下個月預產期 李亞男曬大肚照被網民激讚陀得靚
撰文：Sunday Kiss | 圖片：李亞男 IG | 編輯：東方新地
李亞男曬大肚照被讚陀得靚
今日（16日），李亞男貼出自己的孕照，表示同肚中的小baby girl去聽音樂會，實行音樂胎教，仲話囡囡好鐘意聽音樂（Bringing baby girl to a concert.she really loves music）。網民都大讚，媽媽陀得好靚，好期待「小祖藍」出世。唔洗急，大家好快就知道BB，似李亞男定王祖藍喇！
李亞男經常笑言丈夫基因太強，如果生女似爸爸就大獲，但真係係囡囡呀！李亞男在個人Instagram上載了一張孕照，肚上就用粉紅色寫了「Baby Girl」，留言指：「今日小公主陪我開工，佢好乖！」
網民得知李亞男陀B女後，紛紛留言指希望不要像爸爸王祖藍，更有粉絲指會天天替李亞男祈禱：「拜託要像媽媽！」
胎動似攪肚痛
李亞男有咗4個月時，狀態仲好好，冇增磅，冇腰痛，又冇乜作嘔作悶，胃口都OK！不時仲去行吓公園，希望對將來順產會有幫助。
李亞男話，初初感受到胎動嘅時候，感覺好奇妙，好似攪肚痛咁！
李亞男：BB好錫媽咪
有網友就關心懷孕初期的李亞男早上有沒有晨起嘔吐、噁心、喜食酸物或厭油膩等妊娠反應，李亞男就表示，BB好錫媽媽，佢暫時都未經歷過孕期的任何不適，只會每日覺得好攰，又會頻頻「尿尿」。
陳美詩 陪李亞男扮大肚
陳美詩早前約咗好友李亞男聚一聚，見Macy企喺大肚婆李亞男身邊，塞咗嘢喺肚，仲齊齊摸住自己個肚，不過網友都笑Macy個肚好假，叫佢同孫耀威努力，早日做個真媽媽！
李亞男懷孕期間好胃口，而且肥胎唔肥身，不過準媽媽不論高矮肥瘦都有機會患上「妊娠糖尿病」，所以日前李亞男去做產前檢查，進行口服葡萄耐糖測試(飲糖水測試)，診斷有否患上妊娠糖尿病。因為杯糖水係極甜極難飲，但為咗bb同自己健康都要飲清光，所以話做媽媽真係好偉’大！
李亞男大晒5個月弗爆大肚相
早前李亞男宣布為老公喜陀B女，陀B近5個幾月嘅亞男就上載最新大肚相，兼留言：「好期待見到我的小孩！我坐下時她經常踢我。」見到佢著上短身黑色上衣，晒出肚皮，但仍見其手腳依然纖幼，下巴亦尖尖，明顯是個靚媽一名！
唔少網民見到亞男最新的陀B相，都紛紛留言讚她是個靚靚孕婦。
另外，亦有網友指BB一定似爸爸祖藍一樣咁調皮，亦有網友笑言B女可能好叻踢足球，所以先會經常於亞男肚大踢媽媽。
李亞男正式宣布陀B女
李亞男在個人Instagram上載了一張孕照，肚上就用粉紅色寫了「Baby Girl」，留言指：「今日小公主陪我開工，佢好乖！」
未決定順產定開刀
李亞男話而家仲未決定順產定開刀，因為王祖藍實在太忙喇，怕BB出世會撞正爸爸要開工，如果開刀嘅話，爸爸就可以提早請定假！
溫哥華探嘉欣
已經陀B四個月過咗穩定期，七月初亞男飛溫哥華探家人，此行還順道向正在陀第二胎的好姊妹鍾嘉欣取經，日前亞男就晒出同嘉欣在溫哥華公園，兩人互摸對方個肚的溫馨照片，已經陀B四個月的亞男，著住One Piece牛仔裙亦可見個肚已經有番咁上下份量！
減少內地工作
據知情者透露：「亞男啱啱有咗嗰陣，因為祖藍仲拍緊《奔跑吧兄弟6》，之前又接咗唔少工作，佢一路都唔放心，就派屋企人日日去佢屋企睇住老婆，雖然細佬已經有個女，但祖藍媽一路好恨再抱孫，知道新抱有咗，不知幾開心，就算祖藍唔叫，祖藍媽都日日煲靚湯畀新抱仔飲！話晒大肚婆要食多啲有營養嘅嘢，祖藍最緊張要老婆重點補鈣，要亞男每日飲奶谷胎，要亞男戒甜同戒咖啡！」
而養胎中的李亞男近日準備為自己烹飪書到書展宣傳，周三(18日)更出關到灣仔會展中心出席宣傳活動。據知情者透露：「祖藍呢個廿四孝老公，已經下令要亞男停晒工作專心養胎，不過佢知道老婆花好多心血喺本書度，都放寬畀老婆出關，但話晒書展人多，佢都好緊張，落order要大家小心睇住亞男！」
母愛氾濫
早前，本刊就拍到即將做媽媽的李亞男，陪同祖藍及親友外出晚飯，當日所見，亞男慈母上身全程對姪女非常照顧，食飯前還帶姪女去商場買玩具及零食，吃飯期間，又唔揀同祖藍一齊坐等老公服侍，反而黐實姪女細心夾餸畀對方，對住姪女已經愛心爆棚，亞男將來肯定是個超級好媽媽。
重點補鈣
當日吃完晚飯，祖藍再去買了兩包脫脂高鈣奶上車畀老婆飲，雖然係新任爸爸，祖藍亦知道鈣質對肚裡BB成長非常重要，實行重點補鈣狂谷，希望生個似足老婆李亞男的靚B。
愛心爆棚
祖藍同細佬及親友食飯期間傾個不停，老婆李亞男就全程掛住照顧姪女，兩個黐住坐好好傾外，亞男更全程細心夾餸給對方，似足慈母愛心爆棚！
湯水進補
老婆掛住氹小朋友，袓藍就全程盯實老婆，又特別叫滋補靚湯畀老婆進補，非常體貼！
做埋司機
食完飯，兩公婆分頭行，亞男同部分親友行返寓所，而同細佬手足情深的祖藍，就揸車先送細佬回家，自己再外出工作。
興奮報喜
7月13日，李亞男在個人社交網晒出BB超聲波照片公布有喜，留言分享懷孕喜悅！
趕返港安胎
今年四月亞男陪祖藍去完加拿大再去新加坡工作，就在外地得知有喜，令兩公婆既興奮又緊張！更急改行程趕返港安胎。
奶奶狂喜
唔單止對小朋友有愛心，李亞男亦識得尊重長輩，同祖藍媽一直相處融洽，奶奶得知好快抱孫，開心到第一時間買定補品畀新抱進補，全天候照顧亞男！
叫岳母來港幫手
愛錫老婆的祖藍，稍後亦會安排岳母來港照顧亞男。
做足保密功夫
五月李亞男同岑麗香為王君馨慶生，當時已經有咗BB的亞男，因為陀B未足三個月，怕小器未敢將好消息公開！
自從陀B後，每到人多地方，亞男都戴口罩護胎。
李亞男近年將時間放去研究烹飪，煮得一手好菜的她，經常煮好嘢食餵飽老公，日前(7月18日)，更為其烹飪書出關到書展宣傳，大肚後首現身同大家分享將做媽媽的喜悅。
向嘉欣取經
陀B四個月的李亞男，日前一個人飛溫哥華探家人，順道探同樣留加安胎的好姊妹鍾嘉欣，同好姊妹同時間陀B，兩人更興奮到一齊挺肚影相大晒母愛，嘉欣還調皮指住亞男個肚量度BB size，十分搞笑。
比李亞男遲婚的鍾嘉欣，一直鼓勵亞男快些生BB，得知好姊妹有咗，自然喜上加喜，快將做第二任媽媽的嘉欣，更不停將自己陀B經驗同好姊妹分享。
李亞男：婚姻就是各有犧牲
李亞男早前接受本刊專訪，大談婚姻之道。
從拍拖到結婚，王祖藍固然爬得快，而他和李亞男這一對也讓不少人跌眼鏡。不過恩愛之餘，去年底還是傳出祖藍太忙、亞男太依賴，於是亞男因為驚恐症入院，亦疑似患上抑鬱：「驚恐症係真嘅，不過抑鬱係假嘅，係結婚冇耐我因為腸胃有事入咗院，當時祖藍喺內地拍緊電視劇《哪吒》，實在請唔到假返唔到嚟陪我，我就真係覺得好down。外界話佢為咗事業忽略我，我想話其實係佢為咗我犧牲咗好多至真。嗰次以後，佢真係除咗綜藝節目再唔會接內地電視劇、永遠出trip都一定唔會超過三個月。我覺得婚姻就係要互相珍惜互相犧牲，佢講得出做得到，所以我本來想去日本九個月考個藍帶章，依家都暫時放低咗呢個目標，冇可能淨係佢一個為咗呢段婚姻努力。」
李亞男 爹哋鼓勵19歲選美
33歲的李亞男在上海出世，9歲舉家移民加拿大溫哥華，她說自己小時候被外公外婆湊大，長大則學校、教會、屋企三點連線，從來不出門、從來沒有自己的社交圈，21歲認識祖藍之前，也只交過一個男朋友：「其實拍得兩個散拖，咩都冇做過，我都唔知算唔算正式一段感情。」
愛在祖藍未紅時
一坐下來，其實李亞男一直高呼，要幫她澄清一下和祖藍拍拖的時間線：「好多人以為佢開始紅我至同佢一齊，其實05年我哋對大家有feel嗰陣，佢仲係兒童節目主持、仲未幫《東方之珠》郭晉安代唱、仲未演《同事三分親》個樓華。」李亞男和王祖藍的初邂逅，就是在藝人之家。「當時大家對大家都冇感覺，淨係覺得佢細細粒幾得意。識佢以前，我鍾意嘅明星都係王力宏、黎明嗰啲⋯⋯」簡單嚟講，即是一概白馬王子型，並且高度一定要在李亞男之上，那些年，有排都未輪到王祖藍。
藍媽媽 推波助瀾
當時李亞男沒有考慮過王祖藍，連王祖藍後來也對李亞男承認，選美冠軍是自己能力與想像範圍之外，兩個人的關係開始起了微妙變化，多得祖藍媽媽推波助瀾。「我記得有一次藝人之家燒嘢食，祖藍媽媽第一眼見到我就讚我靚，跟住燒完隻雞翼又講『李小姐你好靚！』、燒完條腸又講『李小姐你好有氣質！』成晚讚完我十次八次之後，夜晚又返去同祖藍講。祖藍都話嗰晚開始留意我，然後有一次發現我個手袋隨身袋住本聖經，至真正刮目相看，覺得呢個女仔唔同其他選美出身嘅人，都幾虔誠唔係淨係追逐名利。」
一對一教學
也就是那一晚以後，王祖藍開始給李亞男教廣東話。話說多才多藝的祖藍一直在藝人之家教演技、教唱歌亦教語言，不過人人都是大班教授，唯獨李亞男一個可以特別享受一對一教學：「嗰陣時冇諗太多，依家諗番，係喎？得我一個嘅？又好似係有小小追嘅成分。跟住係佢約我去主題樂園玩，大家喺Space Moutain入面坐過山車，驚驚吓就拖咗手仔⋯⋯不過嗰次之後我哋冇即刻一齊，反而係去咗問牧師意見。」
冷靜期 三年零四十日
李亞男說，祖藍在遇到自己以前情路上有過不少波折，並不敢貿然開始新感情，而自己則是經驗太少，不敢自己做決定：「尤其係身邊有朋友提醒我， 我一個女仔嚟到陌生地方，第一個喺身邊出現嘅任何男性都有機會被我依賴，我都怕對祖藍嘅係感動唔係感情，最後傷害咗佢。所以牧師叫我哋畀自己四十日冷靜期先，四十日之後我哋兩個喺電話分手，大家都講到喊⋯⋯其實咩都未做過、完全未開始過， 咁都一齊喊，諗番轉頭都覺得好cute。」
身高差距
那一年不敢開始的原因，李亞男承認，其中一個顧忌的正是身高差距，兩人衡量過利害關係，始終還是怕惹人話柄。「真心嗰句，如果唔使顧及人眼光，我哋應該會更早一齊。其實自己幸福就得，又唔係犯法，事實證明，之後真係公開戀情，(身高差)都唔係寫咗好耐啫！」
一起傳教重燃愛火
冷靜期一過就是三年，兩人因為一起到美加佈道會傳教而愛火重燃，一回港、李亞男收到第一封Email就是王祖藍徹夜趕工寫成的歌詞《墮入凡間的天使》，然後正式拍拖：「分開嗰三年，我哋真係放低咗，我甚至有睇吓身邊有冇其他人適合⋯⋯我嗰陣時都以為係，我嘅世界可以好大，甚至喺身邊搵吓有冇其他人可以發展，不過慢慢都係發現冇人比祖藍更適合我。」
「我哋價值觀一致、好多嘢都一凹一凸，佢快我慢，佢複雜我簡單， 我鍾意飲紅酒佢鍾意飲朱古力奶。我自細慣咗畀人照顧，而佢係阿哥，爸爸早走十幾歲就要孭起頭家，對住屋企好有責任感，我細個好想要哥哥，佢會教我會幫我揸fit，唔好睇外形，佢內心好強大，從來唔會驚青。仲有佢好有才華，喺藝人之家教得好好，事實上係可以做教授嘅人，畢業咁多年好多嘢依家都仲可以拋書包，同埋我最敬佩佢，係咁叻都可以好謙虛，會放低自己學新嘢，又會聽我意見 ……」講到老公，就讚到冇停口！
李亞男讚祖藍好謙虛肯聽人意見，我問亞男，做了老闆以後、結婚以後，王祖藍是不是還肯聽老婆意見？李亞男弱弱答道：「佢追我時係聽晒我所有意見，結咗婚後，我嘅意見真係唔多，佢都知我放心畀佢安排晒所有嘢⋯⋯」
被岳父母誤會無禮貌
從被高攀，到如今成為成功男人王祖藍背後的賢內助，李亞男說，眼前的小個子其實沒有變：「人係會成長，我都做唔到以前嘅我，佢表面上變咗，但係本質係一樣，我知佢好多嘢做又做老闆，無時無刻都好多嘢諗好多嘢度，最開頭連我爹哋媽咪都誤會佢無禮貌、點解成日講電話⋯⋯作為佢身邊嘅人，知道佢同一時間處理緊幾多嘢，可以做嘅就係返到屋企時畀佢盡情放空、畀佢落台嘅時候可以做番自己，當佢忽略咗身邊嘅嘢時，提一提醒佢，幫佢去留意見唔到嘅嘢。」
順道一提，李亞男說王祖藍個子雖小，喜歡的東西卻都偏大：「所以佢揀咗我做老婆，又喺大埔買咗依家呢個三千幾呎嘅屋企，喺出邊做嘢辛苦，佢真係好需要一個屬於自己嘅地方好好放鬆。」
記得當時跟剛剛因為代唱冒起頭來的王祖藍第一次做訪問，他就說過要買大屋、要給媽媽最好的生活，十年而已超額完成，這就是為甚麼個子小小的他，為甚麼身影總是很高大。
