38歲譚凱琪晒孕照公布有喜 曾憂感染肺炎做深喉測試

撰文、圖片：東方新地

譚凱琪同閨密陳凱琳同期大肚

譚凱琪被影到肚凸在家姐及老公旁住出街，但當時人仍以未有消息宣布為由回覆，三月升呢人妻的 Zoie終於公布即將升呢人母，她在IG貼出唯美的孕照，Zoie更透露因身體不適、呼吸困難、容易疲倦、有幾聲咳而恐自己感染新冠肺炎，而去做了深喉測試，幸好結果是呈陰性，並得知這些身體上的變化全因懷孕初期的症狀，才放下心頭大石，把喜訊公告天下。Zoie又發表即將為人母的感受：「看著肚子一天比一天大，食量一天比一天多，走路一天比一天慢，體重一天比一天增加，慢慢感受到你的存在，有種莫名奇妙的感動，這段時間我會加倍小心，以後我亦會盡量最大努力去保護你，因為你的一切將成為我的一切」Zoie的好姊妹陳凱琳同期懷孕，唔知仔定女呢？唔知可唔可以對親家呢？

譚凱琪搏殺期突推《 BB大晒》一劇

譚凱琪曾揚言婚後會繼續幕前工作，不會引退做少奶奶，不過夫家卻另有想法。男家錫到佢燶，幾年前Enrico父母已經催婚想抱孫，仲想Zoie婚後專注湊B享福唔好再捱得咁辛苦，不過Zoie見喺無綫個勢幾好，好多監製都畀機會佢上，所以想畀多少少時間自己搏殺，Enrico都想Zoie開心，所以有共識遲啲先結婚，因為Zoie想喺40歲前生B，唔想做高齡產婦，佢哋結婚係結得好急，亦有傳已經造人成功，因為未夠三個月怕小器唔講得，咁啱咁橋Zoie為《 BB大晒》試咗造型都唔拍，又推埋另一套劇，大肚之說就更加似層層啦！」

為老公傳宗接代不介事暫別娛圈

今年2月宣布接拍《 BB大晒》時，譚凱琪仍未放風要嫁人，短短一個月時間，她已向無綫提出辭演，到三月中新劇舉行開鏡儀式，角色已由陳自瑤頂上。對於被指雙喜臨門，譚凱琪只承認因有家事要請幾個月大假而推辭兩部劇，她暗示暫時不透露太多，望大家明白，並表示面對新冠肺炎肆虐全球，也只能多留在家中防疫。知情者透露：「今年絕對係Zoie豐收嘅一年，除咗《降魔的2.0》同《飛虎之雷霆極戰》，佢仲有兩套劇拍咗未播，對於佢嚟講，依家放低事業走去生仔等於前功盡 廢， 不過佢都要為自己幸福著想，為老公傳宗接代都係人生中重要嘅事，Zoie都鍾意小朋友，早年有幫家姐譚凱欣湊B，佢仲係陳凱琳囝囝契媽，玩得B多佢都心癢癢想自己生番個啦！近年Zoie同Enrico都有晒心理準備，隨時二人世界變三人行。」

譚凱琪凸肚現身記者會孕味甚濃

今年三月舉行過簡單而隆重的婚禮後，譚凱琪一直停工安胎鮮有露面，據知因為疫情關係要萬事小心，譚凱琪亦乖乖避炎，至5月27日疫情稍為放緩，她現身公司安排的宣傳記者會，身穿桃紅色闊身裙全程戴上口罩，只露出纖幼四肢，腹部明顯隆起，腰肢亦硬繃繃，有晒孕婦懷孕前期的徵兆。有說女人陀仔係人生中最幸福的日子，結婚生仔好比一條不歸路，繼好姊妹陳凱琳之後，譚凱琪即將成為下一個母憑子貴，生完再生無限期絕跡幕前嘅女藝人。