Stephy獲黃百鳴全力捧 吳千語Out
香港女演員青黃不接，Stephy上位即被各大電影公司老闆碼到實，頭炮出招有天馬黃百鳴，加片酬成功簽下五套片約，包保Stephy今年做完大熱下年繼續有得入圍！
撰文：東方新地｜圖片：新傳媒圖片庫、Stephy FB
Stephy 簽天馬做一姐
邊個話女人三十結束十年情就係浪費青春、世界末日？34歲Stephy兩年前同十年男友方力申一分手，反而發力轉戲路，先告別大同小異葉念琛御用女主角愛情片系列，再不問酬勞連拍《空手道》、《藍天白雲》同《女仕復仇》三套獨立製作，套套演出都獨特瞓身令人眼前一亮。化失戀為演技全力轉型終有回報，三部演出都有口皆碑，《空手道》更成功捧到Stephy變今屆金像影后大熱。
不再獨沽一味做「阿寶」，Stephy戲路變廣戲約亦都接踵而來，繼去年獲黃百鳴邀拍《L風暴》同《九龍不敗》兩套大導大製作後，據知情人士透露黃百鳴對Stephy的專業態度及潛力甚為睇好，未選影后先加價，一簽就簽下五套片約：「男人戲拍得多，黃生覺得旗下欠個壓得住陣嘅影后人馬，最衰自己藝人吳千語演技未夠班，又因同林峯分手後，形象負面，人氣跌watt，黃生簽佢六年捧足六年回報唔成正比。」
知情人士續說：「所以黃生一邊減低千語產量、一邊再物色女主角人選，舊年Stephy突然發力證明自己可塑性好高，黃百鳴試完《L風暴》同《九龍不敗》兩套戲合作後，都覺得呢個女仔簽得過，合作計劃呢五套之後仲陸續有來！」機會多的是，Stephy奪影后指日可待！
連中三元
首次入圍金像獎「最佳女主角」五強，但Stephy已於年初連獲三個單位頒發最佳女主角大獎，演技突破成功有目共睹。
18年繼續發力
去年改戲路搖身一變演技派起個好頭，Stephy潛力除咗觀眾，導演同監製亦睇到，拍落大製作其實除咗《L風暴》、陳果導演的《九龍不敗》、泰迪羅賓的《八步半喜怒哀樂》之外，杜汶澤亦都落實暑假再為Stephy度身訂造新戲，來年影圈繼續係Stephy天下。
