慶祝結婚13年！黃浩然做稱職湊仔公
撰文：東方新地 圖片：新傳媒圖片、莫家嘉Instagram、黃浩然IG、黃浩然微博
黃浩然做稱職湊仔公
其實如果兩公婆真係有暗湧，全家大小一定有影響，又點會瞞到人呢？誤傳「分」訊前後，早前就撞到黃浩然帶埋兩個仔Kayden同Ransley同家人去寶馬山醫肚，雖然太太冇同行，一家人依然樂也融融，兩兄弟玩得好開心，一睇就知一切如常不變，傳言不屬實啦！
一個打兩個，湊住7歲Kayden同5歲Ransley去街街，廿四孝爸爸黃浩然一手拖一個過馬路好細心，而兩個囝囝亦好聽話。
當日太太家嘉不在場，不過就有三父子同一男一女兩位親友，一行五人齊齊去到寶馬山一間戶外茶座醫肚。
兩公婆剛慶祝結婚13周年紀念，太太家嘉亦有po相上IG放閃。
講開又講，睇住黃浩然兩隻手各拖一個仔，過馬路、湊上車、食飯同玩一概照顧得妥妥當當，就知呢個爸爸平時都係熟手技工，合格有餘！
茶座遠離馬路，又有大片戶外空地，兩兄弟食飽後，黃浩然都好放心畀Kayden同Ransley喺視線範圍內玩耍。
玩足一個下午，黃浩然一拖二親自湊兩位老闆返歸。
結婚12年 傳老婆出軌
加入無綫多年一直搏殺拍劇的黃浩然，14年患上罕見的「貝賽特氏症」要停工養病一年，康復後他不再盲目衝刺，選擇一切以太太莫家嘉( KaKa )及兩個兒子(6歲Kayden及4歲Ransley)為重，近年索性減產減少接劇陪妻兒！雖然多年來二人一直好恩愛，但今年10月有人向多間傳媒爆料，指女方與一名任職廣告製作人的已婚男Ray過從甚密，更提供兩人親密照及疑似是Kaka與男方的露骨私訊，但黃浩然出席記招回應此事，力撐老婆…
黃浩然表示是笑料一則：「我回應過其實係一單笑料，但其實係笑料但傷害都好大，始終唔係一單好新聞，咁我自己係呢一行當然唔怕，但譬如大仔，我嘅劇集出街時我個仔都會問我尋日做咗乜，因為佢同學都會睇，會話返畀佢知，我廣告出街佢同學都會傾，變咗我擔心呢類新聞小朋友會睇到，佢哋心智未成熟消化唔到，家變實驚㗎，當然太太都會唔開心，始終唔係正面事情，自己責任要保護家庭，保護太太，保護小朋友，希望事件唔回應，冇嘢出就最好，啱啱都有人提我12月1號結婚週年，突然諗返起我哋都13年，經歷好多事，呢個係小問題，已經過去咗。」
他又指與太太的感情一定沒有問題，不希望再有類似新聞，只望事件快點完結：「識我嘅人都知我除咗開工之外，放假就陪太太同仔。」講到12月1 日係二人結婚13周年，他指因要拍劇，希望到時能抽空食飯慶祝。
事緣有人向多間傳媒爆料，指黃浩然太太Kaka與一名任職廣告界的已婚男子Ray關係非比尋常，爆料者提供幾張兩人的親暱合照，又附上疑是二人之間的大量私密短訊截圖，當中對話極為露骨，言詞曖昧，其中一截圖，女方還留言：「我需要一張床，同一個男人。」
之不過，睇番黃太個樣同髮型，張相唔似係近年所影嘅！
黃浩然 同老婆話題多多
黃浩然同老婆多年來出名恩愛，而家嘉除咗持家有道、教得兩個仔精叻乖巧入埋名校、煮得一手好菜可以開live教人之外，仲係圈中知名Stylist，咁多年都keep住咁潮，仲一手包辦老公造型。之前本刊影到黃浩然同老婆拍住拖行銅鑼灣，就見兩人雞啄唔斷由街頭傾到街尾，感情仲好過拍拖嗰陣！
黃浩然 減產陪家人
黃浩然以前是個工作狂，劇接劇日夜顛倒，終於捱出大病，4年前患上「貝賽特氏症」，此後他決心戒煙、勤做運動，亦開始注重飲食，更懂得珍惜自己及家人。年前復工後，黃浩然每年只拍一至兩部劇，其餘時間全部留給太太及兒子。由於太太KaKa做形象設計經常要周圍飛，黃浩然經常要負起照顧兒子的責任，拍劇以外，他都盡量爭取親子時間。
被迫做怪獸家長
至於升學問題，前年大仔Kayden仍在讀K3時，黃浩然曾在訪問中表示感到非常頭痛，也承認自己是怪獸家長：「有時迫於無奈要做怪獸家長，我有畀阿仔參加國語比賽，不過就唔會為入名校而幫佢報面試班，我同佢講如果間學校覺得你叻，就會考到。我寧願佢讀書讀得開心。」
黃浩然強調不會催谷兒子的學業成績，而是鼓勵他們多作嘗試：「大仔一星期有三日上興趣班，如學琴、踢足球，點知踢咗一年波就話唔鍾意，咁就唔再學。呢個世界有咁多事物，唔畀佢試佢係唔會知道鍾唔鍾意。小朋友都有壓力，即使家長唔將佢哋去比 較，佢自己亦會同身邊同學比較。」
大仔升小一有壓力
去年9月，大仔Kayden入讀傳統名校華仁小學，不過由於幼稚園就讀出名是Happy School的靈糧堂幼稚園，K3才揸筆寫字，而黃浩然沒有幫兒子在外補習，所以升小一後難以習慣每日排山倒海的功課及測驗，開學後不久Kayden曾因為功課壓力而大喊，黃浩然與太太KaKa即從旁協助，令兒子逐漸適應小學生活。
據知大仔Kayden讀華仁小一上午班，每日中午就放學回家，黃浩然會親自監督Kayden做功課及溫習，完成後就會讓兒子有自由時間，玩自己喜歡的玩具或活動。周二(19日)晨早6時半天未光，黃浩然親自帶Kayden落樓搭校車，放學時他又駕車前往華仁接放學，湊仔絕不假手於工人，而Kayden返學放學都是面帶笑容，看來已適應了小一的校園生活，很喜歡返學。
帶兩子遊園減壓
黃浩然與KaKa絕不會迫兒子做書呆子，不時安排活動給他們減壓，去年11月30日中午12時，黃浩然全家去海洋公園遊玩，可能已多年沒有踏足，泊好車後要左問右問才找到入口。現場所見，Kayden與Ransley好興奮，不時四圍跑玩盡攤位遊戲，黃浩然亦由最初見到大批自由行表現好唔自在，到最後融入小朋友世界玩得好投入，甚至像自由行般不停自拍，又買晒所有官方攝影師影的全家福。當日除了黃浩然一家四口,同行還有黃媽媽,黃浩然不時攬住媽媽拍 照,盡顯孝順一面。
自由發揮
現場所見，囝囝玩攤位遊戲時，黃浩然不會干預太多，大部分時間都放手畀囝囝自己玩，到細仔求救時，他才出手相助！
太太甜蜜餵食
行吓有小丑行近表演,黃浩然鼓勵囝囝一齊參與，全家玩得哈哈大笑，雖然攜老扶幼，但 黃 浩 然 同太太KaKa依然可以好sweet，有太太KaKa 餵食煨魷魚，個樣甜到漏。
黃浩然曾經講過，兩個兒子相當活躍，再生多個會令他噴血。當日現場所見，大仔Kayden好乖巧，眼仔碌碌好精靈，而細仔Ransley就比較活潑，聽到音樂就會跳唔停，不過兩個囝囝都好聽話，完全沒有失控的情況出現。
玩到天黑 盡興而歸
去海洋公園必搭的吊車，黃浩然兩個仔坐得好定，一齊欣賞沿途海景，不知不覺玩天黑，一家四口和黃媽媽盡興而歸。有爸爸媽媽的愛錫，課餘時間陪玩減壓，Kayden一定能適應到小學的生活啦！
