大女林泳今年即將被父母送去英國留學，朋友多多又係學校風頭躉女大女世界，有自己社交圈，好彩細女林清依然黐身，日前就陪媽媽帶埋狗狗去數碼港放 狗呼吸吓新鮮空氣。兩母女攬到實感情要好，林家隻寶貝狗簡稱「林狗」亦都在草地狂奔如魚得水，畫面好有愛！

撰文：東方新地 圖片：新傳媒圖片

彭羚14歲細女好黐身

二十年前結婚後，彭羚即退居幕後成副心機放在家庭，湊住兩個女做林海 峰背後女人。時光飛逝，大女林泳今年18歲，離港留學在即，細女林清亦都已 經高過媽媽毋須父母操心，慳番大把時間精力的彭羚多咗時間同另一半林海峰 拍拖睇戲二人世界，又養埋番狗，既可以滿足吓澎湃母愛，對兩個女更是一份愛同責任感的最佳教育。香港地養寵物，個個都老奉將鏟屎放狗責任交畀外傭，林太最佳示範，就係自己狗自己放，樣樣帶埋個女親力親為。

稱職母女鏟屎官為演出舞台劇《短暫的婚姻》，男主角林海峰忙足一個月，彭羚晚晚在後台 打點一切，親子時間都唔會減少。日前彭羚和細女由司機載往數碼港狗公 園，「林狗」由彭羚拖實、林清殿後，一落車先來大解放，放低幾両黃金。耐心等完狗狗辦事的彭羚嗱嗱聲取出自備好的膠袋，親自蹲下身執乾淨黃金再封實 膠袋掉入垃圾桶內，而囡囡及狗狗則急不及待先行一步飛奔去草地玩耍。

全程放足一個鐘狗，「林狗」同其他狗隻盡情追逐，彭羚就追住「林狗」狂留倩影，然 後疑似即時傳送畀另一半及大女分享。林清睇住愛犬玩得開心，自己更開心。本來已經同爸爸一個餅印，開懷笑容更有林海峰神髓，一睇就知錫到「林狗」燶。雖然已經14歲女，林清依然愛黐媽媽，不時從後箍住媽媽抱到實，轉個頭又輪到彭羚忘形，環腰攬實個寶貝女。都話無論幾多歲生得幾高大，仔女喺媽媽心目中永遠都係小朋友！

延伸閱讀：

送女出國阻入行 林海峰、彭羚悠閒拍拖

基因強、後台硬、成行都係Auntie、Uncle，眼見近年林海峰、邱淑貞、陳奕迅愛女初長成個個亭亭玉立，大公司紛紛吼實想簽入門，不過星爸星媽個個態度保守，尤其林海峰！去年17歲林泳被兩家公司同時睇中力爭，林海峰極力反對愛女入行又認為學業為先，據知今年索性送林泳出國升學。大女離家一身輕，兩公婆樂得清靜，即時有閒情逸致拍吓拖！
撰文：東方新地｜圖片：新傳媒圖片庫、林海峰FB

結婚廿年、婚後即放棄如日中天事業，為林海峰生下兩個女林泳、林清專心湊女，彭羚十多年來悉心栽培養育、去到邊都帶埋兩個女喺身邊，早前難得見同老公林海峰兩個拍拖出巡，便服素顏去到大坑法式糕點名店買甜點外賣回家慢慢歎。今年二月剛滿49歲，彭羚卻皮光肉滑一點也不像將近半百，就算不施脂粉一樣信心十足心情靚靚，買完大袋包點面帶笑容站在店外四處張望，正好等到林海峰泊好車行到迎接。一見老婆，Jan立即伸手接過手中紙袋，錫老婆錫到出面！

愈大愈靚

終於有得二人世界，係因為大女離家升學、二女林清亦都已經十三歲唔黐身。18歲林泳在名校女拔讀完初中，林海峰與老婆意見一致，希望女兒少點壓力多向發展，所以兩年前為女兒轉校到漢基國際學校繼續學業。眨吓眼高中畢業，本來都唔捨得送女出國，去年卻因為有傳聞指林泳身形高䠷、五官清秀，是游泳溜冰健將又遺傳媽媽基因好唱得，所以被多間大型娛樂公司游說接洽入行。

廿年前堅持讓彭羚退出樂壇專心湊女、十八年後林海峰同樣反對愛女入行做藝人，所以一邊廂婉拒游說，另一邊廂就鋪路送女出國升學。其實學業固然重要，不過林氏姊弟三個都係娛樂圈中人、林珊珊兩個女都入埋行，送出國相信只係權宜之計。

省鏡星二代

其實除咗林泳，仲有邱淑貞大女沈月、任達華愛女任晴佳同Eason獨女康堤亦愈大愈靚，不過就唔係個個好似林海峰咁極端，反對入行反到要送個女出國。