2016年娛樂圈10大喜事回顧
圖片來源：微博、Instagram、新傳媒圖片庫
1. 舒淇 馮德倫
今年最爆的婚事，非舒淇同馮德倫莫屬。40歲舒淇同42歲馮德倫於9月3日宣布 結婚 ，仲向傳媒發出結婚啟事！兩人表示，結婚係好突然但又好簡單的事，多謝大家祝福，仲笑言唔係奉子成婚！雖然兩人強調想過二人世界先，但外界一直揣測舒淇有喜，令佢一直要澄清，真係唔知好嬲定好笑！20年來兩人離離合合，雖然被影到多次一齊外遊，但從未承認戀情，所以最爆的婚事一定係佢兩個！
2. 楊怡 羅仲謙
楊怡同謙謙除咗喺英國利茲普城堡(Leeds Castle)影婚紗相之外，佢哋喺3月22日仲喺當地註冊，舉辦咗一個只招待家人的小型童話式婚禮。唔好睇謙謙大大隻隻咁，其實佢極度細心體貼又浪漫！佢喺Instagram只係追蹤咗老婆一個人唔再講，今年10月2日，阿怡同謙謙於香港擺酒筵開52席，使費高達7位數字，全部都由謙謙一力承擔，認真愛妻。婚宴上，謙謙更打扮成阿怡最愛的卡通人物為老婆獻唱，感動！
而婚禮翌日，謙謙提到簽紙的一刻，就話一入到會場已經流緊眼淚，佢好多謝阿怡由拍拖到現在都全心全意支持同信任佢，佢一早已認定呢個女人（阿怡）是佢應該永遠保護的人！阿怡聞言隨即喊爆回應：「我其實要的幸福很簡單，我不用吃甚麼好東西，也不用坐名車，只要我們手牽手，就可以走到老！」
3. 劉鑾雄 甘比
華人置業前主席劉鑾雄（大劉）與兩位紅顏知己呂麗君及甘比（陳凱韻）之間的感情發展，多年來都為香港人所關注。然而，今年11月中大劉突然在各大報章頭條發聲明，正式澄清與呂麗君在2014年已分手，強調兩人已斷絕關係。
原來大劉與甘比早於11月18日已經入紙，正式註冊結婚！大劉接受訪問時，稱幾年前已經計劃與甘比結婚，而決定與當日的聲明無關。另外，大劉指甘比一直都好照顧自己及一眾子女，而且大讚佢唔貪錢、為人單純，唔係壞女人。而甘比則透過短訊回覆傳媒指成為劉太是一件人生中最開心事！
4. 鍾嘉欣Jeremy
鍾嘉欣（Linda）與於溫家華開設脊醫診所的Jeremy認識了僅僅四天便認定對方，兩人於去年12月25日步入教堂，並於香港時間2月28日與在溫哥華補擺喜酒，只邀請了約80名親朋好友。而名為Amazing Esther的處女黨成員於婚禮合體祝福Linda和Jeremy。同年8月，Linda誕下囡囡Kelly，升呢人母。Linda曾指老公希望生四個小朋友，而她亦會盡力配合，同時佢亦答應fans不會只顧家庭而放棄自己喜歡的工作。
5.岑麗香 Joshua
今年32歲的香香公主岑麗香，與圈外男友強強（Joshua）拍拖一年半，一直感情穩定。而去年年尾強強更透過視像電話向香香求婚，香香即時爽快答應，於12月18日與圈外男友強強於溫哥華舉行童話式婚禮，正式升呢為強嫂。
談到選擇強強付託終生的原因，香香直言對方人品非常好，無論對屋企人、身邊朋友或是任何人都一樣咁好，絕對是一個好榜樣，值得被人認同。從兩人於溫哥華的婚禮，就可以睇到強強有幾咁錫香香，連老婆的婚戒都係由強強親手設計㗎！真係羨慕死人啦！
6.周柏豪 Stephanie
32歲的周柏豪一向對感情事甚為低調，於今年11月時被爆跟拍拖十年的圈外女友Stephanie Chu在泰國布吉舉行婚禮，震驚全城。即使與任職I.T.買手的同居女友Stephanie已經拍拖十年，柏豪亦一直鮮有提及感情事，最多都係2014年叱咤頒獎禮時在台上感謝女友一直不離不棄！所以人生大事亦貫徹其低調作風，只邀請極少量家人朋友到位於泰國布吉的Aleenta Phuket Resort沙灘上參加二人浪漫的婚禮。
7.孫慧雪 羅天彥
34歲「宅男女神」孫慧雪上週於愉景灣舉行婚禮，與拍拖四年、36歲圈外富二代男友羅天彥（Edwin）拉埋天窗，趕在平安夜前封盤。婚禮前，兩人曾遠赴峇里拍婚妙照；至於大婚當日，身穿低胸婚紗晒身材的阿雪與Edwin坐在馬車，如同童話中的王子與公主一樣，高貴又浪漫！
8. 熊黛林郭可頌
現年36歲的名模熊黛林，與藝人郭可盈胞弟郭可頌感情穩定，男方更於今年三月求婚成功，兩人於11月宣佈喜訊。正式升呢為郭太的熊黛林10月27日在微博報喜，留言︰「我們結婚了。」佢除了上載與老公恩愛合照，亦有分享簽字一刻的情況。當時一對新人的簽字儀式十分簡單，熊黛林身穿白色長裙，簡單隨意，手上婚戒亦是簡單款式，符合兩人低調的作風！
9. 宋熙年陳智燊
陳智燊（Jason）同宋熙年（Sarah）拍拖多年，經常在網上晒恩愛，今年九月於英國倫敦秘密行禮，家人及摰友都飛抵當地出席二人婚禮。兩人目前想繼續二人世界，婚後常常以夫婦檔出席活動，齊齊搵真銀。
10.楊愛瑾 郭永淳
楊愛瑾（Miki）同拍拖8年的永安太子爺郭永淳於4月30日正式註冊，同日在深水灣鄉村俱樂部舉行結婚派對，並於5月飛往峇里島行禮。今年11月，Miki於社交平台上傳同老公的鬼馬合照並留言：「Hey little thing，you make us go wild！（小東西，你令我們失控！）」，藉此公佈懷孕喜訊。
