新劇煞科 恨賺外快 馬國明：阿媽話唔夠錢使⋯
馬國明今日出席新劇《C9特工》宣傳活動時，被問到有冇受「大哥」鄭嘉穎結婚而感染，馬明坦言冇，因為要儲老婆本，又話依家最想嘅仲係儲多一嚿錢去買樓收租⋯⋯
撰文：東方新地 ｜圖片：新傳媒圖片
馬國明： 先儲錢買樓再結婚
馬國明、高海寧和黎諾懿拍完新劇《C9特工》，三位男女主角出席宣傳活動時話台前幕後食飯，馬明話最只要大家開心，佢都會酌量飲少少酒搞氣氛，馬明又話套劇煞科，終於可以接外面嘅工作搵吓外快，話要彌補撞期推掉的工作！講到早前出席鄭嘉穎婚禮，問佢係咪賺錢娶老婆？馬明說：「冇，唔關事嘅。我冇嘉穎大哥咁有錢，要儲吓先。」
馬明又笑話：「阿媽大使咗，話唔夠錢使喎，物價都升咗好多，(媽咪有冇幫手儲老婆本？)我自己儲，我比較蠢，唔識投資，聽講近排樓價跌咗啲，家姐還有首次置業名額，可能會同佢夾錢買個細單位收租當儲錢，始終磚頭最穩陣。」
馬明笑言峇里之行與林子善同房，故完全提不起勁游水：「我唔慣同男人游水，我都有坐喺櫈度睇佢水中撥頭髮，但會喺度幻想，點解唔係女仔呢？就咁度過咗兩三日。」因住心穎聽到扭耳仔呀！
為父母 豪擲$2000萬買複式單位
馬明長大後樸實又慳家，出道頭幾年一直冇買車，也甚少搭的士，多數會由住處搭地鐵去將軍澳站，再轉乘廠車到電視城返工，早年才買入四驅車，直至早前馬明以八十萬買入Benz，換掉駕了多年的四驅車，馬明說買車也只為全家放假郊遊。
馬明與父母同住太古城多年，本身住所已是父母的物業，但前年他再花1,960萬買入頂層複式的過千呎單位，花過百萬裝修後最近已入伙。爸爸退休、媽媽係家庭主婦，馬明指自己依家算有點事業，可以讓父母依頼，很有滿足感。為了賺錢供樓，馬明馬不停蹄，頻頻工作。但放假時亦會陪母親逛街，認真孝順！
馬國明：最愛繑著媽媽手臂行街
所以馬明話阿媽大使咗，都係講笑啫！話馬明好仔不無原因﹐佢曾經講過自己係好顧家嘅人，一切以父母為大前提，搵女友首要條件都要與家人相處融洽，婚後亦希望和家人同住。而到現在他仍很喜歡繑著媽媽的手臂行街，馬明曾說過：「12、13歲時怕被笑不成熟而不敢繑，其實只有不成熟才會怕。」但原來馬國明年少時把屋企看成酒店看待，回家不是吃就是睡。直至移民加拿大，全家只得他一個男丁，責任感才慢慢培養而來。
馬明當年初戀在加拿大讀大學時發生，因為女友要去多倫多讀書，雖然馬國明想過跟女友一起去，但因爸爸做太空人留在港工作，而兩個姐姐已在另一個埠讀書，馬國明想到得媽媽一個女人孤伶伶在家，怕她寂寞，所以最後決定留在溫哥華讀書，和女友相隔兩地，結果初戀維持約一年便無疾而終。
曾揚言婚後與家人同住
馬明曾經講過一切以父母為大前提，搵女友都要與家人相處融洽：「我係一個好顧家嘅人，所以做我女朋友，首要條件唔係靚，係要同我家人相處得來。我爸爸同媽媽出名好相與，如果結婚唔可以同父母一齊生活，咁就係女仔有問題，有問題就唔會結婚啦！我本身又唔煙唔酒，所以我接受不到女友食煙及劈酒，因為我唔鍾意煙味酒味。」
了解期完結
16年馬明與心穎被爆撻著，即使多次被斷正約會，二人依然矢口否認戀情，只表示在了解中，隨住去年拍《深宮計》，二人日見夜見又去橫店拍外景，感情大躍進。雖然期間曾有傳心穎有離心，但最後都是情歸馬明，戀情愈見明朗化。
心穎今年一月與家人提前到尖沙咀1881慶生，當晚全家影合照，馬明亦在內抱實二家姐個細B，可見馬明早已融入黃家。
未有愛巢可以讓馬明心穎過二人世界，他們除了外遊，拍拖節目就只有行街睇戲食飯。之前6月心穎出席《深宮計》活動，當日馬明因離港拍劇未有現身，心穎於活動後由公司保母車送返家，到傍晚時份，馬明突然駕車出現心穎寓所樓下，未幾心穎落樓開心跳上車，二人去九龍塘又一城拍拖，撐完枱腳直落行街睇戲，期間見二人同戴之前買的20萬法國名牌Boucheron訂情鑽戒，而心穎所穿的波鞋亦出自名牌Balenciaga，價值七千幾元。
二人在打扮上絕對是襯到絕，馬明看上去亦年輕不少，不過他似乎不太習慣戴住大大隻戒指，後來在停車場發現本刊記者，更刻意把手插入褲袋，不想讓情侶戒曝光。為冧心穎投其所好都係想令女友開心，睇嚟馬明都盡晒力，希望佢嘅付出好快就有收成啦！
20萬訂情鑽戒
最後心穎買咗少少精品同環保口罩，馬明識做地畀錢同拎戰利品。就係呢個時刻，二人被發現戴上情侶鑽戒，這對鑽戒出自法國品牌BOUCHERON的QUATRE系列，冇鑽石都閒閒地要7萬一隻，馬明同心穎兩隻都鑲滿鑽石閃爆，價值約20萬一對。
行街shopping
食飽飽行街睇精品，馬明同心穎一齊揀遮，有商有量好合拍。
心穎今年29歲生日，在IG上載一張寫有「Happy Birthday Sum Wing BB」的單人照，之後黃長興玩「踢爆」晒出三人自拍照，相中馬明與心穎臉上同樣流露甜蜜表情，罕有地高調放閃。早月《學是學非》好姊妹湯洛雯生日搞party，心穎亦帶埋馬明出席，感情已穩定到一個點。
不愛夜蒲閒時踢波做義工
97前移民潮，馬明爸爸做「太空人」，媽媽陪兩女一子到溫哥華移民讀書，馬明是家中惟一男丁，所以所有粗重工夫如剷雪剪草都由他包辦，因做工程師的馬爸爸很希望子女都大學畢業，結果馬明揀在UBC機械工程系讀書，多年來看見爸爸努力工作辛苦供養三姊弟，去市區玩的車程加上住得遠所以馬明怕花費而甚少外出，偶爾會兼職幫補，這樣的生活直至畢業，亦因此養成不愛蒲的性格。而平日馬明不用開工的娛樂，除了踢波和陪家人，就是去做義工。
馬國明揀出十大TVB女神
靚女人人都鍾意睇，但係人人心目中都有唔同標準，馬國明早前接受傳媒訪問，佢就以圈中人身分揀出十大TVB女神，唔知馬明的心水大家認唔認同呢？馬國明笫一個人選竟然唔係女友黃心穎！佢首先講咗幾個名，分別係朱千雪、李佳芯、岑麗香同張曦雯，呢幾個靚女應該無人有異議啦。
朱千雪
李佳芯
岑麗香
張曦雯
黃心穎
之後剩低嗰六個，佢話點都會留個位畀心穎喎！
唐詩詠
張寶兒
黃翠如
朱智賢
陳凱琳
嘩，有幾個都係佢老死嘅女朋友嚟㗎喎！唔通真係「朋友妻，咪走雞」？馬明唔係啲咁嘅人嚟㗎，佢解釋話揀晒朋友嘅女友，咁就唔使得罪人啦！馬明唔止係最佳男朋友，仲係最佳好朋友啊！
