林子善馬爾代夫影婚照 孖老婆晒肌放閃
撰文：東方新地
林子善 為婚宴豪使百萬
35歲林子善由去年2月6日向Kary求婚成功後，籌備逾一年，直到今年4月將於將軍澳一間酒店筵開50席搞婚宴，期間豪使近百萬港元，林子善話因此要努力賺錢：「我同佢講『你想點就點，幾多錢話我知！』，一生人一次想佢最鍾意，我個人冇所謂！」
去年10月16日，林子善和Kary正式簽紙結婚，其後兩人就豪花十多萬到馬爾代夫拍攝婚紗照，再去泰國旅行。子善表示：「今次去咗四日三夜，一拍完新劇《果欄中的江湖大嫂》就起行，但因為陽光有限，所以時間好趕，仲忙過拍劇！」
甜爆放閃：「老婆要靚最緊要」
雖然婚紗照中林子善一身健碩肌肉勁吸睛，不過他就搞笑話：「請大家將注意力集中放在我漂亮的寶貝身上，在她身邊的男人只係窮到衫都冇得著而已！不需要有評論，我心裏她任何嘢都是最好的，正所謂『新人去影婚紗照，老婆要靚最緊要』！」
彩虹下的完美婚照
幫林子善影婚紗相的攝影師Jack Tang話在馬爾代夫拍攝時天氣時好時壞，令他非常擔心，幸好雨過後見彩虹，為子善帶來完美的婚照：「傳聞見到彩虹會帶來好運，祝福呢對好襯好夾嘅情侶！！之後全日影相都好天氣，真幸運！！」
摩天輪下求婚
去年2月6日在日本東京台場摩天輪下，林子善化身Kary最愛的卡通人物「阿拉丁燈神」，並將價值近20萬元的1.6卡鑽戒放在「神燈」中跪地求婚，令Kary感動爆喊，但仍慳家地質問子善隻戒指「點解買咁大隻？」跟住仲伸咗子善兩腳！不過事後Kary仍感動表示：「天寒地凍，呢個傻佬扮鬼扮馬，又扮派傳單，同班朋友攪呢件咁夢幻件事，真係好驚喜，我超鐘意！呢件心意我會永遠記住，LOVE U！」
註冊結婚 有傻人終成眷屬
林子善和太太Kary在10月16日註冊結婚，成為人夫的林子善與老婆鬼馬合照，被太太勾着鼻子走，原來喻意係聽晒老婆話！林子善留言話：「20171016之上路，有傻人終成眷屬，一起踏上婚姻之路。」其實近日忙於為新劇《果欄中的江湖大嫂》拍攝的子善，原來之前一晚仲通宵趕劇，瞓得咁少都抽空去註冊，與Kary正式成為合法夫婦，認真抵錫啦！
4月補擺酒唐詩詠做「兄弟」
林子善同太太Kary今年4月將會在將軍澳一間酒店舉行婚宴，大約筵開50席。子善表示婚禮已籌備得七七八八，到二月份就全力搞婚事，結完婚就開工或者陪太太去旅行。林子善圈中出名人緣好，他自爆兄弟團人選，可謂粒粒皆星！有鄭嘉穎﹑馬國明﹑黃嘉樂﹑唐詩詠、黃嘉樂、黃長興同袁偉豪，佢仲透露唐詩詠當日會著西裝做「兄弟」！
婚禮請埋星爺
另外星爺周星馳可算係子善的啟蒙老師，那些年只有16歲的子善參加電影《喜劇之王》試鏡，有幸被星爺睇中，扮演黑社會角色「洪爺」出位，成功喺觀眾心中留下印象。子善揚言婚禮一定會請埋星爺，不過都明白對方貴人事忙，未必會到。
