上司針對 豪宅保安𢭃唔到利是 一支公抗議兼企圖跳樓！

圖文：潮文社｜ 編輯：東方新地

喺跑馬地豪宅樂景園當值嘅一個保安，因為年初一被安排在停車場貨𨋢工作，搞到一蚊利是都收唔到，佢嬲到震之餘，仲單人匹馬帶埋大字報去抗議。呢位保安企咗喺灣仔合和中心門口簷篷上面聲稱要自殺，搞到出動警察同消防。10幾分鐘後，佢被勸服返落地面。

呢位57歲嘅保安接受記者訪問時，心情依然好激動。佢話如果上級公平地安排各同事過年期間輪流當值，收唔到利是都心甘命抵！但佢認為自己係被主管針對，原因係今次被調派嘅崗位，以往從來冇人喺嗰度當值過喎。

保安解釋指，之前佢因為巡樓時跌倒，令左腳骨折被判工傷，之後一直放病假休息。直到上年年頭，腳傷有好轉先復工，而上年新年佢就總共收到大約萬3蚊利是。不過，返咗一個月工再次因腳傷復發要請病假，直到今年1月先返工⋯ 加上原本上司竟然安排佢初一至初八之間放6日假，佢反映不滿後，就多咗初一同初四兩日返工，不過就被安排到停車場守貨𨋢，唔好話收利是，全日連一個人都見唔到⋯

合和實業回應指有員工因不滿工作向上司反映過，同埋安排公司有規定，任何員工不可以主動向住客收取利是。睇到呢到都唔知邊個啱邊個唔啱啦⋯

消息來源：蘋果日報