黃心穎躺著也中槍！黃心美 護妹變捉蟲
撰文：東方新地｜圖片：新傳媒圖片、Instagram
黃心穎 被家姐擺上枱
因為順得哥情失嫂意，有大熱入唔到十強，粉絲自然有意見，黃心美希望平息民情、安慰粉絲順手護主，一句「我細妹參選港姐時九成半都係負面新聞，六年後果然成為網民心目中心穎BB。」留言即時一面倒，被狂插黃心穎早前因「幾分鐘台上表現 」抽秤工藤佑采的言論，亦有人質疑心穎入行六年 最大成就只得撻著馬國明，總之網民就連珠發炮狂插黃家兩姊妹，搞到心穎躺著也中槍！
《全民造星》播出以來，不少網民藐爆黃心美扮可愛、集集喊、對住心儀參賽者狂放電行徑，她亦不諱言有心目中三甲，當中包括集集幫到出面的靚仔舞蹈員Anson Kong、肥仔及人氣爆燈的小鮮肉姜濤。
黃心美本來一番好意安慰網民，表示節目出線成敗不代表入行發展最終成就，將來一樣大把機會江湖再見，卻因為舉黃心穎做例子，反被插爆。
打溫情牌拖埋阿妹落水，網民一致倒插，話黃心穎因為幾分鐘表現判了黑面港姐工藤佑采死刑，反駁心穎入行六年除了成為馬明女友，代表作欠奉。
同場加映：工藤佑采寸爆反擊黃心穎：你係咪好耐冇見報？
2018港姐都完咗一排，不過有位佳麗似乎比三甲更多人留意，咪就係工藤佑采！工藤佑采決賽當日黑面跳舞夠晒爆，之後於網上大爆TVB選舉內幕…… 至近日港姐出身的黃心穎對工藤不留情抨擊，於是工藤又爆seed，寸爆還擊！
黃心穎 回應工藤佑采黑面
黃心穎日前出席無綫新劇《牛下女高音》飯局，港姐出身嘅佢被傳媒問到今屆落選佳麗工藤佑采，在無緣入十二強後，多次黑面出場跳舞！心穎直言呢件事上覺得對方表現不恰當，佢話選美過程的確辛苦，想當年心穎選美時每隔兩天都要應付不同項目。
問到覺唔覺得落選後，要佳麗做布景板好慘？心穎話唔覺得，因為當年是最後十強才能在決賽出現，如今20強都可以出場已經很好，何況辛苦多時，當然要在台上展現自己最好的一面，留下美好回憶才對！
心穎又透露《牛下女高音》煞科後，會放假至10月中，她說要多留時間執拾屋企，又說男友馬國明開始放大假，她希望二人多啲時間一起，又表示會一齊去旅行！
工藤佑采寸爆反擊黃心穎
被師姐黃心穎批評後，工藤佑采日前隨即網上反擊，字裏行間充滿火藥味：「你堂堂三甲香港小姐，連閱讀理解都唔識？真係叻豬！黃小姐，你唔使咁護主心切喎！」
最後一句先寸爆「其實你係咪好耐冇見報？ 所以要出嚟話一下我？」
心穎BB點回應
工藤佑采寸爆話黃心穎博見報，心穎BB接受傳媒時，表示堅持自己當日所講，要尊重舞台、尊重自己，佢唔信班落選佳麗會係最後一分鐘先知要出嚟跳舞，每個人都應該好好珍惜個舞台，留下一個美好回憶先啱。
心穎BB又補充，佢其實就唔係好知有工藤佑采呢個人，要話係借佢博見報，似乎成件事係調轉咗嚟講！心穎最後都話呢件事唔想再講落去，唔係好想同工藤佑采呢個名扯上關係！
工藤佑采連日辣火頭
其實選完港姐後，工藤佑采呢個名字似乎比三甲佳麗仲多人討論，由佢決賽當晚黑面、以至家庭背景等等。不過最爆都係工藤佑采連日喺社交網站大數TVB不是，呢個敢言舉動令佢獲得唔少支持！
港姐決賽淘汰佳麗工藤佑采
《2018香港小姐競選決賽》三甲終於出爐，不過，今次就梗係唔係同大家講三甲嘅事啦！皆因落選港姐9號嘅工藤佑采實在太搶鏡，非常之值得一提！昨晚，20位佳麗分兩組進行才藝表演，而喺第二組嘅才藝表演中，工藤佑采嘅小提琴表演認真令各位觀眾非常眼前一亮！
工藤佑采所表演嘅小提琴確係神乎其技，拉到幾乎無一粒音準之餘，仲拉到好似劏雞咁，只係難得佢仲可以咁專注同認真睇譜，十分佩服！
睇得出佢真係好落力表演小提琴俾大家聽，只可惜水準就令人跌哂眼鏡。
當佢表演完畢，相信唔少觀眾都鬆一口氣！不過工藤佑采拉小提琴拉到劏雞咁都情有可原嘅，皆因佢自稱細細個學過幾年小提琴，最近先重拾琴弓，為咗顯技，都可算勇氣可加。
表演完劏雞嘅琴技後，工藤佑采都可能自知不妙，眉頭一皺。
落選佳麗要再出場跳舞
其後，港姐12強誕生，大熱幾乎全部晉級，而工藤佑彩就無緣晉身。大會之後安排一眾佳麗以泳裝現身問答環節，而八位落選佳麗則要再出場跳舞，淪為dancers。
不過，唔知係咪同已出局同心情有所影響有關，未能晉身嘅八位佳麗皆表現牽強，跳到甩哂Beat！
工藤佑彩出局後跳舞黑面神上身
相信心情最大影響嘅就係工藤佑彩，未知係咪因才藝表演失準，未能順利晉級而心情勁唔靚，出場跳舞時佢一直黑面兼零笑容，個樣望落嬲爆爆咁。
出局後，工藤真係面對住鏡頭都唔識笑， 全程跳舞個樣都幾乎係嬲嬲豬咁！
