【開心速遞】63歲「譚校長」陳榮峻潮玩IG！送水輝：快啲follow啦

撰文：東方新地 ｜ 圖片：陳榮峻Instagram、新傳媒圖片

陳榮峻 Rap得又演得

嗰集講述一班實力派演員包括75歲「熊樹根」劉丹、70歲「龍敢威」羅樂林、63歲「譚道德」陳榮峻，加埋68歲的「馬豹」黎彼得組成「大四喜」，一齊去電視台《香港齊Hip Hop》比賽，四人加埋超過270歲，但一身hip hop裝束仲Rap埋，夠晒頂癮。

劇情提到大會改制，需要即興Rap出以IG為題的歌，喺「大四喜」中較為年輕63歲嘅「譚道德」陳榮峻就向其他三位成員講解乜嘢係IG，但講完佢哋似番都係一竅不通！

最終臨場打天才波，丹爺打頭陣Rap出「Hey！乜嘢叫做IG我哋唔知，我哋淨係知，企喺台上我哋可以⋯」三位成員輪流Rap，Rap起來有板有眼，一身Hip Hop打扮加生動演繹，片段出街後隨即在網上瘋傳！

網民大讚他們Rap得出色，仲紛紛力撐佢哋組成男團。

63歲陳榮峻潮玩IG

而日前「送水輝」許家傑在IG上載與「譚道德」合照仲宣布佢開IG：「譚校長終於知咩嘢係IG #快啲follow啦 #最奄悶大獎 #愛回家之開心速遞 #譚道德」63歲陳榮峻表示之前真係唔知IG係乜，但拍完嗰集後就知，大家不妨Follow「譚校長」嘅IG啦！

重溫歌詞如下

Hey乜嘢叫做IG其實我哋唔知
我哋淨係知 企上台我哋可以
有心唔怕遲 請你聽我哋講先
我哋有吉士 幾多歲都好都未會怕瘀

乜嘢叫做IG我地唔知
我哋淨係知 香港人乜都敢試

獅子山精神有乜嘢都要行先 聽我講埋先
肯do喺香港實有發展

乜嘢叫做IG我哋唔知
我哋淨係知 乜嘢叫做禮義廉恥
一味玩ig 一味講呢啲問你點知

乜嘢叫做IG我哋唔知
我哋淨係知廣東話就好多意思
廣府九韻 玩落就更加有拍子
一味abc一味講呢啲

YO其實我哋大四喜乜嘢都知
所有潮流新事物我哋乜都肯試
人生流流長咁樣做先有意義
所有年齡層咁做先會啱key

其實我哋大四喜乜嘢都知
所有潮流新事物我哋乜都肯試
人生流流長咁樣做先有意義
所有年齡層咁做先會啱key

 

陳榮峻 無綫綠葉王

現年63歲的陳榮峻原名陳榮基，入行初期加入佳藝電視，其後參加1984年無綫電視藝員訓練班，畢業後一直效力無綫，不經不覺已經33年。多年來陳榮峻參演劇集無數，飾演過的角色多不勝數，尤其以奸角及公公角色為觀眾熟悉；另外陳榮峻早年在《怒火街頭》中飾演的根叔亦令人印象深刻。

太太離世大受打擊

2010年時，陳榮峻太太因腦部血管爆裂離世，枕邊人離世對佢打擊甚大，更曾想過自殺！幸好有陳錦鴻、陳國邦等好友不時陪伴開解，無綫高層曾勵珍亦在工作上提供協助。仔大女大，無債一身輕的陳榮峻曾有打算退休，不過同長子商量後，決定繼續留在演藝圈，默默耕耘。

陳榮峻 吳香倫譜出黃昏戀

陳榮峻向來生活低調，原來佢三年前遇到第二春，與現年57歲、同屬無綫資深演員的吳香倫相戀，譜出一段黃昏戀曲！兩人至今已三年，經常孖公仔出席活動，又會結伴去旅行。去年吳香倫仲同陳榮峻家人一齊到新西蘭旅行，感情相當不俗。

拍拖三年 有結婚打算

陳榮峻接受傳媒訪問，佢先感謝大家的祝福，承認與吳香倫拍拖三年，而且有再婚的打算！不過細節就尚未決定。陳榮峻又表示希望一切低調進行，始終大家年紀有番咁上下，只係想有個伴，亦希望雙方家長同意。去到佢哋的年紀，仍有決心去作婚姻的承諾，承諾互相扶持、彼此守護，實在係唔簡單！

女友來自演藝世家

陳榮峻去年在節目《Sunday好戲王》中獲封「公公王」，可見佢演公公角色係幾咁深入民心！至於女友吳香倫，原來出身自演藝世家，其父親吳殷志為粵語長片明星，11歲時已經在荔園登台唱歌，曾跟陳浩德、鄭君綿、鄭錦昌等人推出過雜錦專輯。吳香倫的妹妹吳江倫同為藝人。

吳香倫與妹妹吳江倫

妻子吳香倫患嚴重肺炎 陳榮峻自責

現實生活中，陳榮峻和吳香倫這對黃昏戀早在本年7月時修成正果，正當二人準備前往西地中海度蜜月時，因吳香倫久咳未癒，去看醫生後發現吳香倫大半邊的肺部有雜音，右邊肺部「花晒」，證實患上嚴重肺炎。

其實陳榮峻早在08年，首任太太因腦溢血而逝世，遲遲未能脫離此陰影，所以當他得悉剛新婚的太太患嚴重肺炎後即感到晴天霹靂，並自責問為何所有不幸的事都發生在他的身上，反之吳香倫則樂天面對，還安慰丈夫：「小問題，無事！」

雖然如此，在醫生的指導下，吳香倫有準時食藥，以使病情得以控制，出發前一日，陳榮峻決定不去旅行，把心一橫連行李也不收拾，寧願待太太完全病好再出發，但吳香倫卻不想錯失，因這是他們婚後的首次旅行，意義甚大。

整個旅程，陳榮峻雖然掛心太太的病情，未能完全享受，但從相中看得出吳香倫面色紅潤，十分開心；返港後，吳香倫仍不時到醫院進行檢查和服食抗生素，現已情況穩定逐漸康復，陳榮峻終於可以放下心頭大石。