ERROR自爆96小時｜193爆喊重提「153事件」承認一時衝動只想維護自己電視台

193去年反擊曾志偉一句而紅

193郭家駿@ERROR在去年無綫和ViuTV兩台電視大戰勢成水火時，因為反擊曾志偉評ViuTV收視只能媲美 J2，193不甘示弱反擊說「J2係做咩？冇記錯係咪40幾歲仲話後生仔傾偈嗰個？」仲稱呼無綫的觀眾為「老嘢」，結果引來兩極的批評，不過193人氣亦因此而急升。

193曾公開堅持率直個性

理直氣壯的193事後曾接受傳媒訪問，表示不怕見到無綫人會尷尬，甚至最想見到的無綫人是曾志偉，想親口對他說絕對唔係鬧任何人。當時亦有不少長輩批評193為人太囂張、對人沒禮貌、193回應時否認自己是寸嘴，只是性格直率。

節目中重提「153事件」 認輕挑無禮

經過一年的沉殿，193其實成熟了不少，昨晚播出的《ERROR自爆96小時》第2集，導演問193是否自從「153事件」後人生有了突變？193說：「係呀！好大轉變，我嘅人生同事業都唔同晒，其實我想講番點解會有153事件，我係輕佻，係好無禮咁講嗰兩句說話出嚟，因為嗰日睇完口罩小姐綵排，佢哋表演得好差⋯我好嬲，我唔係針對住曾生講，我只不過針對住⋯我係我個台嘅藝人，我覺得我台拍嘅節目好好睇，我想維護我個台⋯⋯你唔可以話我哋係小眾囉！你唔可以用你嘅觀點去話我個台唔好囉！」

193心痛同事為工作不眠不休

193愈講愈激動，仲崩潰爆喊續說：「我唔係針對一個人，我係針對緊嗰一句說話批評我哋個台…我入咗嚟幾年，好多人好努力做嘢…一日返廿幾個鐘工，喺公司瞓，所以嗰刻我聽到佢話冇人睇我哋，我好嬲，想維護我台先衝口而出，我都知我講錯咗…我真係唔係針對，佢係長輩，因為傳媒炒作，覺得我矛頭指向某一個人，我知澄清冇用…」

ERROR兄弟撐到底

193喊住解釋全因想維護自己公司，唔單止感動網民表示更加支持193，ERROR其餘三子亦向193表明心跡，就算他繼續衝動出事都會繼續撐兄弟，保錡仲話冇晒廣告都唔緊要，真係四兄弟一條心。

相關文章：口罩小姐│曾志偉借姜濤不遂指ViuTV走偏門冇收視 193@ERROR一句KO：佢哋畀啲老嘢睇㗎嘛！