雙胞胎識叫爸爸媽媽 楊采妮：覺得好Sweet！
廣告
楊采妮日前來港同好姊妹梁詠琪一齊出席品牌活動，兩人都異口同聲話好耐未試過兩姊妹聚埋一齊，由於楊采妮長居新加坡，兩姊妹難得聚首，話題都離唔開各自嘅小朋友，楊采妮表示今次來港逗留時間比較短，因此冇帶到屋企嘅小朋友同行，講到一對孖仔已經識叫爸爸媽媽，楊采妮笑言：「我同老公都覺得好Sweet！」
撰文：東方新地
圖片：新傳媒圖片庫
楊采妮：湊小朋友自然會瘦
久未在港露面嘅楊采妮睇落清減咗唔少，佢話：「冇諗過減肥，湊小朋友自然會瘦，頭一年好重要，因為佢哋係早產BB，自己個心梗係想佢哋好啲，想畀多啲時間去瞭解佢哋，連佢哋食咩都安排晒，啱啱戒咗餵人奶，真係好攰，但過程冇咩壓力，好順利。」又表示自己可以開始復工：「可以慢慢做番嘢，不過佢哋都係得11個月大，最近啱啱學識扶住嘢行，周圍去玩。前日臨上機時，細佬識得叫『Mama』、『Mum Mum』，唔知佢係咪因為覺得肚餓！反而哥哥就喺爸爸餵食飯時叫『Papa』，真係好神奇，因為係第一次，真係好開心，叫佢講多次，佢仲識笑，知道我哋好開心，仲肯give me five，我同老公都覺得好Sweet！」
