麥明詩 短裙玩色誘 何浩文英雄救美
廣告
TVB劇《賭城群英會》開播至今，劇情觀眾唔多欣賞，不過爆點一浪接一浪，昨晚一集首次拍劇的「十優港姐」 麥明詩 （Louisa）犧牲色相，以短裙Look色誘由于天龍飾演的IT同事Simon套取資料，更被對方灌醉帶上房！正當Simon諗住食硬 麥明詩 嗰陣，何浩文就衝入房上演一幕老套到暈的英雄救美！
麥明詩短裙玩色誘
劇情講到何浩文飾演的瀟灑要調查梁Sir與屠東海的關係，必須進入數據房取得資料，但係數據房保安系統深嚴，必須用Simon的紋身和指紋解鎖。而 麥明詩 為了幫何浩文拎取得機密資料，就以貼身短裙look色誘Simon，自己投懷送抱，單身同佢落酒吧挑戰，諗住一鋪隊冧佢。
飲醉被帶上房
點鬼知原來Simon由細喺酒吧玩大，飲酒完全冇難度，但 麥明詩 飲咗幾杯就開始四眼昏花。Simon梗係食住個勢，周身抽水，仲帶埋對方去酒店繼續玩！觀眾就覺得麥明詩個醉貓樣認真唔掂，次次都反下白眼，對眼半開合就算。
何浩文英雄救美
入到酒店房，正當Simon諗住食硬麥明詩之際，何浩文就出現上演英雄救美，一拳打暈IT狗後抱走麥明詩，佢被何浩文抱住嗰陣仲冧到不得了！雖然麥明詩的演技平平，但話晒第一次拍劇，而且敢搏敢試唔錫身。如果大台冇咩新血，相信將來都會繼續睇到麥明詩的作品！
