香港人在北京｜蔡潔晒玉背借醉吻展鵬揭祕皮膚白滑祕密孖戴祖儀黑雙煞獻聲
由鍾澍佳總監製、黃國輝監製、陳翹英編審的台慶劇《馬百良安宮牛黃丸呈獻：香港人在北京》，逢周一至五晚 9 點半翡翠台播映。昨晚（24 日）播出的一集，劇情講到蘇菲（蔡潔飾）陪同港仁（陳展鵬飾）去珠海傾生意，後來蘇菲飲醉酒獲港仁送回酒店，對港仁餘情未了的蘇菲借着酒意告白：「點解你當年要失約，如果你有嚟到嘅話，我哋世界就唔同晒…」蘇菲說罷情不自禁吻向港仁，而身為愛妻號的港仁最終把持得住，用手指放在嘴前拒絕蘇菲獻吻！
講到該場床上獻吻戲，蔡潔受訪時坦言沒有尷尬：「大家都係專業演員，嗰場主要係講個氣氛，大家都係盡力去演出嗰場戲嘅氛圍，展鵬厲害之處係唔會令你緊張，我哋喺輕鬆嘅氛圍下完成拍攝。」蔡潔坦言獲悉與展鵬合作時，曾經擔心招架不住：「因為我嘅角色要 Lead 住佢嚟行，我喺度諗佢氣場咁勁，我得唔得㗎？而展鵬喺劇中對住我同吳若希都係處於下風，但佢 Carry 得好好，演到港仁嘅可愛同天真面，一出場就會 Catch 到大家嘅眼球，但又唔會太鋒芒畢露，我終於領教到視帝嘅功力。」提到大露背晚裝大晒白滑玉背非常搶 Fo，蔡潔笑言：「我都覺得個造型好靚，其實嗰件晚裝上半身只係得一塊布，但出嚟效果好靚！」談到美白和健美心得，蔡潔大方分享：「我以前好鍾意飲牛奶，可能同飲得多牛奶有關係！同埋我幾喜歡練背肌，但唔係練大隻嗰種，練背肌除咗可以保護脊椎令到女士線條更凸出，仲可以令到塊面更 Firm。」
另邊廂 Helen（吳若希 Jinny 飾）誤打誤撞下，為姑仔寶怡（戴祖儀 Joey 飾）擔任了幕後和音，從而被張帥（梁漢文 Edmond 飾）發掘歌唱天賦，邀請她參加踢館賽，造就兩姑嫂同台！今晚（25 日）播出一集，Jinny 和 Joey 將會合體獻聲，以型格「黑雙煞」造型獻唱《Crying》，兩人一唱一和非常合拍，張帥最終選了Helen 做學員，惹來寶怡醋意爆發！今晚 Jinny 和 Edmond 將有一場拍攝宣傳照場
口，惟要近距離接觸的兩人全程怕怕醜醜，最終更仆倒收場。
拍劇有助增加自信開個唱？
講到劇中有不少唱歌場口，Jinny 受訪時透露：「喺未拍呢套劇之前，我係未試過企喺一個咁大嘅舞台演出，所以有好多唱歌場口真係有一種開騷嘅感覺。而開完呢套劇之後，我先夠膽開屬於自己嘅個人演唱會，呢套劇喺唱歌事業方面真係幫咗我。」提到與前輩 Edmond 合作，Jinny 大讚說：「佢親和力好強，同佢做對手
戲唔會好驚，同埋佢會令到我好想同佢傾偈，合作得好開心，好似多咗個哥哥咁！」
