麥明詩 林作 斷正撐枱腳 掟煲唔掟蓋
撰文：東方新地｜圖片：新傳媒圖片庫、麥明詩FB
麥明詩 獨家村港姐
雖然分手已經超過年半，不過麥明詩同前度林作關係就繼續曖昧，疑似掟煲不掟蓋。日前二人又單獨在金鐘約會被網民撞破，話就話朋友食吓tea敍吓舊，不過現場消息就話二人一個食飯、一個睇書，無聲勝有聲其實更有默契更似情侶。一年傳出幾次復合消息、今次更有圖有真相，麥明詩接受本刊電話訪問再次否認，斷言與林作因為了解而分開，所以不會復合。
至於林作，反應更激，出雙倍價錢懸紅杜絕網友爆圖爆料外，又自稱做過市場調查，指個人感情新聞冇網友讀者關心咁話。
林作觀眾緣係爭啲，不過無可否認可能係孭住10A高材生又高學歷港姐的麥明詩 感情狀況又確係多人關心。據知情人士透露，出身書香世代、自幼品學兼優係人生勝利組，麥明詩雖然成功當選港姐冠軍又入埋行，不過出道以來，無論異性定同性，要在電視台搵個背景、學歷相符、有共同語言共同生活圈子的朋友難過登天，所以入行三年，知心朋友無幾個、更是緋聞絕緣體，經常做獨家村，一個人划艇、打拳消磨時間，朋友圈亦兜兜轉轉發現都係同林作最啱key。
話就話「因了解而分開」，神女無心，林作同林媽媽王莉妮有心翻兜同撮合呢！
麥明詩：撐林作懸紅反爆相
記：《東地》記者｜麥：麥明詩
記：係唔係真係同林作復合？
麥：真係唔係復合，其實都回應咗好多次，呢個話題愈回應愈係沒完沒了。
記：林作話要懸紅加碼一千蚊畀網民唔好爆相爆圖畀傳媒？
麥：佢呢個主意又幾好！我覺得香港人素質唔應該係咁，冇理由為咗五百蚊去侵犯人哋私隱。
記：到底當日同林作約會做乜？係唔係單獨見面？
麥：我一直都有承認同佢有keep住聯絡，嗰日咁啱大家都得閒又喺附近，所以約埋一齊兩個人食個tea。
記：既然仲係朋友、又咁啱傾，點解唔復合？
麥：就係因為大家一齊過、了解過所以知道雙方性格同埋人生階段都唔適合，所以覺得我哋兩個都係以朋友方式共處最舒服，好過情侶。
記：分手年半有冇拍拖？
麥：我有識新朋友，佢身邊都有好多女仔出現，不過真係未搵到適合，我都唔心急話一定要有拖拍，呢啲嘢要慢慢嚟，都急唔嚟！
