36歲唐詩詠 首奪視后
唐詩詠出道多年來俾人感覺都係清純乖乖女，形象討好，而且出晒名對愛情專一又認真。可惜無論係余文樂、崔建邦或是去年分手的洪永城，詩詠一直都未遇到一個可以託付終身的好男人…… 其實詩詠的好，又點止對愛情的堅持，《新地網》現為你數出詩詠優點一大籮，睇完之後，大家就會明白點解唐詩詠係一個不能錯過的女友！
36歲唐詩詠 首奪視后
唐詩詠憑《不懂撒嬌的女人》首奪無線「最佳女主角」，揮低勁敵宣萱、田蕊妮、鮑起靜、李司棋等。詩詠知道自己得獎後好激動，即同黃翠如及田蕊妮抱抱，之後一上台淚如雨下話：「多謝，我除咗演戲冇做過任何嘢，好多謝珍姐、好多咁多位監製呢十三年畀咗好多機會我一路拍一路學，要多謝《不懂撒嬌的女人》、所有編審、浩信、諾懿、Mall姐畀，多謝你哋畀咗一個咁好嘅角色我，要好多謝網民，喺網上要人唔憎你好難，要鍾意你再cap圖轉發更加難，要多謝每一個轉發呢套劇片段嘅人。
另外要多謝一個人，一直等緊一個機會多謝佢，佢教我做戲，教我做人，佢成日聽我呻，又肯陪我瞓，佢每次話完我鬧完我之後，最後都會講一句，你要記住你係好好嘅，多謝你田蕊妮小姐，我一路等緊可以喺台上多謝你。最後要多謝一個人，因為佢我先可以企喺度，佢上生奉獻咗畀愛情，下半生奉獻咗畀我，佢教識我點樣愛人，點樣去堅持，呢兩樣嘢我先可以行到今日，呢個獎係屬於我媽咪，雖然佢唔喺度，我知道佢會睇住我，我好掛住你，我好愛你，雖然你離開咗我咁多年，我會記住你教我嘅嘢，我知道我唔完美，我會努力好每一個角色，多謝大家。」
一個接一個 也沒有結果
唐詩詠除了勤力拍劇工作，感情生活也成為話題。詩詠同上一任男友洪永城拍拖以來，對男方一心一意，人前人後都好恩愛。但兩人的情路都唔係順風順水，早年紅地氈上洪永城同黃翠如拖手一幕在網上瘋傳，引發連串花邊新聞，全城似乎都覺得洪永城同翠如BB先係一對！
頓時好似變咗「第三者」的詩詠不單沒有介意，接受訪問時依然表現大方，而且仲同翠如BB做埋好朋友，可謂愛屋及烏！
疑翻撻舊愛
事緣洪永城在2012年任旅遊節目主持時，本來已經有個從事金融業的女友Emily，其後認識當時為黃翠如形象指導的Bird Tse，兩個人同樣喜愛夜蒲，可謂一拍即合。之後兩人不時相約流連夜場，愈玩愈埋，Emily終難忍男友花心，狠心分手！雖然永城後來同Bird有過一段情，不過亦係快來快去，無疾而終。
不過洪永城除了舊愛Bird，早前又被爆多年來鍾情一位名叫Kanice Po的索女，兩人早年在一個party場合認識，Kanice曾任職空姐，近年則轉到銀行擔任理財客戶主任。據稱當年女友仍是Emily的Tony，在 party上不斷撩Kanice傾偈，之後更大膽到想錫人塊面！不過Kanice都心知Tony花心，所以多年來都只當對方係普通朋友。
唐詩詠 洪永城去年分手
其實唐詩詠及洪永城都已屆適婚年齡，詩詠心急想結婚亦無可厚非，但有消息指33歲的洪永城仍然未定性，更自認「冇本事」養老婆，最後兩人在婚期上未能達成共識，更因此經常有爭拗，所以在去年五月決定和平分手！
洪永城撐前度做視后
雖然唐詩詠同洪永城已經分手，不過的確係再見亦是朋友，繼今個月兩人被拍到秘密約會後，洪永城日前在網上公開自己投詩詠做視后，並留言大讚詩詠人緣好、每次演出都非常投入認真：「你係我心目中嘅最佳女主角」出晒面幫手拉票！
掏盡幾多光陰 不襯便不襯
講到詩詠的戀情，又點可以唔提崔建邦 (Amigo)！詩詠同Amigo在2005年一同主持《K-100》時撻着，可惜男方不時背着女友夜蒲偷食， 以致兩人多次離離合合，分手復合又分手，拖拖拉拉近十年。其實Amigo偷食都唔係咩新鮮事，佢曾經多次食女被斷正，不過詩詠一樣係默默承受。
直至2009年，o靚模鄺敏慧 (中巴)報警聲稱被Amigo虐打，惹來全城關注，男方形象跌至谷底。不過最終獲法庭撤銷控罪，只是守行為一年，不留案底。 Amigo負面新聞纏身，詩詠依然多次公開表示信任男友，再寫埋紙力撐！需知女孩子的青春係幾有限，但詩詠都不離不棄，對男方專一的程度已經近乎係麻木， 實在係聞者傷心……
下頁開始將詩詠優點逐個數，話俾大家知拋棄佢的男人都係走寶！
體貼之達人
詩詠曾被拍到同馬國明、林子善等人一齊食飯，期間詩詠更加剝埋蝦俾馬明，詩詠剝幾多馬明就食幾多，之後仲遞上紙巾，真係好窩心！但原來剝蝦都未夠，詩詠為人為到底，飯後仲載埋馬明返去太古城的住所。難怪事後馬明都大讚︰「佢不嬲都賢淑！」
大家都知道現今「港女」盛行，好似詩詠呢啲咁識照顧人的女友真係好難得，對身邊人一視同仁，又樂於照顧朋友，絕對唔會有異性無人性！詩詠為人咁好， 所以佢在圈中人緣甚佳，唔少同佢合作過的藝人都會成為其好友，好友包括鄭嘉穎、黎耀祥、胡定欣、鍾嘉欣、田蕊妮……下刪N個人。
慳家之達人
雖然節儉都係一種美德，不過紅星名人賺賺埋埋咁多，花多啲錢享受生活都好係好合理。但詩詠就唔同，佢部座駕Volkswagen白色甲蟲車已經揸咗五年以上，就算年前意外撞車，佢都四出揾車房格價先落實維修，可謂慳得幾多得幾多。同圈中一車接一車的藝人相比，詩詠可算是一道清泉！
生意之達人
詩詠日常生活精打細算，同時亦好有生意頭腦！早年佢在中環「PMQ Halloween Gourmet Market 元創方萬聖節美食市集」，引入台灣享負盛名的「洪瑞珍」三文治，該三文治在當地大約賣6元港幣一件，但詩詠就以40元一件的價錢在PMQ出售，據知半日已 經賣出1,600件，賺到笑！如果有詩詠做女朋友，完全放心將經濟大權交俾佢！
唐詩詠同王浩信呢對螢幕情侶去年憑《不懂撒嬌的女人》彈起，之後兩人做埋生意拍檔，拍住上開cafe，進軍飲食界！
寵物之達人
詩詠本來好愛狗仔，不過因為工作繁忙，家人又無暇照顧，所以就改養性格較獨立的貓。分別養咗兩隻蘇格蘭摺耳貓仔，一隻叫「金仔」一隻叫「銀仔」，詩詠錫到佢哋爆！都係嗰句，愛錫寵物的女仔，人品自然唔會差！
演戲之達人
2010年時，入行七年的詩詠憑《鐵馬尋橋》中應雁鳴一角，奪得該年度《萬千星輝頒獎典禮》的飛躍進步女藝員獎，以及入圍角逐最佳女配角，表現有目共睹。去到2016年，詩詠又憑《鐵馬戰車》中姚瑤一角，在TVB馬來西亞頒獎禮奪得「最喜愛TVB電視角色獎」。
詩詠去年在《不懂撒嬌的女人》中大爆發，其中一幕對住自己上司兼堂姐的宣萱聲嘶力竭的怒罵，對住前輩完全冇輸蝕！劇集播出以來，觀眾都只係關注佢同王浩信的劇情發展，今次終於令人留意到佢啲演技啦！
美貌之達人
小編講咗咁多詩詠內在的優點，去到最後一頁係時候講番啲最實際、最膚淺的原因……無錯！就係詩詠真係好正囉！詩詠的樣子甜美，一直都保持清純女神的形象。早年無綫的青春劇「四葉草系列」被視作培養新人的搖籃，有網站曾經舉辦咗一個「歷代四葉女最靚選舉」，結果詩詠以高票當選冠軍，美貌不庸置疑！雖然詩詠今年就37歲，不過一樣keep得勁好！
各位讀者，如果閣下已經有一個好似詩詠咁樣的女朋友，千萬千萬不能錯過！如果大家認識一個詩詠咁樣的女仔而佢又係單身，請馬上通知小編……
