姊弟戀不是問題！盤點戀上姐姐的6大優點
text-ivy photo-instagram source-新Monday
姊弟戀的6大優點
1/經濟獨立
擁有一定的經濟能力，絕對是姐姐系女友一大優點。試想一下，拍拖時，男士不用一人全數付款，AA制或一人一餐，其實真不錯，至少拍拖的消費壓力不會只落於一個人的身上，而是一同分擔，都幾fair！
另外，由於姐姐系女友賺錢能力大都不弱，對物質的追求可以自給自足，遇心頭好，自己買多於求人，令男友不用承受經常被女友「嗲買嘢」的悲慘經歷。
2/充足的私人空間
她可能比你更忙！姐姐系女友的生活一點都不悠閒，工作、家人、朋友等等，都已經佔據了她很多的時間，所以與她拍拖，你不用怕需要日日相伴，又或無間斷24小時on call。
她還會鼓勵你結交朋友，建立事業與興趣，完全無需擔心因拍拖而失去私人空間與時間。
3/思想成熟
她不再是18、22的少女，經歷過職場上的磨練，人生的不同閱歷，她思想變得成熟，待人處事都有其想法，不會2、3個月就跟你哭訴工作辛苦，喊着轉工，但不付諸行動。
她亦不會因小事就哭鬧一場，要你待她如公主般「呵返」。另外，當遇上工作、人事問題時，你亦可放心與她傾訴，她能理解明白，給予你不錯的意見，成為你生命裏的知己、聆聽者。
4/懂得照顧人
撒嬌，並不是女士的專利，其實男朋友有時都會如小朋友般，特別是心情不佳或生病時，愛向女友撒嬌，希望得到她的照顧與寵愛。
故此，姐姐系女友的好處，就是經常給予男友這種感覺，照顧他、關懷他，讓他時刻深醉於被愛之中。
5/玩夠
玩夠，這點實在太重要！小編不下一次，聽到身邊的男性朋友埋怨自己的女朋友「未玩夠」，仍愛clubbing、飲酒、玩通宵……經常都有「仔仔」埋身，令到男友沒有安全感。
6/有危機感
隨着年紀日長，女士們的危機感會愈來愈高，但這不代表她會卑恭屈膝地完全遷就你，她們只是不輕易說分手，又或以分手作為威脅。
商量與溝通，是與姐姐系女友相處的模式，不會三日一少吵，五日一大吵，個個月喊分手，如此煩！
延伸閱讀：
盤點8對娛樂圈姊弟戀 年齡從來不是問題！
｜鄧麗欣、邱勝翊
今個月就爆出今年35歲的鄧麗欣（Stephy）與29歲前台灣男團Lollipop棒棒堂成員邱勝翊（王子）戀愛中，而日前Stephy亦終於大方認愛！
據了解，呢段相差6年嘅戀愛原來係因應采兒而起，皆因應采兒約飯局令二人認識。換句話，應采兒穿紅線，撮合咗王子同Stephy一齊！
雖則呢場姊弟戀相差咗6年，但Stephy有信心話依家都2018年，大家接受能力都好高，叫大家畀啲空間佢哋咁話。
而唔少雙方嘅粉絲都係留言祝福Stephy同王子，雖然未知二人最終能否步入教堂，但聽到呢個消息，小編都為佢哋感到好高興！
｜陳自瑤、王浩信
今年即將37歲嘅陳自瑤(YoYo)同35歲嘅老公王浩信都係姐弟戀，二人於2011年結婚，翌年YoYo誕下一女。
雖然二人最近就傳出7年之癢嘅婚變傳聞，但早前YoYo就表示兩公婆並無離婚，亦無分居，仲以「老夫老妻」嚟形容自己同老公王浩信嘅夫妻關係！
｜蔡少芬、張晉
今年45歲嘅蔡少芬大過老公張晉1年，二人於2008年結婚，其後於11年及13年誕下女兒張楚兒及張信兒。
唔經唔覺二人已結婚十年，一家人亦不時於個人社交網分享溫馨家庭照，認真sweet爆！
今年張晉44歲生日，蔡少芬就肉緊錫錫老公，真係好閃呀！
兩公婆仲會喺囡囡生日會上，大扮獨角獸，認真有童真！
｜謝安琪、張繼聰
而家41歲嘅謝安琪（Kay）就大老公張繼聰3年，二人喺2007年結婚，分別育有11歲嘅囝囝張瞻及1歲嘅囡囡張靖。
眾所周知，呢對夫婦最愛喺個人社交網po相兼互相留言，猶如指定動作，打情罵俏咁放閃，可謂係佢哋嘅日常情趣！
｜楊怡、羅仲謙
今年39歲嘅楊怡就同老公羅仲謙相差5年，因拍《On Call 36小時》而擦出愛火，譜出姊弟戀，拍拖五年後，於2016年結婚。
婚後，楊怡基本上養尊處優，做個幸福人妻，近年少咗喺公仔箱出現。
今年34歲嘅羅仲謙可謂一名「愛妻號」，唔洗接job嘅時候就同老婆、岳母、媽咪、家姐一齊去旅行，名副其實係位愛屋及烏嘅好男人！
｜楊千嬅、丁子高
44歲嘅楊千嬅大過老公丁子高5年，二人於09年喺美國拉斯維加斯秘密註冊結婚。
結婚第3年後，兩人迎來首個「愛情結晶品」，千嬅誕下兒子丁進諾，依家已經6歲啦！
有個歌手老婆嘅丁子高一有得閒就會現身撐老婆演唱會，丁子高亦曾於千嬅演唱會中與老婆對唱，令老婆冧爆！
兩公婆平日有時間亦會一齊做運動，又去下旅行，放鬆身心，大家都有共同興趣，難怪無懼年齡差異啦！
｜鍾欣潼、賴弘國
今年，37歲嘅鍾欣潼（阿嬌）與33歲有「醫界王陽明」嘅台灣整形醫生賴弘國結婚，令呢段姊弟戀兼異地戀成功開花結果！
二人於洛杉磯五星級酒店舉行的婚禮中，阿嬌多次喜極而泣！
二人年齡相差4年，平日雖然較少po出合照，但偶已亦會上載甜蜜合照！
｜鍾麗緹、張倫碩
今年48歲嘅鍾麗緹雖然曾經有過兩段失敗嘅婚姻，但亦無懼之前經歷嘅婚姻失敗，2016年決定與年紀比佢細12年嘅內地男演員張倫碩結為夫婦，並於北京舉辦婚禮。
據知，鍾麗緹與張倫碩因合作拍攝真人秀節目，而日久生情！
張倫碩與鍾麗緹雖未有親生仔女，但佢亦好錫老婆與前夫所生嘅女兒，大家相處非常融洽，經常四圍去旅行遊玩！
