39歲唐詩詠膠面殘樣開劇 網民：唐姨連雙眼皮都深咗

撰文：東方新地

唐詩詠鼻高高因由

19歲拍《青春@Y2K》入行嘅唐詩詠，轉眼已經撈咗廿年，當年卜卜脆少女變咗熟成唐姨，視后都攞埋不過老公就仲未搵到，女人到咗呢個年紀仲要做呢行，個樣當然好重要，眼大大又鼻高高嘅唐詩詠，做咗三十九年人，舊年先喺親戚口中知道嫲嫲係荷蘭同印尼混血兒，亦即係話佢都擁有「歐洲血統」⋯⋯

本來腮骨外露塊面闊闊嘅唐詩詠，經過女大十八變自我分階段進化，近年變得面容緊緻，蘋果肌長期脹卜卜令到反光，不過就要長期保養囉！年初受到新冠肺炎影響，唐詩詠停工避炎，日日留家玩貓喪煲劇，忙過開工。日前終於為新劇《超能使者》開工，唐詩詠帶住大眼袋同殘樣，成塊面都浮浮腫腫咁，不過網民就讚佢連雙眼皮都深咗。

個樣唔夠後生女搶fo，唐詩詠又出茅招，上個月佢喺母親節預告7月會送神秘禮物給亡母，有網民揣測係同馬國明閃婚掀起熱話，連累馬明被追問傳聞真假。明明係自己講啲唔講啲製造話題，唐詩詠竟然嬲嬲豬怪責大家錯誤解讀同扭曲佢嘅說話，佢仲自爆「神秘禮物」係佢同同學一齊參與慈善工作，大家會用唔同嘅藝術方式表達，重申唔係結婚，希望大家唔好再傳佢同馬明係一對。

講返唐詩詠個樣，初出道嘅佢樣子清純真係幾討好，人愈大面容愈緊緻，仲冇晒baby fat，而最明顯嘅進化應該係以前蘋果肌平坦，依家變得立體。

好姊妹同進化

無獨有偶，佢個好姊妹黃翠如都係一樣，本來五官唔多突出嘅佢，近年又係蘋果肌變得脹卜卜，對得多一齊進化都好正常。出年就踏入四字頭的唐詩詠，話就話女人四十一支花，但女人唔補好易老，持住自己係混血兒唔好好保養，出事㗎嘛！