佢又喺Facebook話：「他鎖了我的wifi，救我，Helpme」過程真係好似恐怖片咁，但好彩最後都冇事。
其後，林雲喺Facebook放咗呢兩年被打嘅相，話係同律師男友拍拖兩年間不斷受到對方施暴同威脅，而佢一次又一次咁原諒，催眠自己男友會改過，點知最後竟然⋯⋯
其實律師男友Peter係慣犯！有爆料話佢以前都打過其他女友。真係人不可貌相，你點都估唔到身為律師嘅佢，竟然咁衣冠禽獸！
