憤怒新抱數盡惡頂奶奶尖酸史 大控訴：仲叫孫仔食狗屎！
原文：Sunday Kiss｜撰文：東方新地、Joanne｜圖片：ViuTV截圖
新抱數盡惡頂奶奶尖酸史
ViuTV節目《晚吹-又要威又要戴頭盔》，繼續請嚟8個港媽新抱，大數奶奶不是！未聽過又未係估唔到，原來呢個世界真係有啲咁嘅奶奶！
新抱C：奶奶對金錢觀念好恐怖！
「佢最鍾意去比較你搵幾多錢，佢個女搵幾多錢，隔離屋個新抱搵幾多錢！又話的姑奶搵幾多錢，你呢啲正廢柴！ 冇用嘅！搵咁少錢！」
去到呢啲位，點可以唔同個C6呻吓！「有一日，我真係忍唔住同我老公講，其實我搵幾多錢，關你阿媽咩事呢！我養我阿媽，你養你阿媽！我係唔會畀錢佢嘅！」
新抱E：佢叫我個仔「食屎狗」！
「我奶奶會叫我個仔做狗，啲老人家好鍾意，即係驚啲細路湊唔大，就會叫啲細路做阿狗咁樣！『阿狗，我哋出街掃屎食咯！』我每次聽到都會好嬲！」
「我會出聲㗎！『你可唔可以唔好咁講！』佢完全唔理我㗎！『我哋出去掃屎食咯！』頂！你叫我個仔做「食屎狗」！咁即係點啫！」新抱仲話奶奶屢勸不聽，令佢非常氣結！
新抱G：話自己生幾個仔 唔識湊女！
「我奶奶因為自己生咗幾個仔，所以當的抱住個BB返到嚟，佢就同我講：『我唔識湊女㗎喎！』有次我見到佢幫我個女沖涼，攞住條紗巾喺度刷，我話：『細力啲呀，個頭好幼嫩㗎！』佢就話：『我幾個仔都係咁刷㗎啦！有咩問題呀！』
「又話：『我哋細個食嗰啲馬利餅加水，就係奶水嚟㗎喇！邊有而家咁幸福，飲奶粉！二、三百蚊罐！』我咪話：『而家年代唔同喇！奶奶』」
新抱D：冇得生都有嘢嘈！
「唔好彩小產過兩次。第一次有咗我就話返外家休養，咁佢就話：『好呀好呀 ！你返去等你阿媽照顧你啦！我唔識煲嘢畀你食！』到後尾唔好彩冇咗，我梗係又返阿媽度，因為情緒唔係幾好，佢又係呢句：『你返你阿媽度啦！我唔識照顧你㗎！』」
「後來想調料，就帶埋個老公一齊去睇中醫。咁我沖中藥，一齊沖埋畀我老公飲，咁佢就好震驚：『點解佢要飲呀？佢咩事呀？』因為佢哋個年代就會覺得，冇仔生一定係你呢個女人有問題，實唔關自己個仔事嘅！」
新抱A：肥人學咩人生仔！
「我都有一次小產嘅經歷，我懷疑係得奶奶導致添！啱啱發現有BB，佢已經企得好硬，『我係唔會同你湊！』但係我都冇要求過佢幫我手。」
「直到流產咗之後，佢就話：『其實你都唔係有㗎啦！你嚟咗場M，只不過遲咗嚟咁解啫！』佢仲要講咗句：『肥嘅人係唔配生BB㗎！』個心好難受，而定努力中都唔敢畀佢知住，費事又講啲咩啦！」點解可以咁都講得出口！
新抱B：嫌我學歷低
「我老爺成日話我讀到中五，學歷低，配唔起佢個仔，佢話佢個仔係大學生！我就因為佢呢句說話，走去由High-Dip讀起！」
「佢成日以為佢個仔養我，去旅行就覺得係我用佢個仔啲錢，佢就會話：『而家啲女人唔可以靠男人養㗎喇！自己買禮物畀自己會開心啲！實質佢自己成世都係靠老爺養！』唔知佢咩心態，總之佢個女攞男朋友家用就得，佢個仔啲錢就去晒我度，好委屈！」
新抱C：佢連我屋企人都踐踏埋！
「佢試過打電話畀我阿爸阿媽，話佢哋：『你唔識教女！你個女搞到我個仔咁呀，對我又冇禮貌呀⋯⋯』咁我阿媽就問佢：『而家佢係咪入門口唔叫你？見到你就打你兩巴？係你就同我打佢一身，趕佢出門口！』我老公知道呢件事之後，都回贈咗佢好多句粗口！」講還講，有咩可能話埋人哋父母！
「佢私底下又同我講番：『你阿爸阿媽就要尊重，我你就唔使尊重！我係你奶奶呀！5、60年代，你入門口要同我鞠躬呀！』咁我就心諗：『而家咩年代呀！幾時先要同人鞠躬呀？你係咪真係咁想我同你鞠躬呀！奶奶！」
呢啲位靠老公？
老婆梗係想有老公撐，但係唔係個個老公都係咁精叻嘅隊友！有時加多把嘴，反而令一眾新抱更加勞氣！
情況一：佢自己搞得掂，就會鬧番個奶奶，搞唔掂就會話：「你唔好搞咁多嘢啦！你咪忍吓囉！」
情況二：自己閂埋房門同老公呻，呻完就算，始終後輩應該要忍讓吓。
情況三：同老公傾完，等佢再私底下同婆婆傾。因為如果老公當住新抱面鬧奶奶，奶奶可能會更加記恨，喺老公唔喺度嘅時候，就會對新抱更差！
新抱的霸氣
正如文章開頭所講，婆媳之間嘅矛盾， 好多時係源於有個阿媽覺得自己畀另一個女人搶咗個仔？新抱好多時被奶奶視為「狐狸精」！
對於呢個問題，新抱們就顯得霸氣！「咁你個仔揀我都冇計㗎！」一句說話，完美將呢個「小三論」K.O.！
唔好畀奶奶太得閒！
另一個結論就係，好多時係啲奶奶太得閒，好多精神去將幻想嘅嘢當成真！鍾意煲韓劇，成日當咗自己係劇中畀死毒新抱蝦嘅奶奶！
所以唔好畀佢咁得閒，可能就唔會將啲仇恨轉移到新抱身上！
最後有咩想同奶奶講？
結果，有新抱竟然好夠薑咁講咗句：「食屎啦！」嘩！呢位新抱認真夠哂大，無他嘅，帶咗頭盔呀嗎！
主持最後問新抱們：「如果你哋第日做咗奶奶，你估會點？」有新抱就話：「我會做番我奶奶做過嘅嘢！」睇嚟「婆媳大戰」真係會不斷咁延續落去⋯⋯
