寵愛PetPet｜驚喜連連BigBoss毒狗案林夏薇遭襲擊還有孫慧雪醜女大翻身
由陳耀全（Andy）監製、黎家明編審的《寵愛 Pet Pet》，逢周一至五晚 9 點半翡翠台播映。昨晚（9 日）播出一集，毒狗案 Big Boss 終於揭曉，原來是李君妍飾演的唐利華！汪聲仁（周嘉洛飾）和金惠婷 Paula（林夏薇飾）發現利華有古怪，經暗中追查發現利華是殺狗兇手，利華被揭穿後發難擸𠝹刀襲擊兩人，過程中 Paula 不慎被劃傷手，幸好警察及時趕到將利華繩之於法。原來利華四出放毒罐頭殺死浪浪（流浪狗），是因其愛犬晴晴曾被流浪狗咬傷，晴晴後來透過阿仁向利華剖白，原來當日是因牠太百厭才會被咬傷，並謂曾吃下毒罐頭試圖阻止利華再傷害其他狗狗，利華知道真相後崩潰爆喊。
講到今次飾演毒狗兇手，君妍坦言事前做了不少準備功夫，因為本身沒有養過小動物，要靠幻想才能代入角色，她說：「我將狗狗轉化為親人咁去幻想，好彩劇入面有啲我同狗狗互動嘅 Flash Back 場口，變相之後嘅喊戲我可以諗番個畫面去入戲。」講到爆喊戲，君妍謂非常感激嘉洛幫忙帶入戲：「鏡頭 Take 我反應時佢負責講對白，就算鏡頭影唔到佢，佢都會好有感情咁去講，而唔係好 Hea 咁，咁樣出嚟效果會好大分別，佢係一個好好嘅對手。」
提到拿着𠝹刀與薇薇對峙場口，君妍透露：「同薇薇好耐之前已經合作過，大家都好 Friend，拍攝前大家都練習咗好多次確保安全，因為我哋都好信任大家，所以都好放膽去做嗰啲動作。」至於最難忘的事，君妍透露：「拍呢場戲時其實好熱，加上我全身着晒黑色嘅衫，喺山頂上又冇瓦遮頭，係冒住中暑危機去拍呢場戲！」另監製 Andy 透露嘉洛每當拍攝動作場口時便會啟動認真 Mode：「佢平時拍文戲時會表現得輕鬆啲，但佢一接觸動作場口時就會好認真，好專心去聽武指講解拍攝嘅動作。」
感激監製 Andy：佢好留意每一個演員
對於獲不少網友讚靚女，君妍笑言：「好多謝大家嘅稱讚，證明我好勤力咁保養係冇白費。其實除咗靚之外，我都希望觀眾留意到我飾演嘅角色，係花咗唔少心思同努力。之後拍咗幾套劇都係我未試過嘅角色，希望大家繼續留意我嘅演出。」她亦很感謝監製 Andy 對她信任：「今次個角色好有挑戰性同發揮，佢睇到我另外嘅一面係我自己都睇唔到嘅，好多謝佢畀機會同相信我係做得到，原來佢係好留意每一個演員。」昨晚另一位女神孫慧雪亦驚喜客串，她還帶上愛犬 Moji
一同演出。雪雪在劇中上演醜女大翻身，由 Hea 爆宅女搖身變成索爆女神，而Moji 亦會一同大變身，由污糟狗變靚狗，場面搞笑。
