高海寧久違的性感鬥中門大開陳敏之

高海寧陳敏之鬥性感

昨晚一眾藝人到上環出席餐廳開幕活動，人人盛裝打扮，不過就被高海寧及陳敏之搶晒鏡，瘋狂謀殺菲林！咪神高Ling以一襲低胸緊身短裙示人，谷出深長事業線，下半身則晒修長美腿，索呀！而人妻兼人母敏之則大Deep V中門大開，勁呀！

高Ling接受訪問時表示，呢條裙佢其實已經買咗好耐，今日終於有機會著，而且自己除了TVB台慶外，已經多時未有作性感打扮，竟然有少少緊張！佢笑說有人問佢凍唔凍，但其實佢緊張到出晒汗，又不時都會低頭望望，確保無走光。

其實呢晚高Ling男朋友鄧智偉亦在場，佢表示自己係透過經理人獲邀，而男友則受餐廳老闆邀請，所以未有合照及一同受訪。

「索腿天后」陳敏之同樣非常性感，Deep V落到肚臍中門大開，但佢就自嘲冇嘢好睇，得排骨先咁夠膽咁著！另外敏之又笑言成為人母後更勇於性感上陣，以前驚自己著得唔靚，依家女人味濃反而OK！

今年視后大熱之一的李佳芯(Ali)亦在場，提到早前其Instagram突破70萬粉絲，所以發放「福利照」答謝粉絲，Ali表示都唔係咩福利，只不過係前排去浸溫泉影的，大家都知佢唔係走性感唔線。Ali又透露最近IG突然多了不少followers，但佢對此冇咩追求，亦強調唔係「買粉絲」。

南京姑娘高海寧今年31歲，喺十年前參選2008年港姐競選，由於身材實在太突出，高Ling入圍不久已經備受關注，並被外間視為大熱。最後高Ling三甲不入 (三甲為張舒雅、陳倩揚及馬賽)，不過隨即成為無綫旗下藝人，踏入娛樂圈。

既然身材係最大賣點，高海寧當然唔會吝嗇，次次見人都谷到盡，2009年時高Ling去泰國拍攝《美女廚房》特別版，著住低胸吊帶背心的高Ling被象鼻夾起，洶湧上圍即「奪衫而出」，非常誇張，堪稱經典！

高海寧出道後幾乎與「咪神」、「性感女神」劃上等號，無論出席活動、拍戲拍劇集還是綜藝節目都定必性感示人，大家亦清一色將焦點集中在其身材上。

高海寧近年開始漸漸收起性感，佢希望大家唔好過份注重係佢身材上面而忽略佢演出嘅努力，雖然「封胸」導致佢少咗工作機會，但係佢就話唔介意有一段時間可能會失去一啲job或者角色，因為唔跨過，永遠都唔會有進一步嘅路、行得再遠啲。

雖然高海寧唔係話包到實晒，久唔久都輕輕晒身材，不過相比以前已經保守咗好多啦！

高海寧工作向來不錫身，毫不吝嗇大晒豐滿身材，難免令人有啲負面印象，但其實佢係圈中出名的孝順女、好家姐！高Ling永遠把家人放在首位，每逢大時大節都一定將時間留畀家人，聚埋一齊食飯，更不時於網上分享家庭照，非常孝順！

高Ling在娛樂圈打滾多年，一直願望儲夠錢買樓同家人同住，佢2015年時買入油塘一個新盤單位，去年終於由買家變業主，正式收樓，難怪與家人一起興奮晒V！

高Ling時常惦念遠在南京的婆婆，就算要拍劇的時候都會趁空檔跟婆婆視像通話。放假時，更加會飛返去南京探婆婆，仲話見到婆婆的笑容就乜都值得！每次一談起外婆，高ling總顯得特別感性：「你陪我長大我陪你到老」，亦祝福婆婆健健康康，可以繼續陪著佢，這份跨越兩地的婆孫情實在教人感動。

關鍵詞