Super Girls爭有米監製？ Heidi Yanny 姊妹反目

Heidi Yanny 姊妹反目

有消息指Heidi同Gareth早已2014年已經秘密拍拖，兩人更被發現一齊去台灣旅行，但Heidi當時死口唔認，一直維持地下情。但拍拖約一年後，有指Gareth難頂Heidi「港女」性格而提出分手。「被分手」後一直耿耿於懷的Heidi後來發現其好姊妹Yanny與Gareth撻着，嬲到即時取消follow Yanny個IG，姊妹情不再！

旅行「洩蜜」

上月Gareth生日，Yanny專誠陪男友到日本旅行慶祝，雖然佢哋並無上載任何合照，不過就有意無意上載當地風景照，同樣在櫻花樹下留倩影！

情侶鞋晒命

仲有眼利網民發現，Gareth同Yanny仲着埋情侶鞋…… 真係好sweet喎！

拍拖睇騷

上星期台灣歌手陳綺貞喺九展舉行演唱會，Gareth同Yanny一齊睇騷，仲各自上載咗同陳綺貞喺後台的合照！

早前Yanny去美國旅行，唔少心水清的網民識破佢同Gareth其實係身處同一地方，據知Gareth此行係想帶女友見家長，再介紹埋當地的親朋好友，似乎感情非常穩定！

Yanny日前接受傳媒訪問時，大方承認同Gareth拍緊拖，但話希望感情事保持低調，所以一直未有公開。講到Heidi unfollow自己IG，Yanny就話知道呢件事，但否認兩人係因為Gareth而反目，自己絕對唔係第三者。而公司為了力保Super Girls形象，已下令各人封口。唔知兩位好姊妹點收科呢？

全文完