自修苦讀3年！麥明詩 考獲美國執業律師牌
撰文：東方新地｜ 圖片：東方新地、麥明詩Facebook、新傳媒圖片、TVB劇照
麥明詩苦讀3年 考獲美國執業律師牌
麥明詩在入行後原來一直自修法律課程，早前佢成功通過New York Bar Exam，考到美國執業律師牌，近日麥明詩飛咗去紐約奧爾巴尼法院宣誓同拎證書，今日佢喺社交網留言：「埋頭苦幹；用時間和努力說服別人」其實近年不少香港人都希望考取美國執業律師資格，這樣便能為中國或香港的公司在美國上市、或進行合併。
麥明詩平日要拍劇、做主持、出騷，唔少人話佢當選後愈來愈瘦同憔悴，皆因從未公開提及要考美國律師牌，收工回家後仲要苦讀法律課程，真係少啲毅力都唔得！
她還去了紐約遊覽，包括世貿中心遺址，明詩還留言：「Forgive but don’t forget #worldtradecenter」
麥明詩劍橋大學法律系
麥明詩在澳洲出生，回流香港後就讀於拔萃女小學及拔萃女書院，2009年於香港中學會考考獲中國語文科和英國語文科5*級、以及8科A級的十優佳績，為當屆會考狀元。
麥明詩原本打算在香港升讀預科，但因為她在會考取得十優，已獲英國威靈頓公學 (Wellington College) 取錄，因此決定先到該校讀預科，適應英國的生活。2011年升讀劍橋大學紐納姆學院法律系，2014年取得法律學學士學位二級榮譽畢業。
她參與拍攝《星星探親團-英國劍橋篇》，帶觀眾回到英國母校，講述自己的劍橋升學之路及劍橋生的衣食住行。
《是咁的，法官閣下》 麥明詩擔正演出
新劇《是咁的，法官閣下》個劇名都特別潮，而且事前宣傳都標榜係非一般法庭劇，除了黃智賢、關禮傑、王君馨演出外，仲有如假包換大學讀法律的麥明詩擔正演出，飾演一位新晉律師，角色簡直係為佢度身訂造！
麥明詩落力宣傳新劇，仲謙稱對法律知識略有認識，同林景程開live為大家講解一下！
麥明詩專訪 大爆律師不為人知的一面
十優港姐加上劍橋大學法律系畢業的身份，曾令麥明詩受盡葡萄，最近她接受本刊專訪，大談由被批離地，到現時獲封「貼地港姐」，如何笑看網民評論！最近《是咁的，法官閣下》播出，對於有份參演今年台慶劇，麥明詩坦言有壓力：「但唔會因為係台慶劇而特別多壓力，因為係咪台慶劇都好多觀眾會留意到，做得好定唔好，觀眾自然有雪亮嘅眼睛。個壓力在於，好多人覺得我係對於法律好認識，又要拍一個同律師有關嘅劇，但其實我係無做過律師嘅!」，原來大眾的看法為她添加了壓力。
問到有有幫劇組提供法舉意見，麥明詩謙虛地說：「我就唔係話自己好識法律，但係我身邊好多讀法律同埋做律師嘅朋友，所以我比較熟悉佢哋律師界嘅style、諗嘢嘅方法同佢哋嘅氛圍。」
她更提到律師界現實的生活其實是「律師平時放咗工唔係做呢啲㗎!譬如律師放咗工落蘭桂坊㗎!」之類，更說到：「我見我啲朋友或者我喺法庭觀察過，可能佢哋英文都未必好流暢同自信，我喺呢方面畀到佢哋比較真實啲嘅分享。」，原來實際上是與大眾的想法有異。
講到麥明詩有份主持的《 後生仔傾吓偈》中，一向給人感覺說話大膽的印象，她則馬上如律師上身為自己辯護：「我本身講嘢都係比較大膽嘅，有少少關我讀書讀法律事，我哋讀法律，有好多嘢平常人唔會講，但我哋會講得好露骨同好具體！」
馮盈盈發表「港姐公廁論」
馮盈盈曾在《後生仔傾吓偈》中，陸浩明提到做女人的好處，其中一個就係嫁入豪門會俾人話係「做少奶奶」、等，相反男仔就會俾人話入贅、「食軟飯」。點知港姐出身的馮盈盈同麥明詩就搶住大叫，表示如果港姐嫁有錢人， 就會俾人話「睇死佢鈞金龜」、「係雞」等難聽說話……
咁都仲未夠，馮盈盈仲突然補多一句：「公廁！」自己身為港姐冠軍，竟然將呢啲網絡用語拉埋同港姐嚟講，佢都算係「神奇 頂級 超卓」～
點睇「港姐公廁論」？
麥明詩馬上說：「我要為我同我拍檔重申一次，其實我哋係唔認同，我哋當時只不過係引述有一啲人咁講，而我哋覺得佢哋咁講好唔公平。」，同時又舉例指：「有啲女仔決定搵一個叫做經濟有基礎嘅男士，咁就畀人話係嗰個term，我哋就覺得做女人點解成日畀人話、好唔公平，所以我哋其實係想指出呢件事幾咁荒謬，因而引述咗呢個term!」，重申自己與馮盈盈皆不贊同這種看法。
16年以舊生身份重返校園拍《星星探親團英國劍橋篇》被批離地，「嗰時梗係唔明白，尤其當時我仲係新，都唔知個環境係點，亦都好多嘢係同幕後嘅配合，但作為幕前嗰個，當件事唔好，都要有承擔。當時感受係唔緊要啦，條路仲有咁長，好多時間去令觀眾認識我嘅!」。
如何面對網民輿論？
麥明詩提到現在以什麼心態面對網民輿論，她直言：「好多人有好多批評，有時聽係唔舒服，但有時佢批評個原因未必係你有問題，可能係佢哋對某啲事情嘅不滿，或者站喺某一個立場。可能佢同你站喺一個相反嘅立場。」
她續指：「如果了解咗點解佢有呢個立場同因為呢個立場而講呢句說話，自己會無咁辛苦之外，亦都可以盡量對於唔同立場嘅人，有更sensitive嘅表達方式。」，看來她於娛圈日子久了，有了一番新的體會。
麥明詩入娛樂圈三年，她坦言從無法掌握網民口味及玩法，皆因：「佢哋口味同埋玩法係好似天氣咁，好難預 計嘅，佢哋嘅玩法係天時地利人和，關乎政治環境、社會、 佢哋本身嘅個人經歷我覺得亦唔需要計，既然都計唔到，不如做自己算嘞!唔好諗咁多，想講就講，覺得好笑、值得分享嘅就講。」，依舊決定做最真實的自己！
新劇《 殺手》演盲女
麥明詩最近忙於拍新劇《 殺手》，提起她於新劇的角色會是忠是奸，她笑言：「我呢啲畀人殺嘅啫，最開心就係有機會同祥哥(黎耀祥)合作做父女，佢就係殺手，我係盲嘅，我盲嘅原因係因為佢導致到有啲仇家嚟，傷害到我，所以呢段關係好複雜，但又好有味道。」
首次扮演盲女，她指今次角色非常之具挑戰性，怕因好多自然的反應都不可以做，坦言：「對眼又變到好無神，哈哈! 同埋我呢個角色仲要彈琴，我本身都識識地嘅，但好多年無彈，突然間要練番，都要下一啲苦功，同埋要喺唔睇住鍵盤嘅時候都彈到琴，其實都係幾難嘅。」，有挑戰才會有進步。
拍過五部劇集四部電影的麥明詩提到自己最想演的角色，竟然會是著制服的紀律部隊，說到：「好多人覺得我外形比較溫文爾雅，但其實我本身個人都 tough同粗魯嘅，我覺得幾適合。」，未知大家又覺得她若扮演紀律部隊的角色相不相襯呢？
麥明詩被Do姐窒到口啞啞
講到今年港姐泳裝問答環節，麥明詩與馮盈盈負責其中一個問答環節，並配合Dodo姐。當11號李明芙（Samantha）出場時，麥明詩負責問問題，問及關於公平的問題：「香港小姐得女仔可以參加會唔會唔公平？」起初Samantha都答到問題。但其後麥明詩追問：「如果邊個佳麗當選咗你會覺得唔公平？」Samantha開始支吾以對，流露出尷尬嘅神情。Dodo姐見到Samantha面有難色，梗係馬上化解指：「唔洗逼住揀一個㗎。唔一定唔公平㗎嘛。」
點知麥明詩好似唔知Do姐係喺度俾落台階Samantha，反而向Do姐講：「Dodo姐咁nice嘅，我覺得好唔公平呀！我之前參選都冇咁樣…」隨即Do姐話麥明詩：「仲想點呀！你係香港小姐嚟㗎嘛！」結果窒到麥明詩只識得尷尬笑，但就令全場歡呼！
當重提麥明詩今年首次做港姐司儀，她笑言當晚並不覺得太緊張，因為自己不是參選港姐：「同埋，都知道Do姐(鄭裕玲)喺度，佢點都會主持大局鎮住個場！」，有經驗豐富的Do姐坐鎮，麥明詩當然放心！
她續指：「其實喺個問答環節，我哋同幕後係特別落咗心機，希望喺每個題目都突顯到個女仔嘅一啲特質，我覺得有一啲女仔亦都把握到呢個機會去 show off到佢哋嘅長處，所以我係開心做到呢件事。」，作為師姐，都希望可以於電視前將一眾候選港姐最好一面帶出來。
提到她自己當晚表現如何，麥明詩坦言：「有啲位的確係臨場反應唔夠快，拿捏個位其實係難嘅，我哋係負責問答，到邊個位幫佢打圓場其實係一個藝術嚟，因為如果咁啱嗰個位佢係想答，但你又阻止咗，其實亦都係剝奪咗佢嘅機會，但如果佢答唔到你又幫唔到佢，亦都會令件事無咁順暢，我當晚係有咁嘅情況。」。
由於自覺未能拿捏得當，故再次指：「好彩Do姐喺度，Do姐有幫手，最尾Do姐都話:『比起綵排進步咗好多!』咁我就開心嘞，哈哈哈!」，未知若然下次再有機會做港姐司儀，她又會否比今次淡定更多？
對於麥明詩一向有貼地、敢言的形象，事實上是她希望給大眾一個這樣的形象，抑或是真實的自己，她表示：「其實我係想可以做到自己，我覺得有咩唔可以講啫?大家就算唔做，攞出嚟傾吓、幻想吓都好吖!」
她續說：「其實我講嗰刻，我無諗自己係敢唔敢講，我講嗰刻我就係講 囉，件事係咁發生我咪講，我係咁諗我咪講譬如《 後生仔傾吓偈 》，唔係淨得後生仔睇，都有好多唔同年齡嘅階層睇，個平衡要攞得好準確。」，直指希望觀眾給予更多時間讓她能於幕前從錯誤中學習及成長。
問到她現在行的路是否如其所願，她說：「我參選之後入行，無好明確覺得我五年或者十 年之後會點，如果我做 一份文職或者係一個律師去，我好肯定我會揀依家呢一個職業，所以當諗到呢點，我就會重新有動力去克服更多嘅困難！」。
至於有無計過做藝人搵錢多啲定係律師搵錢多啲，她則直言自己的確有計過，而且話：「呢一刻係做藝人係多少少嘅，但如果計三十年嚟講，就好難講嘞，因為始終律師係會愈做愈賺得多，但藝人好難講，所以如果你計成個人生歷程，可能打和啦!」，一聽之下又似言之有理。
依家感情狀況係點？
爽直的麥明詩指：「我感情狀況係好積極咁搵緊新嘅感情！我依家學識珍惜人與人之間每一段關係，每個人嘅連繫都好特別，如果拍拖唔適合嘅咪試吓可唔可以做朋友囉！我自己又無好care人哋點去諗，我自己清楚就OK！」，果然很清楚地表達出來。
至於現在與前度林作是什麼關係，她馬上笑指：「都係朋友!始終都係行內，大家都叫半同行，嘻嘻嘻!」，輕鬆回應一切。
有咩擇偶條件?
十優港姐是否好難追？麥明詩則笑稱：「唔使靚仔嘅!我鍾意funny，幽默感好緊要，同埋才華，才華係好吸引到我，才好廣泛， 可以係佢識作詩、對於天文地理好熟悉又好，或者啲gag好好笑，都係一種才，而當佢騷到佢種才，我係好仰慕嘅，我就會好興奮！」，是這樣的男生請自動現身。
她更說若然拍拖的話不會特登公開，指：「但如果畀人見到我都無辦法，上次就比較多人知，就發覺當好多人知，點都會令兩個人有壓力，所以我開始明白點解有啲藝人鍾意低調啲、唔交代咁多。」，體會多了點，人便成熟多一分。
至於想找個圈外定圈內的對象，她笑言：「我都想搵圈外人，當然如果圈中人啱，我都唔介意！如果同番自己圈內嘅人，我驚自己嘅眼界會變得好狹窄，我覺得做人係應該嘗試同一啲唔同嘅人去交往、去做朋友，因為自己熟嘅人，講嘅嘢梗係互相認同，咁大家咪無一個新嘅協同效應」，的確如是。
另外，再問到她心中有沒有結婚時間表，麥明詩坦言：「無！媽咪就反而成日催，但我會話:『 我仲咁後生!』」，就趁年輕，讓自己慢慢於世上尋找人生最心儀一位，又何嘗不可？
麥明詩於新劇《 殺手》演咩角色？
麥明詩最近忙於拍新劇《 殺手》，提起她於新劇的角色會是忠是奸，她笑言：「我呢啲畀人殺嘅啫，最開心就係有機會同祥哥(黎耀祥)合作做父女，佢就係殺手，我係盲嘅，我盲嘅原因係因為佢導致到有啲仇家嚟，傷害到我，所以呢段關係好複雜，但又好有味道。」
首次扮演盲女，她指今次角色非常之具挑戰性，怕因好多自然的反應都不可以做，坦言：「對眼又變到好無神，哈哈! 同埋我呢個角色仲要彈琴，我本身都識識地嘅，但好多年無彈，突然間要練番，都要下一啲苦功，同埋要喺唔睇住鍵盤嘅時候都彈到琴，其實都係幾難嘅。」
