黎明55歲生日現身陳柏宇個唱爆金句賀壽：我早到，我運氣就唔好

Dec 11 2021

廣告

今日(12月11日)是天王黎明的55歲生日，牛一前夕他為《陳柏宇Fight For __ Live in Hong Kong Coliseum》個唱做特別神秘嘉賓，一如以往金句王上身，掀起全晚高潮，可能心急返屋企同妻女一齊倒數迎生日，黎明多番自嘲預早到場卻因Rundown延誤遲咗成個鐘先出場，唱完《越夜越有機》就急急腳閃。

撰文：東方新地圖片：新傳媒資料庫、東方新地圖片、Facebook@陳柏宇Jason Chan、Facebook@陳柏宇香港歌迷會

黎明驚喜現身

陳柏宇在紅館舉行《陳柏宇Fight For __ Live in Hong Kong Coliseum》，真係好抵睇，除了陳柏宇全晚唱多過講，好少停低同觀眾傾偈交流，還有天王黎明做特別嘉賓，為頭場觀眾帶來驚喜。

陳柏宇的個唱前半段都圍繞著他的個人故事，不過舞台上的故事轉眼間來到2019年，說著世事無常，感動人心。（圖片來源：Facebook@陳柏宇香港歌迷會）

陳柏宇的頭場個場非常成功，仲好有驚喜。（圖片來源：Facebook@陳柏宇Jason Chan）

一出場爆金句

今日生日的黎明，仍肯為陳柏宇做嘉賓認真唔話得，一出場就大講與陳柏宇過去曾多次合作，仲話：「有緣就會見到！」之後黎明開始自製話題：「做呢行咁耐，只要我早到，我運氣就唔好，本我係我9點半出場，我8點50分就到，依家食10點20分，唔緊要，唔關你事……我頭先問set咪嗰個你今晚多唔多唱快歌，我問我啲歌快啲定你嗰啲……,死啦搞到咁夜，我想唱《愈夜愈有機》，點知依家愈夜愈眼瞓……」

陳柏宇與黎明一齊再升上台出場，帶給全場觀眾驚喜。（圖片來源：東方新地圖片）

在黎明面前，陳柏字變得拘謹。（圖片來源：Facebook@陳柏宇香港歌迷會）

陳柏宇獲黎明加持

黎明連珠發炮，身為後輩的陳柏宇都唔敢插嘴，黎明續說：「等咗成個鐘都冇所謂，做呢行係呃呃氹氹……講老實說話嘅係朋友，呃你嘅人係摯友。」之後黎明話想同陳柏先做朋友再發展成摯友，大讚陳柏宇歌藝一流，是個好歌手。黎明下台後，陳柏字笑言今晚入場的觀眾會認為物超所值：「大家覺得驚喜嗎？黎明喎！點會估到啫？」

黎明講完一大輪金句，獻唱《愈夜愈有機》。（圖片來源：東方新地圖片）

原來黎明比原訂時間提早了到達現場，結果在台下要等差唔多成粒鐘才上台，他笑問陳柏宇：「都係遲5分鐘開騷啫，點會差咁遠？」見陳柏宇非常不好意思，黎明又安慰這不是他的錯。（圖片來源：東方新地圖片）

黎明金句隨心兼隨緣

黎明入行至今超過30年，正所謂「薑愈老愈辣」，曾經，黎明講過「好多事情可遇不可求，通常有目的有意識去做都唔會成功，反而隨意去做可能有意外之喜。」黎明唔知係咪抱住呢個隨意嘅心態去「造」，當年宣布自己當爸爸，並表示「兩個經歷過離婚的人，有機會走在一起已是一種缘份」呢句就啱啱好match番佢以前講過「有無機會拍拖，同見鬼一樣，都係要講緣分嘅！」

（圖片來源：新傳媒圖片庫）

（圖片來源：新傳媒圖片庫）

黎明與林海峰爆笑對話

之前黎明搵林海峰（Jan）做演唱會嘉賓，阿Jan就喺社交平台分享番同Leon嘅真實對話，二人妙語連珠，令人捧腹大笑！

J：多謝你邀請我做嘉賓，但係金句王面前我真係唔知噏咩喎？
L：唏jan⋯噏咩，Up to you la 。
J：咁⋯（硬食）好啦，到綵排時我再大概話你聽噏咩啦。
L：唏⋯jan，綵排綵排都不及天意安排啦。
J：（完）

（圖片來源：新傳媒圖片庫）

黎明金句深入民心

多年來，黎明唔少金句無厘頭之餘又富有幽默的智慧，依家就等我哋一齊重溫！

「攝影記者就好似我爸爸，文字記者就係媽媽，成日催我幾時生，反而真正嘅父母就冇問過，呢啲自然嘅嘢，自然流程有就會有。」

日催夜催終於催到喇，黎明已經做埋老竇，記者「父母」們倍感安慰～

（圖片來源：新傳媒圖片庫）

「有無機會拍拖，同見鬼一樣，都係要講緣分嘅！」

所以小編到依家都未見過鬼，又未拍過拖……

（圖片來源：新傳媒圖片庫）

「坎坷過後有艇搭！」

堅呀！情路上波折重重嘅黎明今次真係有艇搭呀！

（圖片來源：新傳媒圖片庫）

「借錢如送禮，還錢如乞米。」

非常押韻又非常到肉嘅金句之一，相信有借過錢俾人嘅朋友，都會大力點頭同意。

（圖片來源：新傳媒圖片庫）

「核心嘅外圍係核心嘅內圍」

即係外圍定內圍？相信大部分人同小編一樣都好亂……

（圖片來源：新傳媒圖片庫）

「我唔可以空肚食早餐。」

呢句話說係來自杜汶澤搞嘅爛Gag，黎明本意是空肚不能食「生冷」的東西，但最後就變咗街知巷聞嘅「空肚食早餐」。

（圖片來源：新傳媒圖片庫）

「如果魚柳包裏面嘅魚柳變咗就唔係魚柳包。」

話說黎明曾被問髮型點解多年不變，黎明就話自己早年去英國讀書時已經係咁，呢個係習慣，並以魚柳包做例子。

（圖片來源：新傳媒圖片庫）

「結了就婚（分），注了就冊（撤），喝了就酒（走）。」

係黎明當年同樂基兒離婚後對婚姻嘅新睇法。

（圖片來源：新傳媒圖片庫）

「如果畀我製造浪漫，我想有一個魔法，可以變走晒啲記者。」

黎明都係想吓好啦，記者朋友們都係搵食啫。

（圖片來源：新傳媒圖片庫）

「我豁達，所以我唔介意別人說我不豁達。」

人哋話黎明唔豁達？冇所謂，因為佢夠豁達。明晒。

（圖片來源：新傳媒圖片庫）

仲有好多好多，不能盡錄……

「衞蘭肥過部電單車」
「左手又係肉，手背又係肉。」
「有法例之前，都試過醉駕，我飲咗酒揸車叻過平時。」
「最近好多豬流感，創作就係咁，係要有靈感。」
「只有一個方法，就係唔好去諗有咩方法，繼續做，你做到之後就會知道係用咗咩方法！」
「所有嘅美德都可以偽裝，只有修養係內在的。」
「男人嘅魅力來自工作，男人一旦退休離開工作，就已經喪失魅力。」
「唔好理人哋點睇，反正無論你係好人定賤人，都會有人覺得你係賤人。」
「做人做事，踏實好過疊水。」
「飲酒要有酒品，影相要有相品。」
「我一出世便準備做好地球人。」
「我覺得玩風帆同做人一樣，要能屈能伸；同娛樂圈的事業一樣，有起有跌！」
「祝大家今晚開心，有一個開心晚上，將一個回憶放喺database入面。」
「愛情似香檳，開始時有好多氣，飲後會high，可是香檳氣太多，不宜多飲。」
「計不到的，就用猜的，猜一猜最壞有多壞，如果最壞也不是太壞的話，GO。」
「不少人抽到好簽，四肢健全，智力正常，但應該關懷不幸抽到下下簽的人。」
「當你有一輛保時捷的時候，千萬不要去想自己失去它的日子，因為當你真得失去它的時候，一定有另一個辦法讓你可以生存下去。」
「原則會取締默契，默契會產生更多議題。」
「勇氣呢，就係做一啲平時唔習慣做嘅嘢，但一定要挑戰，挑戰產生樂趣。」
「同時間競賽，會輸雙倍時間，同時間拍拖，會無輸無贏，真正的贏，是我們都忘記了時間！」
「我喺英國讀書時，試過有同學畀支大麻我，我唔要，因為啲錢係爸爸供我讀書嘅，我覺得就算真係要食嘅話，都等將來賺到錢先買。」

關鍵詞

黎明陳柏宇《陳柏宇Fight For __ Live in Hong Kong Coliseum》