黃子華60歲自小父母離異 長大侍母至孝

撰文：東方新地｜圖片：新傳媒圖片庫、黃子華FB

60歲黃子華低調過生日

除了年初《乜代宗師》之後已經無乜新消息，早兩年黃子華還會在生日出Post接受大家祝賀，不過自從《金盆𠺘口》之後已經半退休，甚少露面。

更新！相關文章：子華神60歲返老還童 青春bob頭陪蘇永康慶生年輕十年

60歲黃子華 跟隨母親生活

現年60歲的黃子華成長於破碎家庭，小時候父母離異，跟隨母親生活的他對父親認知不多，更得不到後父關心，與三名同母異父的弟妹因年紀差距太遠而少溝通，令他思想變得負面。

為了與女友過二人世界又可以方便照顧母親，孝順仔子華安排母親住在銅鑼灣，與其北角寓所只相隔10分鐘車程，平時一有空就去探望。早前本刊記者見到子華把車停泊在南華會，步行到母親家逗留了個多小時，之後再去攞車送母親到東區醫院睇急症。

陪等4個鐘

現場所見，子華侍母非常溫柔體貼，親自去登記處為母親登記，又呆坐陪足4小時等睇病，其母行路非常緩慢，要外傭扶實，入到醫院更要坐輪椅見醫生，期間黃母疑似唔舒服撒嬌，子華亦有耐性地氹她。至晚上近12時終於睇完醫生，子華駕車送母親返回自己北角寓所過夜，相信是因為母親身體不適，子華想貼身照顧對方，故決定帶她返自己家暫住。

子華與女友 同居湊狗

行年60的黃子華多年來都住在何文田，早年與化妝師女友溫安妮拍拖，他更在何文田買下一個單位送給女友並同居，當時已三十幾歲的溫安妮對婚姻有憧憬，可惜等了9年子華都不肯拉埋天窗，最後分手收場。有傳子華因此落晒形，最後送了同居的單位給女友作補償，未能忘情的他在同區租屋與母親及胞妹同住。後來情傷難癒，為免睹物思人，子華決意搬竇避舊愛，並一擲2,400萬買入北角半山天后廟道雲峰大廈單位。

4年前子華神遇到現任女友「翻版范曉萱」，婚姻觀念亦有所改變，知情者透露：「子華自細父母離異，母親改嫁後佢同繼父關係麻麻，所以佢一向唔相信婚姻，不過自從同依家個女朋友一齊，佢個人開朗咗冇咁執著，再加上佢好孝順，知道阿媽想抱孫，佢亦都想令老人家開心，所以一早畀女友入屋做女主 人，仲有結婚同生仔共識。近年身邊好多朋友都生仔，佢唔多唔少受到感染，舊年仲契埋蘇永康個仔Jazz做契仔，每次去探B佢都爭住抱，畀人笑佢想爭取機會實習，子華都笑晒好開心，睇嚟佢都會好快做老竇。」

婆媳關係好

孝順的男人特別受女人歡迎，像子華這種老公的確冇得彈，雖然有指有才華的人特別有情緒，但子華現任女友卻非常受落，甘願做其背後女人。知情者透露：「子華女友就係鍾意佢長情同顧家，對阿媽咁好一定唔會係衰男人，所以亦好體諒同配合，知道子華唔鍾意高調，佢亦冇所謂，子華覺得呢個女仔可遇不可求，佢哋相處得好舒服一啲壓力都冇，有時子華阿媽嚟過夜，女友都唔會詐型，仲好照顧未來奶奶。」

做得子華神，拍拖亦神出鬼沒，早前子華與女友帶埋愛犬外出，晚上返回北角寓所時，女友與狗先下車，待子華泊好車才一起步入電梯大堂，睇得出子華與女友同是愛狗之人，甚有愛心，二人拍拖4年依舊恩愛，子華望住女友笑瞇瞇sweet爆，第時有埋小朋友，一定非常幸福。