麥長青上ViuTV爆在無綫不受尊重一早想離巢 麥包：被人當透明好冇癮﹗

文：東方新地 ｜ 圖：《晚吹-有酒今晚吹》截圖

麥長青心淡淪為大配角

麥包麥長青在效力無綫三十二年，由兒童節目主持做起，主持過音樂節目後加入劇組拍劇，參與過近百部劇集，2010年憑《巾幗梟雄之義海豪情》「梁非凡」一角奪得最佳男配角，不過麥包在ViuTV《晚吹-有酒今晚吹》爆料指當年其實已計劃好離巢，因為做到心灰意冷，麥包大數當年不被尊重：「 喺攞獎前我都叫做到主角之一吖，無論喺 《西遊記》、 《茶是故鄉濃》都係，慢慢去到得廿集嘅劇仲要得番幾場、得兩三集，仲要人哋係當你透明嘅，我為劇本做晒功課去問導演意見，導演一副嫌棄話得啦㗎啦，叫我錄旁白得㗎喇……我曾經鬧過一個助理編導，當年有一個老前輩嚟開工，個PA好唔尊重佢，我要謹記無佢哋就冇我哋，佢哋為呢個行業付出咗好多，我唔希望會有呢一日，點知會有一日被人咁對待，嗰時真係冇乜癮﹗」

向陳妙瑛𢱑撈搵工

麥包繼續爆seed：「 當我唔係為錢為名利，我想過吓戲癮啫，去享受吓都唔得嘅時候，咪走囉﹗所以攞獎嗰年，年頭我已經話走，我搵埋工打算轉行，我問陳妙瑛有冇工仲紹我做，佢嗰時做緊飲食叫我去幫佢手﹗…….點知﹗造物主就係咁，年頭計劃好唔續約，年尾就攞獎，以為前途一片光明啦，會有新嘅一頁啦，點知十個月冇工開，嗰時唔知點算好﹗」

靠阿Q精神撐下去

主持娟姐問麥包入行多年，試過高低起跌，在低谷時是如何面對？麥包拋金句：「我相信一樣嘢，彩虹因七色而美麗，人生因高低起跌而精彩，我相信我入棺材一刻，我有過精彩嘅人生，咁就得㗎喇，你去埋怨，人生你怨唔唔完嘅，喺呢個過程裡面，有貪心有私慾，其實係我哋喺地獄時㨂咗，投胎嗰時想試吓啲挫折，想學習愛心，你揀咗㗎嘛，跟住先去投胎﹗我係用咁樣阿Q方法去安慰自己，咁嘅方法係幾好嘅。」

爆王維基九倍高薪挖角

講番當年攞男配時，待遇會否立即不同？麥包坦言攞完男配後，獲加薪兩倍以上，麥包再爆料：「待遇梗係唔同晒啦，但係以同樣嘅底薪，嗱﹗喺呢度唔怕講啦，王維基當時搞香港電視，佢開畀我係九倍，九倍以上，但係嗰時我答應咗TVB，唉﹗人生就係咁㗎喇﹗」

與何寶生關係耐人尋味 麥包被爆當年「扮hehe」黐金糠

麥包爆料的同時，也曾經被人爆料！早前因為開舖一事捲入罵戰，有網民爆料翻麥包舊帳，指他當年「扮 hehe」接近何寶生，居心叵測，據知情者透露：

「當年麥包同寶生都係當紮小生，喺清水灣舊電視城成日出雙入對，食飯同收工都一齊，雖然當時麥包已經有女朋友，但佢同寶生嘅關係真係耐人尋味，不過大家都係覺得佢扮 hehe攞著數，最終呃唔到人都會露出真面目。」

何寶生出生大富之家，他是香港寶生銀行的大少爺，家族總資產高達267億港元。讀完訓練班簽無綫即被力捧成當家小生，憑俊俏官仔骨骨形象上位，99年麥包結婚，何寶生更擔任伴郎，不過之後關係愈見疏離，有傳何寶生在感情路上大受打擊，05年突然在大嶼山寶林禪寺出家為僧，法號道生，此後他行蹤飄忽，雲遊四海。密友關係話斷就斷，一定有原因，麥包曾被問及何寶生何去何從，亦坦言難以聯絡：「佢依家生活隱世，我同佢都係靠 email聯絡，要等佢去到一個收到 email嘅地方先會覆，不過起碼都要一年半載。」聯絡唔到抑或唔想再見，只有當事人最清楚。