「豹叔」Rap得又演得！一代詞人黎彼得成就70、80年代輝煌樂壇

撰文：東方新地 圖片：新傳媒圖片

大四喜

前晚講及一班實力派演員包括75歲「熊樹根」劉丹、70歲「龍敢威」羅樂林、63歲「譚道德」陳榮峻，加埋68歲的「馬豹」黎彼得組成「大四喜」一起去電視台參加Hip Hop比賽，四人加埋超過270歲，但一身hip hop裝束仲Rap埋，夠晒頂癮。

劇情提到大會改制，需要即興Rap出以IG為題的歌，雖然4人對IG一竅不通，但臨場最終打天才波，丹爺打頭陣Rap出「Hey，乜嘢叫做IG我哋唔知，我哋淨係知，企喺台上我哋可以⋯」三位成員輪流Rap，一身Hip Hop打扮加生動演繹，片段出街後隨即在網上瘋傳！

由於歌詞生鬼又貼地，不少人都想知「大四喜」Rap的詞是出自誰人的手。不少網民都猜測是「馬豹」黎彼得，黎彼得與黃霑、盧國沾、鄭國江係香港第一代粵語流行曲填詞人！

演得又填得

現年68歲黎彼得唔止演得仲好填得，黎彼得年幼喪父家貧輟學，對中文有濃厚興趣的他半工讀苦學，又因參加徵文比賽而有機會在報章寫專欄，及後輾轉經朋友介紹與許冠傑合作寫歌詞，經典詞作包括《打雀英雄傳》、《浪子心聲》、《世事如棋》、《財神到》、《尖沙咀Susie》、《賣身契》等，其創作的作品雅俗共賞，不少流行至今。

80年代黎彼得又為張國榮填過《Monica》、梅艷芳《將冰山劈開》等都成為經典廣東歌，而他與許冠傑合作填詞的作品更是多不勝數，至今填詞量逾200首。被冠以「鬼馬填詞人」的稱號。一代詞人作品雅俗共賞，連男神黃子華都對黎彼得的才華讚不絕口。

同發哥好老友

黎彼得同發哥好老友，發哥今年年初難得返港過年亦爭取時間約好友黎彼得敍舊，二人到九龍城歎牛腩麵。發哥90年代曾經出過唱片，佢首「12分十分吋」曾經紅極一時，嗰時仲攞過音樂獎項，呢隻歌就係Peter（黎彼得）同Paco（黃柏高）一齊做策劃，所以佢同Peter咁多年嚟都keep住聯絡，一得閒就會約埋出嚟傾偈敍舊！