黃智雯能否擺脫「星期日女王」？《三個女人一個「因」》主角綠葉皆出色
撰文：東方新地｜圖片：劇集截圖、劇照
《三個女人一個「因」》大結局
昨晚《三個女人一個「因」》大結局，一切案件都水落石出，而黃智雯亦勇於面對自己的另外兩個人格，最後成功將三個人格融合，正正式式係三個女人一個「因」！而陳智燊亦決定主動退出成人之美，黃智雯同袁偉豪終於成為情侶，呢個大團圓結局唔浮誇亦合情理，觀眾都好滿意！
黃智雯能否擺脫「星期日女王」？
無可否認，黃智雯今次在《三個女人一個「因」》演技真的十分出色，一個人要分別演出三個分裂的人格，最重要的是三個人格形象鮮明，毫無違和感。黃智雯三個人格分別是專業而強勢的大律師Evie、狂野豪邁的playgirl菠蘿椰奶，以及膽小善良的宅女愁擘擘。黃智雯經過《三個女人一個「因」》及《雜警奇兵》，演投備受認同，相信可以漸漸擺脫「星期日女王」，嚟緊有更多機會擔正！
《三個女人一個「因」》主角綠葉皆亮眼
黃智雯今次演出非常亮眼，男主角袁偉豪其實同樣唔失禮，作為一個見習大律師，卻是市井又無賴，搞笑又得認真亦得，演出非常討好。最後Kai子終於可以同師傅有情人終成眷屬，開心晒！
袁偉豪在劇中有不少新嘗試，赤膊扮基佬、變裝扮女人等，絕對係搏到盡！
黃淑儀 魯振順 出色綠葉
黃淑儀和魯振順呢兩位演出經驗十分豐富的演員，在劇集中後段擔當著相當重要的角色，將高潮慢慢帶起，將黃智雯爸爸當年身亡之謎團逐步揭開。黃淑儀大部分時間都像是個惡毒媽媽，又疑似害死自己老公，不過其實心裏疼愛女兒，最後都與黃智雯和好如初。
魯振順的演出亦是恰到好處，飾演一位舞蹈家，同時係黃淑儀的舊情人。重遇舊情人的尷尬，仲有對黃智雯爸爸之死的內疚，魯振順亦能輕鬆駕馭。
鍾仔演忠實利迷
劇中袁偉豪爸爸「利記」呢個角色帶來不少笑彈，將死忠球迷固執的一面演得非常神似，由熟悉足球的鍾志光飾演就最適合不過。雖然鍾仔戲份唔算好多，不過角色為劇集生色不少。
歐陽一波愛講金句
老戲骨李國麟喺劇中飾演魔鬼檢控官歐陽一波，嫉惡如仇，而且不擇手段，處處針對徒弟黃智雯；不過魔鬼判官亦有柔情一面，非常疼愛兒子，最後亦為了兒子痛改前非。另外李國麟的鬍鬚造型本來已經帶點滑稽，加上佢又鍾意用英文講中文諺語，呢個設定相當有趣。
白狀夠賤伶伶夠真
多年前《超級巨聲》出身的林景程，今次飾演律師白保運(白狀)，其「狗眼看人低」的性格，刻薄得嚟又抵死，同另一位女配角林秀怡，演活一對歡喜冤家。兩人在劇中出場時間唔算多，每次出場都係鬥嘴居多，不過亦因此得到觀眾留意，希望將來有更多機會見到佢哋啦！
仲有陳智燊、郭子豪、孫慧雪及李壁琦等，多到講唔晒！
延伸閱讀：
