《BB來了》李佳芯加入「媽媽谷」老公黎諾懿聞之色變？
撰文：東方新地｜圖片：TVB截圖
《BB來了》前文提要：
｜李佳芯演女強人
《BB來了》中李佳芯(Ali)飾演一位名牌買手，平日食好著好兼經常出入高級場所，加上備受公司重用，故準備到巴黎受訓一年後，就可以平步青雲晉身管理層。
但點都諗唔到，當事業正值高峰期卻意外懷孕，並因為一個小生命的來臨，而需放棄一直所追求的一切，Ali在面對生理同心理極大轉變上，完美演繹出女強人忽然做媽媽忐忑不安心情！
完美演繹新手媽咪感受
李佳芯不禁向老公表現出對未知的將來感到害怕，並直言：「你知道我犧牲了多少嗎？你知道一個女人懷孕代表什麼嗎？係事業、身材、樣貌各方面即時All in！」
相信這幕必定係唔少新手準媽咪的心聲！
李佳芯呢場戲演得入木三分、七情上面，喊哂口同老公講好怕要做媽媽，未為人父母的小編都睇到眼濕濕…
｜李佳芯加入「媽媽谷」
日前《BB來了》講到，Ali同黎諾懿於街頭被一位產前班的媽媽同學截住，自拍一番後更邀請佢哋加入「媽媽谷」！可能睇到呢度，唔少媽媽觀眾都會心微笑，開電話數數自己入咗幾多個！
「媽媽谷」即媽媽Group
其實大家都應該知道，所謂「媽媽谷」即係媽媽Group，一班孕婦或者產後媽媽於唔同社交平台成立群組，認識同路人，就如Ali所講：「有跟地區有按生B月份，可以交流生B同湊B心得，仲有定期聚會﹗」
黎諾懿聽到老婆要加入媽媽谷，可能同現實中唔少男士的反應一樣，就係一臉嫌棄咁拒絕，唔少網民都笑說老公覺得呢啲Group好似邪教一樣！
老公大開眼界
雖然小編未結婚，不過都大概估到呢啲媽媽谷聚會的情況，都係一眾大肚婆圍威喂，交流生B同湊B心得，令作為場內唯一男士的黎諾懿眼界大開！
大家都係同路人，無所不談，呢位大肚婆就提到自己懷孕時完全無性生活，老公已經九個月冇掂過自己咁話！
記得睇「港媽王國」
之後有大肚婆話記住每日瀏覽「港媽王國」(現實中好似有個叫… )，其實現實有唔少媽媽谷都會爭取團購優惠，買尿片、奶粉、靚靚BB衫等都可以有折扣，做個精明靚媽！另外又有一班同路人作照應，懷孕期間的種種問題都有人一齊討論！
「62」「99」「C6」？
媽媽谷聚去到尾聲，大家都齊齊講啲激勵說話，除了祝大家陀B順利之餘，最重要係唔好俾「62」、「99」同埋「C6」欺負！講緊咩呀？
原來呢啲都係媽媽谷術語，「62」代表老爺、「99」代表奶奶，至於「C6」… 即係個死佬呀！
老公心底話
返到屋企後，黎諾懿都忍唔住要講出心底話，表示媽媽谷就有如一班師奶自暴自棄、講是講非…
又話一班師奶愛FF愛自High，物以類眾，好擔心老婆由高學歷氣質港女淪落成港媽！睇到呢度，男士們女士們係咪都好有共鳴？
