陳豪自爆曾是蒲精一名零收入用十萬卡數填氹

夜場冇收穫陳豪：講就無敵，做就無力

日前陳豪同黎耀祥接受由伍詠薇、林盛斌主持的邵氏兄弟出品之訪談節目《Tiger’s Talk》時，陳豪直認曾是蒲精一名，佢自爆拍攝電影《晚九朝五》的年代，一星期蒲足五晚，不過有一日突然醒覺，陳豪話：「當時感覺就好似一盞射燈照住你，突然醒覺咁樣好浪費時間，係時候為人生做返啲嘢，於是就180度轉變，自此之後冇再踏足夜場，好努力為人生拼搏。」伍詠薇追問係咪大把女埋身？陳豪笑笑口話：「諗係咁諗，但真實係永遠都空手而回，講就無敵，做就無力。我係唔會飲到爛醉嘅人，主要落去跳吓舞，自己溝唔到女咪睇人溝女。我相信每個人成長都需要花段時間去認識自己，後來先知其實自己根本唔鍾意呢啲生活，只係想陪朋友，嗰時啲朋友想去就陪埋一齊去。」

主持伍姑娘問點解當年夜場冇見過陳豪，如果見到無理由會放過佢，陳豪話：「可能大家唔同場啦﹗」

呃住父母一年冇工開

被喻為無綫金蛋的陳豪，演藝路看來相當順暢，當模特兒時收入豐厚，又做過電影主角，不過陳豪話都有兜茂時：「我雖然冇祥仔捱得咁耐，但當我有心做演員時，電影圈又唔太吃香，開始冇嘢撈，試過一年都冇工開，完全冇收入，唯有卡數冚卡數，差不多有成十萬卡數，但我唔會問屋企人拎錢。」後生時玩夠蒲過，先有今日愛家庭愛老婆的陳豪。

他表示幸好自己演藝工作由TVB開始，起初有穩定的月薪收入，加上120個騷錢，收入穩定，他說：「我份人量力而為，量入為出，搵10蚊使8數，所以未試過冇飯開嘅日子。」問到貴為視帝，經常要「萬歲」請客，會否覺得肉赤？祥仔說：「如果收工煞科，頂多幾萬蚊，都可以嘅，冇乜所謂，大家開心。就算以前做細嘅，細有細份夾，唔會好吃力。」

祥仔爆萬歲最闊綽係靚靚Dicky

伍詠薇稱自己拍檔過的演員中，以羅家良最闊綽，經常開工萬歲，而祥仔說：「有位女演員唔係成日拍，久唔久先返嚟拍劇，有一日外景放午飯，平時正路求其一間酒樓就算，點知佢就搵附近一間名牌酒樓，補幾千蚊出嚟食，完全冇詐型，冇睇價錢好豪爽，（咁大方梗係開佢名啦！）咪就係袁詠儀囉！當年張衞健喺清水灣電視城最興放低幾千蚊喺度，直接扣數唔使次次畀錢埋單，好有型！」