鼎爺義氣相助 呂良偉一生感激
廣告
李家鼎(鼎爺) 除咗好打得，近年更在《阿爺廚房》中大顯精湛廚藝，人氣一時無兩！鼎爺在無綫多年，對提攜後輩向來不遺餘力，影壇重量級人馬呂良偉，原來多年前都係得鼎爺相助先可以簽約無綫，繼而在娛樂圈發光發熱……
呂良偉訓練班畢業 無綫唔簽約
41年前，當時只得21歲的呂良偉加入第六期無綫藝員訓練班，同學有陳玉蓮及「阿燦」廖偉雄等。呂良偉精通幾種語言，而且自細練得一身好武功，肯搏又肯捱，可惜畢業後無綫並無同佢簽約，仲表明與佢同類的演員有太多。
鼎爺義氣相助拍檯同高層講數
當時鼎爺憑《香港八一》系列「李威」一角走紅，並在無綫兼任武指及馬術指導，鼎爺得知無綫唔簽呂良偉，即時致電對方，並答應為佢向無綫高層反映。據知當時鼎爺霸氣十足，對住高層拍晒檯話：「你唔簽佢吖嘛，咁我簽佢做龍虎武師囉！」結果無綫高層隨後同呂良偉簽約，並開始拍劇。之後的事大家都知，呂良偉憑《上海灘》「丁力」一角紅遍亞洲、之後又憑《跛豪》提名金像獎影帝！
鼎爺謙虛唔邀功
呂良偉早前拍攝中藥廣告時，表示入行以來遇過唔少困難，其中鼎爺喺佢最困難時出手相助，令佢成功同無綫簽約，所以佢一生都會感激對方！而鼎爺日前接受媒體訪問時，直認當年有呢年事發生過，不過自己唔會再提，費事好似叨人哋光咁。鼎爺呢啲義氣仔女，幫過人當然唔會周圍講，心知就得！
