【安心偷食】好友黃心穎偷食人夫！同屆港姐冠軍張名雅寸爆：做人老婆咪話唔驚
撰文：東方新地｜圖片：Instagram、新傳媒
張名雅：做人老婆咪話唔驚！
黃心穎係2012年港姐亞軍，而同屆冠軍嘅張名雅都同心穎好熟，結婚當日都有請佢飲，心穎偷食安仔出事，名雅就喺ig話：「呢個世界實在太多誘惑。大家都知道是錯的，但每日依然有人犯錯或重犯。做人老婆都咪話唔驚驚。」
落選港姐工藤佑采喺ig踩一腳：「時間就是會證明一切、 什（甚）麼乖乖女、道德高地 都是假的～ 要裝就裝一輩子！ 所以我就是放棄裝、要我裝成cctv他們的乖乖女，估計是會死的、阿諛奉承的事我又不擅長！」
港姐決賽淘汰佳麗工藤佑采
其實工藤佑采同心穎牙齒印好深，點解？話說去年《2018香港小姐競選決賽》20位佳麗分兩組進行才藝表演，而喺第二組嘅才藝表演中，9號工藤佑采嘅小提琴表演認真令各位觀眾非常眼前一亮！
工藤佑采所表演嘅小提琴確係神乎其技，拉到幾乎無一粒音準之餘，仲拉到好似劏雞咁，只係難得佢仲可以咁專注同認真睇譜，十分佩服！睇得出佢真係好落力表演小提琴俾大家聽，只可惜水準就令人跌哂眼鏡。
當佢表演完畢，相信唔少觀眾都鬆一口氣！不過工藤佑采拉小提琴拉到劏雞咁都情有可原嘅，皆因佢自稱細細個學過幾年小提琴，最近先重拾琴弓，為咗顯技，都可算勇氣可加。
表演完劏雞嘅琴技後，工藤佑采都可能自知不妙，眉頭一皺。
落選佳麗要再出場跳舞
其後，港姐12強誕生，大熱幾乎全部晉級，而工藤佑彩就無緣晉身。大會之後安排一眾佳麗以泳裝現身問答環節，而八位落選佳麗則要再出場跳舞，淪為dancers。
不過，唔知係咪同已出局同心情有所影響有關，未能晉身嘅八位佳麗皆表現牽強，跳到甩哂Beat！
工藤佑彩出局後跳舞黑面神上身
相信心情最大影響嘅就係工藤佑彩，未知係咪因才藝表演失準，未能順利晉級而心情勁唔靚，出場跳舞時佢一直黑面兼零笑容，個樣望落嬲爆爆咁。
出局後，工藤真係面對住鏡頭都唔識笑， 全程跳舞個樣都幾乎係嬲嬲豬咁！
黃心穎 回應工藤佑采黑面
原本人哋落選都唔關黃心穎事，但當日佢出席無綫新劇《牛下女高音》飯局，港姐出身嘅心穎被傳媒問到今屆落選佳麗工藤佑采，在無緣入12強後多次黑面出場跳舞！心穎直言呢件事上覺得對方表現不恰當，佢話選美過程的確辛苦，想當年自己選美時每隔兩天都要應付不同項目。問到覺唔覺得落選後，要佳麗做布景板好慘？心穎話唔覺得，因為當年是最後十強才能在決賽出現，如今20強都可以出場已經很好，何況辛苦多時，當然要在台上展現自己最好的一面，留下美好回憶才對！
工藤佑采寸爆反擊：你係咪好耐冇見報？
被師姐黃心穎批評後，工藤佑采隨即網上反擊，字裏行間充滿火藥味：「你堂堂三甲香港小姐，連閱讀理解都唔識？真係叻豬！黃小姐，你唔使咁護主心切喎！」最後一句先寸爆「其實你係咪好耐冇見報？ 所以要出嚟話一下我？」
心穎回應：要尊重自己！
工藤佑采寸爆話黃心穎博見報，心穎BB接受傳媒時，表示堅持自己當日所講，要尊重舞台、尊重自己，佢唔信班落選佳麗會係最後一分鐘先知要出嚟跳舞，每個人都應該好好珍惜個舞台，留下一個美好回憶先啱。心穎BB又補充，佢其實就唔係好知有工藤佑采呢個人，要話係借佢博見報，似乎成件事係調轉咗嚟講！心穎最後都話呢件事唔想再講落去，唔係好想同工藤佑采呢個名扯上關係！
敢言工藤佑采力數大台
其實選完港姐後，工藤佑采呢個名字似乎比三甲佳麗仲多人討論，由佢決賽當晚黑面、以至家庭背景等等。不過最爆都係工藤佑采連日喺社交網站大數TVB不是，呢個敢言舉動令佢獲得唔少支持！
