Do姐玩體罰 扭陸永耳仔
廣告
「Do姐」鄭裕玲日前同「農夫」陸永、C君拉隊為新節目《Do姐有問題》宣傳，節目上邀請嘅嘉賓包括森美、朱千雪、岑麗香、陳煒同「泰國通」胡慧沖等都有現身助陣，現場見陸永因為講錯一句說話畀Do姐扭耳仔，問佢哋係咪成日畀Do姐扭耳仔？C君搞笑答：「通常會係掌摑多一啲！」
撰文：東方新地｜圖片：新傳媒圖片庫、Do姐IG
Do姐 開心添食五集
講到今次新一輯《Do姐有問題》最特別嘅地方，Do姐話係多咗好多旅遊資訊：「今次去咗好多地方，最開心係原定20集，未出街已經決定加多五集。」農夫更笑言今次再同Do姐合作，火花大到好似火災一樣，更「大膽」話對足Do姐咁多集有如身處「煉獄」︰「係練習控制情慾，因為要對住一個咁靚嘅人！」
「對住我哋係放棄」
過往節目中農夫經常激嬲Do姐，令Do姐發火，問到佢哋今次節目會唔會搞到Do姐好激氣？C君答：「點會激氣？對住我哋應該係放棄！」陸永就話：「我哋讚佢演技好再擊倒佢，咁算唔算激佢呀？」之後現場玩遊戲時，Do姐用完氧氣罩後諗住畀第二個繼續用，點知陸永彈出一句：「仲用得？」即刻畀Do姐狂扭耳仔！問佢哋係咪成日畀Do姐扭耳仔？C君搞笑答：「都唔係成日嘅，通常會係掌摑多一啲，扭耳仔就間唔中啦！」
有片睇：
忘記《流氓大亨》劇情
由Do姐主演的經典神劇《流氓大亨》最近正喺深夜重播，但Do姐話因為重播時間太夜，所以冇收睇，仲話：「我唔記得劇情，淨係記得最尾嗰場萬梓良喊足分幾鐘。」陸永賣口乖話：「我有睇，原來Do姐演得好好！」Do姐立即發火狂鬧：「你去死啦！咩原來！入面咁多位女主角演得最好係咪我先？」陸永即刻補鑊話：「戲入面有咩我都唔知，我淨係睇到你，嗰日我喺化妝間睇，大家都話你真係超晒班！」
