恨有BB但無想過結婚！59歲陳秀珠做單親媽 獨力湊大兒子

撰文：東方新地｜圖片：新傳媒圖片庫、陳秀珠微博

陳秀珠絕世好媽媽

陳秀珠在新劇《BB來了》飾演李佳芯媽咪，不斷催個女生B，自覺自己湊大十幾個BB，又聲稱讀咗陪月課程，對於湊B絕對綽綽有餘，點知畀女兒發覺原來媽咪都好唔專業，生咗都唔放心畀阿媽湊。

為了確保陳秀珠在幫忙照顧女兒時，能嚴格執行根據健康院指示及育嬰百科制定的規矩，李佳芯不厭其煩向她講解。

但要深夜幫手湊B，令陳秀珠腰患復發，兼體力透支，雖然她極力死撐，但仍被李佳芯發現。

最終陳秀珠大鬧李佳芯當她是工人，李佳芯向母親道歉，兩母女冰釋前嫌。

近日劇情講到陳秀珠打算重操故業再當陪月，李佳芯辭職接陪月公司「寶安心」的生意，黎諾懿出手說服楊卓娜擔任公司顧問。

但接手公司後，陳秀珠發現「寶安心」內的其他陪月員是以姚嘉妮馬首是瞻，不禁擔心日後難以駕馭眾人。

1999年陳秀珠 甘願做未婚媽媽

現實中，陳秀珠都係一位慈母！1998年陳秀珠拍劇時發現懷孕，當年佢已40歲，屬高齡產婦，翌年8月她在美國誕下男嬰，取名陳迪加，但她一直不肯公開BB爸爸的身份，同年接受報章訪問時，坦言一向好恨有個孩子，但就無想過結婚，因爲感到無此需要，甘願身兼父職撫養兒子。

本刊記者早年見珠姐帶住囝囝迪加到九龍城買外賣返屋企食，鮮有露面嘅迪加生得眉清目秀，同媽咪成個餅印咁。珠姐沿路同阿仔傾偈話：「我想剪頭髮。」阿仔趷高腳摸一摸媽咪嘅頭髮話：「我鍾意你長頭髮多啲！」珠姐笑一笑，搣一搣佢面珠話：「好啦，唔剪啦！」之後母子就拖住手行番屋企，場面溫馨滿瀉。

珠姐曾在訪問中說，每個女人都會去到一個階段，有生BB想法，當時佢就正處於呢個階段，雖然做一個單親媽媽令佢有好大壓力，但好彩得到屋企人同好朋友嘅支持，至於外間嘅反應，佢話佢控制唔到：「最初以為人哋一定會用另一種眼光嚟睇我，不過依家日子一過，我發覺其他人對我嘅眼光比想像中好，大家都好包容，好OK，令我覺得自己就同一般嘅媽咪冇乜分別。」

講到囝囝用咗「鹹蛋超人」個名，珠姐話只係巧合：「因為佢喺加州出世，我又鍾意個『迪』字，所以咪叫『迪加』，我覺得幾好聽呀！好彩我個仔好鍾意超人，佢啲同學都叫佢做『超人迪加』，佢鬼咁鍾意！哈哈！」珠姐又指自己不乏追求者，但佢想等囝囝再大啲先算：「話晒我As一個Single Mother，要更加錫個仔多啲，因為佢已經比其他人少咗一Part，如果我去拍拖而忽略咗佢，咁個細路點算呀？」迪加今年已經19歲大，相信珠姐可以放心晒啦。

79年港姐出身

入行39年嘅陳秀珠，原來係79年港姐出身，參選時只得21歲，雖然當年三甲不入，但仍簽約無綫，主演過多部劇集。

88年《誓不低頭》 港女始祖

在88年神劇《誓不低頭》本來係謝文武(鄭少秋飾)老婆，但對方被陷害入獄後，居然改嫁老公仇人岑波(郭鋒飾)，原因之一係貪岑波有錢！

99年《刑事偵緝檔案IV》做宣萱表姨

睇翻深夜重播嘅99年《刑事偵緝檔案IV》，陳秀珠演宣萱表姨，兩個人都凍齡有術，個樣廿年如一日都冇點變過！

95年《刑事偵緝檔案II》檔案八：寸草心

其實95年嘅《刑事偵緝檔案II》陳秀珠有份演其中一單案件。

劇中陳秀珠飾演嘅舞小姐Betty亦係一位「慈母」，生下女嬰冬冬後，表面上對女兒漠不關心，要高婕(郭可盈飾)代佢湊女，但實際為女兒將來打算，不惜自殺呃保險。

陳秀珠又曾主持過多個節目，包括《K-100》、《體育世界》，以及86年世界盃。

孖劉華拍廣告

當年陳秀珠仲同初出道嘅劉德華拍過眼鏡廣告！