YoYo埋怨冇時間陪 王浩信 承諾送樓補償
王浩信 一年冇放假
33歲的王浩信去年在劇集《EU超時任務》中的渠頭一角，成功感動觀眾，一度被網民捧成視帝大熱，雖然最後只與同劇的朱千雪在台慶頒奬禮中獲「最受歡迎劇集搭檔」獎，但人氣、演技備受肯定！之後在《致命復活》及現時《不懂撒嬌的女人》中亦有突出表現，自然被無綫力捧，劇集一套接一套，日夜顛倒拍劇開工，成年未放過假！
YoYo眼見老公辛勞為家庭為事業拼搏，總算捱出頭來，身為太太開心之餘亦心痛！同為藝人的YoYo當然明白上位機會難逢，但作為老婆又想老公多啲陪自己，據知佢有時都會搵啲姊妹呻吓話好耐冇同老公去拍拖，屋企事要獨力處理好吃力。
YoYo：劇情還劇情
早前YoYo出席活動，本刊記者提到王浩信套《不懂撒嬌的女人》好hit，佢就話知道套劇好受歡迎，好多人鍾意老公個暖男角色。不過佢就大潑冷水話暖男形象同真實生活唔可以混為一談，劇情還劇情，生活還生活。雖然王浩信平時都有暖男的一面， 卻因近來太忙，二人世界變為近乎零！
一年一度旅行告吹
王浩信同YoYo以往每年都會放下女兒拍拖去旅行，但如今王浩信啲劇接住落，由上年開始到依家完全冇停過，所以大有可能告吹！ 為了補鑊，王浩信不時都會做啲浪漫嘢，例如即使佢煮嘢食唔叻，佢都會親自落廚去學嚟煮﹗
王浩信 計劃一家三口旅行
老婆有怨言，暖男老公王浩信點會feel唔到，佢現時趕拍的《溏心風暴3》預計七月煞科，屆時會有三個星期假！日前王浩信接受訪問時，坦承自己比唔上Saving哥，因為呢一年幾不停拍劇，不單老婆和女兒，就連媽媽都少咗見。而為了補償家人，佢就計劃暑假時一家三口去一個兩三個星期的旅行，YoYo唔使失望啦！
買樓送俾太太
另外王浩信對置業一事密鑼緊鼓，有意於將軍澳區置業並落太太名，佢就表示不單想買樓俾太太，更希望買晒俾所有屋企人！王浩信又稱目標係買淺水灣豪宅，雖然他謙稱買住細單位先，但以佢現在的人氣，帶旺登台、廣告代言、商場event之搵錢機會，相信好快儲夠saving進駐淺水灣，目標不遠矣！
