【是咁的，法官閣下】黃智賢同老婆恩愛27年：有共識唔生B
撰文：東方新地 圖片：新傳媒圖片、黃智賢微博、myTVsuper截圖、Instagram
《是咁的，法官閣下》黃智賢連媾兩女神
台慶劇《是咁的，法官閣下》由黃智賢擔正主演，佢繼《四個女仔三個BAR》後再做大狀，現實「桄榔樹一條心」嘅佢劇中同王君馨、麥明詩兩大女神都有感情線，認真好艷福。
上周王君馨同黃智賢嘅一場法庭離婚戲播出後，唔少人都讚好睇同有共鳴！例如君馨講「我們之間甚麼都有，就是沒有愛」、「我與你的相遇，從來都不是我主觀意願可以控制，一切都是天意」等，都演繹得非常好。君馨的演技出色，就連譚詠麟（阿倫，譚校長）都大讚劇情！他Cap晒圖並上載到社交網，仲留言：「剛剛踢完球回家看到一場好戲！」
與太太拍拖14年 結婚13年
黃智賢在《是咁的，法官閣下》婚姻不如意，但現實同任職OL嘅太太結婚多年依然好恩愛！二人自細認識，之後拍拖14年、結婚13年，黃智賢一直都好保護老婆，太太早年被傳媒追訪時，佢曾經表示：「佢係圈外人，冇心理準備，我老婆好細膽又怕醜，過往好少同佢出席首映同飯局。我作為老公要保護老婆，佢係OL唔想引起太多話題，要搞就搞我！（點𠱁番老婆？）將佢嘅相影得靚啲，唔影都影咗，可以點？」
有共識唔生B
黃智賢話同老婆結婚三年後已經傾過，諗好咗唔會生BB：「大家都知對方性格唔啱做爸爸媽媽，覺得責任好大，我哋冇呢個耐性，而且香港嘅教育制度或者社會，都令我冇安全感，唔覺得適合有小朋友，當然意外有咗又係另一樣嘢，個天畀你又唔同。我哋決定咗之後都冇再諗小朋友嘅嘢，反而會諗冇小朋友嘅好處，我覺得『無憾』就係唔好反反覆覆去後悔。」
養狗代B
黃智賢家中養咗兩隻可愛狗仔，分別係摩天使女Cream Cream同T-cup貴婦女Pepper，依家已經六歲，冇生B計劃嘅黃智賢夫婦都當正佢哋係自己仔女咁錫到燶，不過原來黃智賢當初想養嘅係大狗，會養細狗全因遷就太太：「太太驚大狗，而且細狗易啲打理，就算唔得閒放狗，佢哋都可以自己喺屋企玩。至於揀狗女亦都係太太嘅意思，因為狗女嗲啲，又得意！」
嘉穎教識打網球
黃智賢熱愛運動，接觸網球已有十年，不時相約鄭嘉穎、郭晉安等波友一齊打網球，佢話：「之前係打羽毛球嘅，但一直好想學打網球，都係識咗嘉穎之後佢教我打，最初我用咗好多打羽毛球嘅習慣打網球， 同埋好唔慣網球飛嚟飛去，估唔到個速度，依家我淨係打網球，鍾意網球夠powerful，減壓發洩好好！打波出一身汗，有傾有講， 同水準接近嘅對手打，來回板數多，好開心！」
第一代《閃電傳真機》主持
黃智賢初出道係兒童節目《閃電傳真機》嘅第一代主持，當年同佢同期嘅主持除咗有譚玉瑛姐姐，仲有「麥包」麥長青同黎芷珊，依家四人都有不同成就，各自捱出頭。
《真情》彈起
黃智賢自1995年開始演出長壽處境劇《真情》「阿海」一角，與張慧儀飾演嘅兩個角色「彩瑤」同「阿貴」都有感情線，開始為觀眾所熟悉。
《翻生武林》 演狡詐東廠
新劇《翻生武林》中黃智賢飾演東廠仇不群，將參加新晉英雄大賽嘅玉雲龍（蕭正楠飾）收入監牢，嬌鳳（簡慕華飾）救弟心切，暗中放風指客棧有隱世寶物，不群不單立即釋放雲龍，更派出左右手仇在心（陳凱琳飾）跟隨玉雲龍到客棧收取情報，此事亦引來各路隱世英雄一一湧現，各施奇謀，期間令一直尋找殺害雙親嘅仇在心發現真相，倒戈相向對付仇不群，更與玉雲龍產生感情，決心一同改革武林，令本已奄奄一息的武林再現生氣，但二人卻陷入本是慈悲老人嘅任我飛（姜大衞飾）籌謀已久嘅復仇大計中⋯⋯
