馮盈盈升呢請助手出手闊綽 帶助手到名店揀聖誕禮物
助手尊稱馮盈盈做「女王」
馮盈盈近月新來女助手，她直指做她助手幾乎要萬能，無論開工及生活都要照顧得妥當，連入公廁都要助手陪住，原來是助手負責拎住香薰，可令她如廁時感覺良好一點﹗雖然做佢助手乜都要做，不過馮盈盈對助手亦好闊綽，近日她正忙於拍攝新劇《智能愛(AI)人》，日前在元朗外景收工，馮盈盈即孖住助手直駛到名店Fendi掃貨，馮盈盈即場買了一個價值2萬3千8的白色的Baguette手袋，同時對助手亦好豪爽，送了約2千元的戒指給對方，在其助手的IG即時動態中表揚這位好老闆，並寫到「開心，聖誕有新袋袋，and she bought me a x’mas present」，提前送聖誕禮物畀助手，真係最佳顧主﹗
馮盈盈請助手要求超多要陪去廁所
馮盈盈近來深受廣告客戶歡迎，在疫市下不減反加價，據知在社交網出post價高達10萬，吸金力直迫廣告女王李佳芯。所以馮盈盈好努力經營其社交網，連揸車的時間都都唔浪費，日前在元朗收工，在車程中由新請的女助手協助下開live，馮盈盈邊揸車邊答網民問題，保住網上人氣高企﹗
馮盈盈揸車開直播
馮盈盈近來頻頻開live同網民交流，繼早前直播開餐後，日前由元朗收工揸車返歸時，馮盈盈亦爭取時間，在車內開live，由新請助手讀出網民問題，馮盈盈則邊揸車邊回答，不少網民對馮盈盈近來請了助手相當關心，不少網民對助手平日的工作相當感興趣，馮盈盈即一輪嘴話：「我助手好多嘢做㗎，好似依家咁要開live啦，平日我開工好需要助手照顧我，例如補妝啦、化咗妝飲嘢要用飲管啦，所以佢隨身要有粉餅、唇膏、鏡、牙簽、飲管，仲有紙巾呀，平時尿袋要叉足電，仲有我啲隨身物都畀佢keep，好似車匙、電話、劇本等﹗」
要求助手陪入廁所拎香薰
馮盈盈又指近來出post的靚相都出自助手，指她影得有水準，所以助手要相機隨身，幫馮盈盈拍攝生活日常、拍攝花絮，以便她出帖之用，馮盈盈更透露助手相當重要，一定要求助手陪去廁所，原因是她要求助手：「要佢幫我拎住個廁所香薰，等我去公廁嘅時候，感覺會良好啲嘅﹗」
有網民指做馮盈盈助手相當不簡單，工作量大，問做她助手有乜福利，馮盈盈即笑住對助手話：「喇﹗你（對住助手）同我瞓過兩晚啦，陪我喺酒店房瞓過兩晚啦﹗」原來做馮盈盈最大福利是可以陪瞓，相信好多宅男爭住搶呢份工﹗
馮盈盈自爆白滑腿秘技
馮盈盈身穿白色短褲，被網民追問唔怕凍？馮盈盈即解釋雙腿脂肪夠所以不怕冷，另外是因為方便換戲服：「有時外景換衫地方都比較狹窄，所以著短褲比較方便，她又自爆：「仲有就係因為大家見到女藝人啲腿好滑淨，係因為化咗妝，咁冇理由對腳化咗妝然後著長褲咪會整甩啲粉囉﹗不過我真係試過未幫對腳落妝上咗床，搞到床單都係粉﹗」
