黃子華為趕絕黃牛黨最後一個棟篤笑加開9場

黃子華七月開棟篤笑

相隔4年子華今年7月再開棟篤笑，真係狗年一大喜訊！今次《金盆𠺘口》棟篤笑票價，比2014年嘅《唔黐線唔正常》上調不少，上次最貴飛都仲係$580，今次最貴就$880，其餘票價為$680、$480、$380、$280，唔少網民仍然準備撲飛！

而上月透過信用卡優先購票，即令fans瘋狂搶飛，一票難求！其後更加出現黃牛炒賣，而原定舉行17場騷的子華為了趕絕「黃牛」，決定加多9場，合共26場。負責賣飛的城市售票網今天宣布子華棟篤笑加場，逾十萬張門票於下周二(24號)公開發售，新增場次日期為7月23至31號，並限定每人只能購買4張門票。

貴唔緊要！作為fans好願意由正途去買門票，只係今日信用卡優先訂購，但fans話電話打唔通、網又塞死咗！但喺一票難求，未幾網上流傳有關代購嘅Whatsapp訊息，更出現炒賣門票。結果官方售票網AEG在facebook發聲明：「DBS信用卡『黃子華棟篤笑2018』優先訂票特別聲明：有客戶向我們查詢，AEG是否曾有發出過購票相關Whatsapp訊息。AEG特此聲明所有Whatsapp短訊並非由本公司及職員發出，提醒消費者勿誤信不實資訊，小心受騙。」

黃子華在同事告知下，得悉有黃牛飛炒賣，到了晚上子華終於爆了，喺佢fb拍片話：「大家好，今日發生咗啲事，今日我收到個電話，係我嘅團隊打俾我，喊晒咁樣，我就醒起係喎，今日網上預售喎，係咪因為賣飛賣得唔係幾好呢？賣得唔好都唔使咁喊㗎，哦，原來唔係，係因為黃牛嘅問題。「好多人喺網上買唔到飛，咁係唔係因為黃牛呢？可以同大家講，亦都有好多好多人係買咗飛，只不過買咗飛嘅人唔會喺網上同大家講『我買咗飛喇』咁樣，但係買唔到飛嘅當然好唔開心，但係又係咪等於冇黃牛呢？係唔係嘅。「我個團隊點解喺到喊呀？係因為一朝早呢，電台呀，記者呀各方面都搵佢，話已經喺網上，根本呢一排都有，直情係有網站，啲人喺到賣黃牛，問埋佢，嗰啲人話『係有內部渠道』，各位、嗰啲話有飛嘅黃牛，我今日為止都冇飛，我個團隊都冇飛，佢哋已經有飛，因為佢哋有『內部嘅渠道』。「我覺得係咪應該報警呀？我一路有同我嘅團隊傾呢個問題，係咪應該報警或者報ICAC呢？內部竟然有飛，係點樣得嚟？個問題係我哋冇任何證據亦都冇任何線索可以去舉報。

黃牛炒賣太過離譜

子華續說：「o依家黃牛最大問題就係，根據現有法例，唔係完全犯法，我喺度正式同政府提出，大家係咪時候正視呢樣嘢。好多時都有人覺得係奢侈品，好似iPhone咁，所以唔理你，但係到一個地步，當然演唱會唔係食飯咁重要，但好似每一次受歡迎嘅演唱會都係咁嘅時候，民間一個文娛活動，係咪應該要去正視下呢？「有啲人甚至講『係咪你呀黃子華？你自己又食又拎？一方面正式賣飛，另一方面黃牛又係你…』我喺網上睇到呢啲嘅評論，點解我團隊中有啲人會喊嘅其中一個原因，就係覺得好委屈，我第一次睇到我…其實呢個唔係第一個version嚟嘅，第一次睇到呢啲評論時，我想講嘅時候都有啲激動，係要冷靜返啲落嚟，各位，我冇咁嘅本事，而事實上我可以話俾你聽，我比任何人都覺得嬲，因為每一個表演者，我花咗咁多精神時間去準備呢一樣嘢，每日臨瞓之前我就諗緊嗰句嘢點講呢？未起身一擘大眼、半夢半醒又係諗緊嗰句嘢點講呢？我有句嘢我諗咗成個月都唔知應該係點樣講，大家都好辛苦去準備一個表演，然後就係一啲完全唔需要去付出嘅人，去賣一倍、兩倍、三四五六七倍嘅價錢，然後一啲好長期支持你嘅fans要去承受呢啲價錢，我一路都好接受世界係唔完美，但係咁係太過不完美，係太過離譜！

呼籲政府係咪應該幫吓手

「所以一方面我呼籲政府係咪應該幫吓手，另一方面，我真係呼籲一啲嘅fans、一啲觀眾，我哋就唔好買（黃牛）囉！唔好買！唔緊要嘅。即係如果我做騷有一大段位、一大堆空，最前嗰啲空晒佢…如果我見到好多場都係咁，咁即係證明好多人可能冇買黃牛喎，可能咪做番一、兩場，補番俾呢啲觀眾囉，不過可能要出年。不過出年仍然有黃牛呢個問題吖嘛！所以呢個係杜絕唔到，當你個法例唔去改變嘅時候…但我都仍然呼籲大家盡量，唔好盡量，就唔買囉！我知道咁樣講又被人鬧，然後我團隊又會崩潰，點解…我哋只係做表演啫，點解會被人鬧？」

子華神金句錄

作為表演者，睇到黃牛炒賣而無法介入，難怪子華神咁嬲嘅！

雖然棟篤笑仲未有得睇，不過子華神的金句語錄相信廣大嘅粉絲都不介意睇完又睇嘅！

「搵食啫！犯法呀？我想㗎！」
「錯就要認，要對方認！」
「損人不利己，不如跳井死！」
「大自然所有嘅動物都喺食物鏈上面。鏈嘅下層俾鏈嘅上層吃，一層一層咁鏈上去。」
「我覺得講得出『我好鍾意返工』呢句說話嘅人，一定係鬼上身。」

「香港嘅精神，就係『冇精神』。」
「阿媽標仔參，邊個畀贖金？」
「而家香港人生仔可以冇老婆，但唔可以冇菲傭。」
「而家香港嘅問題，係所謂嘅婆媳糾紛，係一種必然瀨嘢嘅關係，係咪？除非你個新抱可以喺第一日入門，就全心全意同奶奶講:『奶奶，我愛你!』」
「香港人而家打開報紙打開雜誌，就係睇緊《尋找X街的故事》。如果你起身就係要尋找一個X街，無人唔係X街，你只可以係未X街。但係你一定仆畀我睇。」

「化妝就係你落咗妝，我仲認得你，你落咗妝，我唔認得你，嗰啲叫做喬裝。」
「女人撞衫，仲大件事過撞車。」
「男人係愛情上係要求新鮮，而女人對愛情最大嘅要求就係保鮮。」
「你愛嘅，你得唔到；你唔愛嘅，你甩唔到。」
「一個男人點都會hurt過一兩個女人。但作為一個女人一世都未俾男人hurt過，咁就係真正嘅hurt啦！」

「若要人不知，唔好太低B。」
「唔在乎你有冇俾人姦，只在乎你交唔交到單！」
「比份糧你，一半係比你要嚟做嘢，另一半係比你要嚟受氣嘅。」
「我係一個無雀嘅… 唔係，我係一隻無腳嘅雀仔……」
「世事無絕對，只有無頭緒!」

「I am a man. You are a pen.」
「你食魚翅，我食粉絲；你揸Benz，我坐Bus。」
「一千幾百，猶如垃圾，富貴於我如浮雲… 但係浮雲於我如命根啊。」
「樹要皮，但人… 唔一定要面。」
「你好巴閉咩？我夠有3個C啦，CHEAP、CHEAPER、CHEAPERPER！」

關鍵詞

黃子華棟篤笑金盆𠺘口

黃子華為趕絕黃牛黨 最後一個棟篤笑加開9場

黃子華 七月開棟篤笑

黃牛炒賣 太過離譜

呼籲政府係咪應該幫吓手

子華神金句錄

熱門文章

黃子華為趕絕黃牛黨最後一個棟篤笑加開9場

黃子華七月開棟篤笑

黃牛炒賣太過離譜